სარეიტინგო კომპანია Fitch-ი საქართველოს ეკონომიკის გადახურების რისკებს ხედავს, განსაკუთრებით უძრავი ქონებისა და ბინების იჯარით გაცემის სფეროებში, რაც ფასების მატებაში აისახა.
უძრავი ქონების გადახურების მიზეზებზე „კომერსანტთან“ საუბრობენ დარგის სპეციალისტები და განმარტავენ, რომ ფასების ზრდა ბაზარზე გაზრდილმა მოთხოვნამ განაპირობა, ტენდენცია კი მომავალშიც გაგრძელდება.
სამშენებლო და დეველოპერული კომპანია „არსის“ გენერალური დირექტორის ბესო ორთოიძე ამბობს, რომ წელს უძრავ ქონება დაახლოებით 10%-ით გაძვირდა, ზრდის ტენდენცია კი წლის ბოლომდე გაგრძელდება.
„უძრავ ქონებაზე მაღალ ფასს მასზე მაღალი მოთხოვნა განაპირობებს. საქართველოში გასული წლის ბოლოდან უძრავი ქონების ფასი ზრდადი ტენდენციით ხასიათდება. 2022 წელს ღირებულება ყოველთვიურად იზრდებოდა, რაც გამოიწვია, როგორც გასული წლის ინფლაციამ, ასევე ომის გამო კიდევ უფრო გაძვირებულმა სამშენებლო მასალებმა და ლოჯისტიკის ხარჯების ზრდამ.
მართალია სამშენებლო მასალის ფასები დასტაბილურდა, მაგრამ უძრავი ქონების გასაყიდი ფასი კვლავ იზრდება და სავარაუდოდ წლის ბოლომდე ეს ტენდენცია გაგრძელდება, რადგან პანდემიურ პერიოდში კომპანიები შემცირებული მარჟებით მუშაობდნენ, ახლა კი ცდილობენ ამ მარჟების დაბალანსებას“, — აღნიშნავს ბესო ორთოიძემ.
უძრავი ქონების კომპანია REMAX Capital-ის დამფუძნებელი მარიამ ასათიანი „კომერსანტთან“ ამბობს, რომ ბოლო პერიოდში გასაქირავებელი ბინების დატვირთულობა თითქმის 100%-ა, რაც ნამდვილად ბაზრის გადახურების მანიშნებელია.
„რუსეთ-უკრაინის კონფლიქტის გამო საქართველოში ბინების ქირაობის ბაზარზე ცალსახათ ჭარბობს მოთხოვნა მიწოდებას. თბილისში, განსაკუთრებით ცენტრალურ უბნებში, გასაქირავებელი ბინების დატვირთულობა თითქმის 100%-ია. ახლა ბინებზე მოთხოვნა თბილისში უფრო მეტი გვაქვს, ვიდრე ბინების ფონდი არის, შესაბამისად ამან გამოიწვია ფასების გაზრდა. ცენტრალურ უბნებში ფასები საგრძნობლად არის გაზრდილი, ასეთი მოთხოვნის გამო დამქირავებლები თანახმა არიან ორმაგიც კი გადაიხადონ. მოთხოვნა არის განსაკუთრებით 6 თვემდე ბინების ქირაობაზე. მომატებულია მოთხოვნა საოფისე ფართებზეც და შესაბამისად იჯარის გადასახადიც.
რაც შეეხება ბინების გაყიდვებს, ამ მიმართულებითაც გაზრდილია მოთხოვნა. ზოგიერთი დეველოპერი მაგალითად აჩერებს გაყიდვებს და აკვირდება როგორ განვითარდება ბაზარზე სიტუაცია, ზოგიერთმა ბინები გაზრდილი ფასით უკვე გაყიდა“, - ამბობს მარიამ ასათიანი.
აღსანიშნავია, რომ საქსტატის მონაცემებით, საქართველოში 2022 წლის იანვარ-ივნისში გაცემულია 5 086 სამშენებლო ნებართვა (წინა წლის შესაბამის პერიოდთან შედარებით 15.6%-ით მეტი) 3 187.8 ათასი კვ.მ ფართობის შენობა-ნაგებობების მშენებლობაზე (წინა წლის შესაბამის პერიოდთან შედარებით 7.9 %-ით მეტი). ნებართვების 77.3% ქვეყნის 4 რეგიონზე მოდის. კერძოდ, 52.1% მოდის თბილისზე, 10.7% - მცხეთა-მთიანეთის რეგიონზე, 7.9% - ქვემო ქართლის რეგიონზე, 6.6% კი იმერეთის რეგიონზე.