ჩინელი მილიარდერი, ინტერნეტ-გიგანტ Alibaba-ს დამფუძნებელი ჯეიკ მა ამჟამად ძირითადად ფერწერით და ქველმოქმედებითაა დაკავებული - განაცხადა CNBC-სთვის მიცემულ ინტერვიუში კომპანიის ვიცე-პრეზიდენტმა ჯო ცაიმ. ამის შესახებ ავტორიტეტული გამოცემა Forbes წერს.

„მისი საქმეები ძალიან კარგადაა, მართლა. ის ფერწერით გაერთო, ბევრს ხატავს, მისთვის ეს ჰობია, თუმცა, ეს ძალიან კარგია“, - განაცხადა კომპანიის ვიცე–პრეზიდენტმა.

ცაის თქმით, კომპანიის მართვაში ჯეიკ  მა ამჟამად აქტიურად არ მონაწილეობს, თუმცა, მასთან ყოველდღე საუბრობს ტელეფონით.

„წარმოდგენა, თითქოს ჯეიკი რაღაც უზარმაზარ, გიგანტურ ძალაუფლებას ფლობს - გადაჭარბებულია. ის თქვენნაირი და ჩემნაირი, ჩვეულებრივი ადამიანია. მან დიდი იმპერია ააშენა, საზოგადოებისთვის უამრავი კარგი საქმე გააკეთა. მგონი, დღეს მას სურს უბრალოდ ყველას უთხრას - „მე მინდა ვაკეთო ის, რისთვისაც მართლაც მინდა დრო დავხარჯო, დანარჩენი კი - მეორეხარისხოვანია“, - ამბობს ჯო ცაი.

Alibaba-ს ვიცე-პრეზიდენტმა ყველას მოუწოდა, განასხვავონ ის, რაც ხდება პირადად ჯეიკ მას ირგვლივ იმისგან, რაც ბიზნესის ირგვლივ ხდება.

„ჩვენი ბიზნესი ფინანსური რესტრუქტურიზაციის და ანტიმონოპოლურ რეგულაციებთან ადაპტაციის სტადიაშია. ჩვენ დიდი ჯარიმების გადახდა მოგვიწია, მაგრამ ეს უკვე წარსულშია, ჩვენ კი წინ ვიყურებით“, - განაცხადა მან.

ბოლო თვეების მანძილზე ჯეიკ მა თითქმის არსად არ ჩანდა და ეს მაშინ, როდესაც წლების მანძილზე ის პრესტიჟული მას-მედიისა და სხვადასხვა საერთაშორისო ფორუმების ხშირი სტუმარი იყო. მისმა უეცარმა გაქრობამ ბევრი კითხვა გააჩინა.

ყველაფერი კი 2020 წლის ოქტომბერში დაიწყო, როდესაც Alibaba-ს დამაარსებელმა ჩინეთის ხელისუფლება და სახელმწიფო ბანკები ღიად გააკრიტიკა. მან პეკინის ფინანსური პოლიტიკა „ლომბარდის მენტალიტეტში“ და ინოვაციებისთვის წინაამღდეგობის გაწევაში დაადანაშაულა.

სწორედ ამის შემდეგ დაეწყო მას და მის კომპანიას პრობლემები - პირველ რიგში ეს მილიარდერის საფინანსო კომპანია Ant Group-ს შეეხო, რომლის აქციების განთავსება ჰონკონგის და შანხაის ბირჟებზე ბოლო მომენტში გადაიდო.

შემდეგ ჩინეთის ანტიმონოპოლურმა სამსახურმა Alibaba-ს წინაამღდეგ გამოძიება დაიწყო, რომელმაც ინტერნეტ-გიგანტის საქმიანობაში კონკურენციის შესახებ კანონის არაერთი უხეში დარღვევა დაასახელა.

საბოლოოდ კომპანიას #2,7 მლრდ–იანი ჯარიმის გადახდა მოუწია. თუმცა, ექსპერტთა აზრით, ანტიმონოპოლური კანონმდებლობა აქ არაფერ შუაშია - ჩინეთის კომპარტიამ ამით ჯეიკ მა ზედმეტი თავისუფლებისთვის და გავლენის ზრდის გამო დასაჯა.

იანვარში, მრავალთვიანი პაუზის შემდეგ, ჯეიკ მა საჯარო სივრცეში გამოჩნდა – ამჟამად, როგორც საქველმოქმედო ფონდის წარმომადგენელი.