Apple-ის აქციების ფასი 1,33%-ით 468,4 დოლარამდე გაიზარდა, ამან კი კომპანიის ღირებულების 2 ტრლნ-მდე ზრდა გამოიწვია. 

აქამდე ერთადერთი საჯარო კომპანია, რომლის კაპიტალიზაცია 2 ტრილიონია საუდის არაბეთის სახელმწიფო ნავთობკომპანია Saudi Aramco იყო.

Apple-ს კაპიტალიზაციის   1-და 2 ტრილიონამდე გაზრდისთვის 2 წელი დასჭირდა - 1 ტრილიონს ტექნოლოგიური გიგანტის ღირებულება, 2018 წლის 2 აგვისტოს მიაღწია. ბოლო წლის მანძილზე, კორონავირუსის პანდემიის და სხვა კომპანიების აქციების ჩამოშლის მიუხედავად, Apple-ის ფასიანი ქაღალდები 59%-ით გაძვირდა.

„ეს მონუმენტალური ზრდაა Apple-სთვის, მით უმეტეს მაშინ, როდესაც სკეპტიკოსები თვლიდნენ, რომ კომპანიის ზრდის პოტენციალი უკვე დიდი ხნის წინ დასრულდა“ - ამბობს
კომპანია Wedbush-ის ანალიტიკოსი დენ აივსი.

ივლისის ბოლოს Apple-ის  პროდუქტების და სერვისი გაყიდვები 11%-ით გაიზარდა.  ეს კი მთელ მსოფლიოში კომპანიის საფირმო მაღაზიების მასობრივი დახურვის მიუხედავად მოხდა.

შემოდგომაზე  Apple-ი ახალი სმატრფონის  iPhone 12-ის გაყიდვებს იწყებს. პანდემიის გამო ახალი ტელეფონების დახლზე გამოჩენის ვადა გადაიდო, მაგრამ დენ აივზი გაყიდვების „სუპერციკლს“ ელოდება.

iPhone 12  კომპანიის პირველი მოწყობილობა იქნება, რომელიც  5G-სთან თავსებადია.

პარალელურად Apple იწყებს აქციების გაყოფას - 1 აქცია 4-ად გაიყოფა, ხოლო მათი შეძენა უფრო მარტივი იქნება.

„სპლიტის“ პროცედურა 24 აგვისტოს შედგება, ამავე დღეს იმ აქციონერების რეგისტრაცია დასრულდება, ვისაც დამატებითი ფასიანი ქაღალდების მიღების უფლება აქვთ.

განახლებული აქციებით ვაჭრობა 31 აგვისტოს დაიწყება.

თავისთავად აქციების გაყოფა ფუნდამენტალურ მაჩვენებლებზე არც უარყოფითად მოქმედებს და არც დადებითად - ეს უფრო ფორმალური პროცედურაა იმისთვის, რომ აქციები უფრო ხელმისაწვდომი გახდეს.

„სპლიტის“ შედეგად თითო აქციის გაიაფება მცირე ინვესტორების მოზიდვას ხელს უწყობს, განსაკუთრებით იმათ, ვისაც Apple-ის ფასიანი ქაღალდების მაღალი ფასი აფრთხობდა.

ექსპერტების აზრით, აქციების გაყოფის გავლენა კომპანიაზე უმნიშვნელო იქნება. Apple-ს ლიკვიდურობა და აქციებით ვაჭრობის მოცულობა ისეთი დიდია, რომ მცირე ინვესტორების მოსვლა ვერაფერს შეცვლის  - მათ უბრალოდ ვერ შეამჩნევენ.

მაგრამ ამავე დროს სპლიტი არის Apple-ის მენეჯმენტის მკაფიო სიგნალი, რომ ხელმძღვანელობა კომპანიის სტაბილურობასა და სიძლიერეში დარწმუნებულია, ეს კი ინვესტორების განწყობებზა დადებითად იმოქმედებს.

forbes.ru

მოამზადა თენგიზ აბლოთიამ