ბოლო 2 წლის მანძილზე კრიპტოვალუტების ბაზარი სწრაფი ტემპებით იზრდება, თუმცა ეს ტენდენცია შესაძლოა შეიცვალოს.
აშშ-ს ფასიანი ქაღალდების კომისიას ახალი უფროსი ჰყავს. ფინანსური „ქორიმა“ გარი გენსლერმა სასაქონლო ფიჩერსების კომისიის თავმჯდომარის პოსტზე დერივატივებით ვაჭრობის რეგულირება მკვეთრად გააძლიერა. კრიპტო სამყაროს მიმართ მისი დამოკიდებულება მკვეთრად ნეგატიურია, მან კრიპტობაზარზე არსებული ვითარება „ველურ დასავლეთად“ შეაფასა და განაცხადა, რომ მისი მიდგომა რეგულირებისადმი ნეიტრალური არ იქნება, რაც დეცენტრალიზებულ ფინანსურ პლატფორმებსაც ეხება.
The Wall Street Journal-ის ინფორმაციით, კომისიამ უკვე დაიწყო გამოძიება დეცენტრალიზებული კრიპტო ბირჟის Uniswap-ის მფლობელ კომპანია Uniswap Lab-ის წინააღმდეგ. გამოძიების მიზანი იმ ციფრული აქტივების შესწავლაა, რომლებიც ზედამხედველობას მკვეთრად ეწინააღმდეგებიან. ბაზარზე ახალი გამოძიებებიც არ არის გამორიცხული.
აგვისტოს ბოლოს ანალიტიკურმა ბლოკჩეინ კომპანიამ AnChain.AI-მა განაცხადა, რომ ფასიანი ქაღალდების კომისიას დარეგულირებულ ბაზარზე ტრანზაქციების დადგენის და კონტროლისთვის საჭირო ტექნოლოგიას მიაწვდის.
„კომისია ძალიან დაინტერესებულია გაიგოს, თუ რა ხდება ციფრული აქტივების სამყაროში“ - განაცხადა AnChain.AI-ის მფლობელმა ვიქტორ ვონგმა.
ამჟამად კომისია ცდილობს კრიპტო ბიზნესთან ისე როგორც ჩვეულებრივ კომპანიებთან მიუშავოს. კომისია მათგან სტანდარტულ ინფორმაციას სტრუქტურაზე, ბენეფიციარებზე, ფინანსურ მდგომარეობაზე და ა.შ. ითხოვს. თუმცა ეს კრიპტო სამყაროს იდეას ეწინააღმდეგება, რადგან ვირტუალური ვალუტის უპირატესობა სწორედ დეცენტრალიზაცია და სახელმწიფო რეგულირების არარსებობაა.
ამ დროისთვის არსებული კანონმდებლობით, კრიპტოვალუტები ნაცრისფერ ზონაში არიან და ამერიკის საგადასახადო ორგანოებთან ანგარიშვალდებულები მხოლოდ 2024 წლის შემდეგ იქნებიან.
დეცენტრალიზებულ ბირჟებს მართლაც ბევრი სუსტი ადგილი გააჩნიათ, რომელიც სწორედ სახელმწიფო რეგულირების და ზედამხედველობის არარსებობის შედეგია. ისინი ფულის გათეთრებისგან და თაღლითობისგან დაცულები არ არიან, რადგანაც კრიპტოვალუტების ოპერაციები ანონიმურია და პირადობის დადასტურებასაც არ საჭიროებენ. კრიპტობირჟებს ასევე აქტიურად იყენებენ ფინანსური პირამიდები და ნარკოდილერები.
თუმცა, ბირჟა Uniswap-ის დირექტორმა სტივ ადამსმა განაცხადა. რომ მისი ტექნოლოგია არის მხოლოდ კომპიუტერებს შორის ინფორმაციის გაცლის ნეიტრალური საშუალება, რომლის გამოყენებაც ბოროტი მიზნებისთვისაც არის შესაძლებელი.
კრიპტოაქტივების კაპიტალიზაციის და მოცულობების ზრდა რეგულატორებს სულ უფრო მეტად აღიზიანებს და ფასიანი ქაღალდების კომისიის გამოძიება მხოლოდ დასაწყისია ზეწოლა კიდევ უფრო გაძლიერდება.
კრიპტოპლატფორმების რეგულირება კრიპტო სამყაროს სერიოზულ პრობლემებს შეუქმნის, რადგან რეგულაციები მათ ხარჯებს გაზრდის და ტრანზაქციებს ანონიმურობას ეჭვქვეშ დააყენებს.
მოამზადა თენგიზ აბლოთიამ
წყარო: Forbes.ru