გერმანიის ენერგეტიკის მარეგულირებელმა კომისიამ განაცხადა, რომ რუსული გაზსადენის „ჩრდილოეთ ნაკადი-2“-ს მმართველი შვეიცარიული კომპანია Nord Stream 2 AG-ის სერტიფიცირებას აჩერებს.
რეგულატორის ინფორმაციით, პროცესი მხოლოდ მას შემდეგ განახლდება, რაც კომპანია გერმანიაში იურიდიულ პირად დარეგისტრირდება და მილსადენის მართვის ყველა აქტივი ამ გერმანული კომპანიის საკუთრებაში გადავა.
„ჩრდილოეთის ნაკადი-2“-ს ამოქმედებისთვის გერმანიაში სერტიფიცირება სასიცოცხლოდ მნიშვნელოვანია, რადგანაც სწორედ გერმანიაა მისი ბოლო წერტილი.
სერტიფიცირება კანონით თანახმად, განაცხადის შეტანიდან 4 თვეში უნდა დასრულდეს და ამ კონკრეტულ შემთხვევაში ბოლო ვადა წესით 2022 წლის 8 იანვარია.
რეგულატორის გადაწყვეტილება ვადების გადაწევას არ გამოიწვევს, რადგანაც Nord Stream 2 AG-ს მენეჯმენტმა განაცხადა, რომ მზადაა გერმანული მხარის ყველა მოთხოვნა დააკმაყოფილოს.
რას ნიშნავს ეს ყველაფერი ევროპისთვის?
გაზსადენის მმართველი კომპანიის პროგნოზით, 2035 წლისთვის, ჰოლანდიაში, ბრიტანეთში და ნორვეგიაში მოპოვების მკვეთრი შემცირების ფონზე, ევროპაში გაზის დეფიციტი 120 მლრდ. კუბურ მეტრს შეადგენს, მოხმარება კი არ შემცირდება, რადგანაც დღეს არსებული ორგანული საწვავების სახეობებს შორის, სწორედ გაზია ეკოლოგიურად ყველაზე სუფთაა.
შესაბამისად, მოთხოვნის დაკმაყოფილება შესაძლებელი იქნება მხოლოდ იმპორტის ზრდის ხარჯზე, „ჩრდილოეთის ნაკადი-2“-ს კი დამატებითი იმპორტის მესამედის გატარება შეუძლია.
გერმანული რეგულატორის გადაწყვეტილების გამოცხადების შემდეგ ევროპაში გაზის ფასმა ზრდა დაიწყო და 1060 დოლარს მიაღწია.
სავარაუდოდ, უახლოეს პერიოდში ენერგოკრიზისი ევროპაში გამწვავდება - „ჩრდილოეთის ნაკადი-2“-ს ამუშავებაში შეფერხებებთან ერთად, „გაზპრომი“ ამცირებს ევროპისთვის გაზის მიწოდებას უკრაინის და პოლონეთის გავლით.
ამასთან ერთად ტექნიკური მიზეზების გამო მეოთხედით შემცირდა გაზის მიწოდება ნორვეგიიდან, შესაბამისად, დეფიციტის დაძლევის პერსპექტივა ისევ კითხვის ქვეშ აღმოჩნდა.
პროექტის შეჩერება გაზის დეფიციტის და კატასტროფულად მაღალი ფასების ფონზე, პირველ რიგში ევროპელ მომხმარებლებს დააზარალებს.
რუსული გაზსადენის წინააღმდეგ პირველ რიგში გამოდიან ქვეყნები, რომლებიც რუსული გაზის ტრანზიტს ახორციელებენ, შესაბამისად, „ჩრდილოეთის ნაკადი-2“ მათთვის პირდაპირი კონკურენტია - პირველ რიგში უკრაინა და პოლონეთი.
„ჩრდილოეთის ნაკადი-2“-ს ამუშავების შემთხვევაში უკრაინა წელიწადში 2 მლრდ.დოლარს და რუსეთზე ზეგავლენის მოხდენის ფაქტობრივად ერთადერთ რეალურ საშუალებას დაკარგავს.
ევროკავშირს და გერმანიას გაზსადენის წინააღმდეგ გალაშქრების თავისი მიზეზები აქვთ - „გაზპრომს“ არ სურს ევროკავშირის ენერგეტიკული ბაზრის რეგულაციების შესრულება - კერძოდ, კანონმდებლობა კრძალავს გაზის მომპოვებლის და ტრანზიტორის მუშაობას დისტრიბუციის სექტორში.
გარდა ამისა, ევროკავშირის კანონმდებლობის თანახმად, „ჩრდილოეთის ნაკადი-2“-ის მმართველი კომპანია ვალდებულია სურვილის შემთხვევაში გაზის სხვა მომპოვებლებისთვის თავის ინფრასტრუქტურაზე წვდომა უზრუნველყოს.
სწორედ ამ საკითხებზე შეუთანხმებლობა გახდა იმის მიზეზი, რომ გერმანია, მწვავე ენერგოკრიზისის მიუხედავად, გაზსადენის სერტიფიცირებას არ ჩქარობს.