სააგენტო Investing.com-მა გამოკითხვა ჩაატარა, რომელშიც მონაწილეობა 1164-მა ინვესტორმა მიიღო. აღმოჩნდა, რომ მათ შორის 65% მიიჩნევს, რომ ტრამპის გამარჯვება ფინანსური ბაზრისთვის უკეთესი იქნება.

თუმცა, მთლიანობაში ბაზარი სიმშვიდეს ინარჩუნებს - გამოკითხულთა 60% არჩევნების წინ  ინვესტირების სტრატეგიაში არავითარი ცვლილებების შეტანას არ გეგმავს, ხოლო 86% თვლის, რომ არჩევნების შედეგები საფონდო ბაზრებში მცირე გავლენას მოახდენს.

სოციოლოგიური გამოკითხვების თანახმად,  ჯო ბაიდენი დამაჯერებლად იმარჯვებს საპრეზიდენტო არჩევნებში, თუმცა, ტრამპის მომხრეები არ ნებდებიან - დღევანდელი პროგნოზები ხომ თითქმის ისევე გამოიყურება, როგორც 2016-ში, როდესაც ჰილარი კლინტონი ცალსახად იმარჯვებდა

ბაიდენის შესაძლო არჩევასთან დაკავშირებით ინვესტორებს აშინებთ მდიდრებისთვის და კორპორაციებისთვის გადასახადების შესაძლებელი ზრდა - როგორც ცნობილია, დემოკრატრმა-კანდიდატმა უკვე დააანონსა საშემოსავლო გადასახადის ზრდა იმათთვის, ვისი შემოსავალიც წელიწადში 400 000 დოლარს აღემატება.

ბაიდენი ასევე კორპორაციებისთვის მოგების გადასახადის 28%-მდე გაზრდას გეგმავს. ის ასევე  სტრატეგია „შეიძინე მხოლოდ ამერიკული“-ს დანერგვას აპირებს. თუმცა, ანალიტიკოსების აზრით, ეს პროგრამა გაყიდვების მნიშვნელოვან ზრდას არ გამოიწვევს,  რადგანაც მხოლოდ სახელმწიფო შესყიდვებს გულისხმობს.

გადასახადების ზრდა აქციების მომგებიანობაზე ნეგატიურად აისახება, მაგრამ  ზოგიერთი სექტორისთვის, კერძოდ, ნავთობის და გაზის მოპოვებისთვის პირობები თითქმის იდეალური იქნება.

„გადასახადების ზრდისგან შემოსავლების კლების კომპენსირებას ინფრასტრუქტურული პროექტების გააქტიურება გამოიწვევს“ - მიიჩნევს კომპანია Hightower-ს ანალიტიკოს სტეფან ლინკი.

„ბაიდენის გამარჯვებას სავარაუდოდ ეკონომიკური დახმარების უფრო მასშტაბური პროგრამა მოჰყვება, რომელიც სარისკო აქტივებზე დადებითად აისახება“ - ამბობს ის.

მსხვილი საინვესტიციო კომპანიები დღეს ბაიდენის გამარჯვების შესაძლო შედეგებზე ბჭობენ, რადგანაც ტრამპის გამარჯვების შემთხვევაში ყველაფერი ისედაც გასაგებია.

საინვესტიციო კომპანია  BlackRock-მა ამერიკულ აქციებს ნეიტრალური სტატუსი მიანიჭა, ანალიტიკოსებმა კი ბაზრის ფუნქციონირებისთვის მთავარ საფრთხეებად პანდემიას და ეკონომიკის სტიმულირების სუსტ პაკეტს თვლიან.

ამერიკული კომპანიების აქციებზე ასევე ნეგატიურად ჩინეთთან კონფლიქტი აისახა.

პარალელურად BlackRock ევროპული კომპანიების აქციების რეიტინგს ზრდის.

არჩევნების შედეგების მიუხედავად, ინვესტორები დარწმუნებულები არიან, რომ 2021 წელს ვითარება გაუმჯობესდება. Investing.com-ის გამოკითხვაში მონაწილეთა 60%  იმედოვნებს, რომ 2021 წლის 2020-ზე გაცილებით უკეთესი იქნება.

თუმცა, არსებობს განსხვავებული აზრები 2021 წელს ამერიკის ეკონომიკის აღდგენის თაობაზე    - მხოლოდ 43% დარწმუნებულია, რომ  2021 წელს აშშ-ს ეკონომიკა ბოლომდე აღდგენას მოახერხებს. უმრავლესობის აზრით, ვინც არ უნდა გაიმარჯვოს საპრეზიდენტო არჩევნებში, მომავალ წელს ეკონომიკური აღდგენა მხოლოდ ნაწილობრივი იქნება.

ინვესტორების 65% თვლის, რომ ტრამპის გამარჯვება საფონდო ბაზრისთვის უკეთესი იქნება და მხოლოდ 16%-ა  ბაიდენის მომხრე.

Forbes.ru

მოამზადა თენგიზ აბლოთიამ