კოსმოსური ომი ორ მილიარდერს შორის უკვე რამდენიმე წელი გრძელდება და ამ ეტაპზე ილონ მასკი იგებს, რადგან მან პილოტირებადი ხომალდი კოსმოსში პირველმა გაუშვა და სამხედროებისგან სარაკეტო ძრავების წარმოების შეკვეთა მიიღო. თუმცა, მასკი მხოლოდ ბრძოლას იგებს და არა ომს, კონკურენცია წლების მანძილზე გაგრძელდება.
7 აგვისტოს მასკის SpaceX -მა და United Launch Alliance-მა (Lockheed Martin-ის და Boeing-ის ერთობლივმა საწარმომ) ორი ხუთწლიანი კონტრაქტი მოიგეს. ისინი აშშ-ს კოსმოსური ძალებისთვის 653 მლნ. დოლარის სარაკეტო ძრავებს გამოუშვებენ. ამ კონტრაქტის მიზანია ამერიკელების მხრიდან რუსულ რაკეტებზე უარის თქმა. ასევე აშშ-ს ხელისუფლება იმედოვნებს, რომ კერძო კომპანიები კოსმოსური ფრენების გაიაფებას მოახერხებენ.
აშშ-ს კოსმოსური და სარაკეტო სისტემების ცენტრის სარდლის ჯონ ტომპსონის თქმით, SpaceX და ULA-სთან გაფორმებული ხელშეკრულებები „კოსმოსურ ფრენებში ამერიკული ინოვაციების ისტორიაში ახალი ათწლეულის გათენებას ნიშნავს“.
„ამ კონტრაქტის მოსაპოვებლად ჯეფ ბეზოსის BlueOrigin-იც იბრძოდა, თუმცა, წაგების მიუხედავად, ის, ისევე როგორც SpaceX, მომავალში სარაკეტო გაშვებების ბაზარზე გავლენას კვლავაც მოახდენს“ - მიიჩნევს ვენჩურული ფონდის Seraphim Capital -ის მმართველი პარტნიორი ჯეიმს ბრიუგერი.
მისი თქმით, მათ შორის ძალიან მწვავე კონკურენცია იქნება. ორივე კომპანია თანამგზავრების გაშვებას და მთელს მსოფლიოში იაფი ინტერნეტის გავრცელებას გეგმავს, ამიტომაც მათ შორის ომი კიდევ დიდხანს არ შეწყდება.
ბრიუგერს არ გაუკვირდა ტენდერში მასკის გამარჯვება. მასთან ერთად პროგრამაში ისეთი გიგანტების მონაწილეობა, როგორც Lockheed Martin და Boeing-ია კონტრაქტის ეფექტურად შესრულების მეტ შანსს იძლევა, ვიდრე სრულიად ახალ მოთამაშესთან საქმის დაჭერა.
„სამხედროები ამას ზედმეტად სარისკოდ ჩათვლიდნენ“, - მიიჩნევს ბრიუგერი.
მისი თქმით, SpaceX სადღეისოდ უფრო ავტორიტეტულია, ვიდრე Blue Origin, რადგანაც ის მთავრობასთან უკვე წლების მანძილზე წარმატებულად თანამშრომლობს. კერძოდ, ათავსებს ორბიტაზე სამთავრობო თანამგზავრებს და ახდენს ტვირთების ტრანსპორტირებას საერთაშორისო კოსმოსურ სადგურზე.
„SpaceX-მა უკვე გაუშვა კოსმოსში ადამიანების მიერ მართული რაკეტა და ამით კომერციული კოსმონავტიკის ეპოქა გახსნა,“ - ამბობს ვენჩურული ფონდის IQ Capital-ს დირექტორი დენიელ კერიუ.
ტენდერის შედეგებთან დაკავშირებით Blue Origin-მა განცხადება გაავრცელა, სადაც ნათქვამია, რომ კომპანია „გულაცრუებულია მის შემოთავაზებაზე უარის თქმით“.
„ჩვენ დავამუშავეთ წარმოუდგენლად მიმზიდველი პროექტი, რომელშიც უპრეცედენტო კერძო ინვესტიციები - 2,5 მლრდ. დოლარი ჩაიდო. ჩვენმა რაკეტამ New Glenn-მა დიდი ტვირთამწეობა და მაღალი კონკურენტუნარიანობა ფასის თვალსაზრისით არაერთხელ აჩვენა“ - ნათქვამია Blue Origin-ის განცხადებაში.
forbes.com
თენგიზ აბლოთია
ილონ მასკი
