კაცობრიობას გენდერული უთანასწორობის დასაძლევად მინიმუმ 100 წელი დასჭირდება, თანაც საუკეთესო შემთხვევაში, თუ დღეს არსებული ყველა ინიციატივა რეალიზებული იქნება, ქალების აქტიური ჩართვა პოლიტიკაში და მმართველობაში, მათ საზოგადოებრივი მდგომარეობის გაუმჯობესება, ხელფასებში სხვაობის შემცირება და ა.შ.

თუმცა, არიან ისეთებიც, ვინც 100 წელს არ ელოდება და თავის გასაკეთებელს თავად აკეთებს, მათ შორისაა გლობალური ტრანსნაციონალური კორპორაცია Procter & Gamble, რომელიც სქესისგან განურჩევლად ყველა თანამშრომლისთვის თანაბარი პირობების შექმნას ცდილობს.

ამ დროისთვის კორპორაციის თანამშრომელთა 60% - ქალია, თუმცა, ზედა ეშელონებში დისბალანსი მაინც არსებობს - ტოპ-მენეჯერებს შორის 70% მამაკაცია და მხოლოდ 30% - ქალი. ამიტომაც, კომპანია განსაკუთრებით აქტიურად ამ სეგმენტში მუშაობს.

Procter & Gamble-ში მიიჩნევენ, რომ პირველ რიგში დასაძლევია არა მხოლოდ ქალების მიმართ დისკრიმინაციული დამოკიდებულება, არამედ დღეს საზოგადოებაში არსებული გადაჭარბებული მოთხოვნები მამაკაცების მიმართ - ყველაზე განვითარებულ ქვეყნებშიც კი ფართოდაა გავრცელებული წარმატებული, ფინანსურად ძლიერი მამაკაცის სტერეოტიპი.

სწორედ ამიტომ კომპანიაში მოქმედებს პროგრამა Share the Care, რომელიც მამაკაცებს ამ თავზე მოხვეული ვალდებულებებისგან ანთავისუფლებს და ბავშვის დაბადებიდან 18 თვეში მას თავისუფალ განრიგს სთავაზობს, მამაკაცს ნებისმიერ დროს და ნებისმიერი ვადით (18 თვის ფარგლებში) შვილის მოვლისთვის სახლში დარჩენა შეუძლია.

მათ მეუღლეებს კი ამ დროის გამოყენება კარიერული ზრდისთვის შეუძლიათ.

გენდერული თანასწორობა კომპანიას ახალ სიმაღლეებზე გასვლის საშუალებას აძლევს. პირველ რიგში იმიტომ, რომ დღეს ინვესტიციების მოზიდვა გართულებულია იმ შემთხვევაში, თუ მის რიგებში წონასწორობის იდეაზე ზრუნვა საერთოდ არ მიმდინარეობს. ეს პრაქტიკული საკითხია, კვლევების თანახმად, კომპანიის შიგნით მეტი მრავალფეროვნება ბიზნესს უფრო ეფექტურს ხდის და ინვესტორებმა ეს კარგად იციან.

თანაც მრავალფეროვნება უკეთესია მომხმარებლების გემოვნების გათვალისწინების და მარკეტინგის კუთხით, მომხმარებელიც ხომ მრავალფეროვანი და განსხვავებულია.

კომპანიის მენეჯმენტი ბრალდებებს ფემინიზმში უარყოფს და აცხადებს, რომ ქალებისთვის არაფერს განსაკუთრებულს არ აკეთებს, და ყველა პროგრამა, რომელიც თანასწორობის დამკვიდრებას ცდილობს, მამაკაცებს არანაირად არ აკნინებს.

„ყველა ჩვენი პროგრამა გათვლილია მამაკაცებზეც და ქალებზეც, უბრალოდ ჩვენ ვცდილობთ ყველა თანამშრომლის პოტენციალის გამოვლენას, სქესისგან განურჩევლად. ყველა ბრენდ-გუნდი ჩვენთან შერეულია, იმის მიუხედავად, ვისზეა მათ მიერ შექმნილი პროდუქტები გათვლილი, კაცებზე თუ ქალებზე“, - ამბობენ კორპორაციაში.

Procter & Gamble-ში დიდი ყურადღება ასევე ქალთა და მამაკაცთა ხელფასების თანასწორობას ექცევა. ხელფასების დადგენა გამჭირვალე და ობიექტური კრიტერიუმებით ხდება, ხოლო კომპანია რეგულარულად აკონტროლებს გასამრჯელოს სამართლიანობას და მიღწეულ შედეგებთან შესაბამისობას.

ქალებისთვის ასევე გათვალისწინებულია გარკვეული შეღავათები, მაგალითად, აღმოსავლეთ ევროპის ერთ-ერთ ფილიალში ტოპ-მენეჯერმა, რომელსაც 2 მცირეწლოვანი ჰყავს, კვირაში 4-დღიანი სამუშაო განრიგი მოითხოვა, ის ძალიან მაღალ პოსტზე მუშაობს, მას ძალიან დიდი პასუხისმგებლობა აკისრია, თუმცა, ხელმძღვანელობამ მისი თხოვნა დააკმაყოფილა.

ეს არ არის დაკავშირებული მაინც და მაინც სქესთან, ანალოგიური მოთხოვნა მამაკაცმაც რომ წამოაყენა, პასუხიც იგივე იქნებოდა.

ამ დროისთვის, ევროპაში და შტატებში Procter & Gamble-ს ხელმძღვანელობას 53% ქალებზე მოდის და კომპანია ამ მიღწევით ძალიან ამაყობს.

forbes.ru

თენგიზ აბლოთია