Forbes.ru იმ პოსტსაბჭოთა ქვეყნების სანდო ბანკების ოცეულს აქვეყნებს, რომელ ქვეყნებსაც რუსეთის მოქალაქეები ბოლო პერიოდში საცხოვრებლად ყველაზე ხშირად ირჩევენ. ამ ქვეყნების ჩამონათვალშია სომხეთი, საქართველო, აზერბაიჯანი, ყაზახეთი და უზბეკეთი.
როგორც სტატიაშია ნათქვამი, ბანკების რანჟირება მოხდა საერთაშორისო სარეიტინგო სააგენტოების (Fitch, Moody's, Standard & Poor's) შეფასებების საფუძველზე. რაც უფრო მაღალია ბანკის რეიტინგი, მით უფრო მაღალია მისი პოზიცია. რეიტინგების რაოდენობის თანასწორობის შემთხვევაში უმაღლესი ხაზი იკავებს ბანკი, რომელსაც აქვს დიდი რაოდენობით აქტივები. საფუძვლად იქნა მიღებული უახლესი მონაცემები აქტივების ღირებულების შესახებ ცენტრალური ბანკების ვებგვერდებიდან.
პოსტსაბჭოთა ქვეყნების სანდო ბანკების ოცეულში საქართველოში მოქმედი ხუთი ბანკი მოხვდა. ProCredit Bank-მა მე-5, Halyk Bank Georgia-მ მე-6, TBC Bank-მა მე-10, Bank of Georgia-მ მე-11, ხოლო Liberty Bank-მა მე-20 პოზიცია დაიკავა.
რუსეთის მეზობელი ქვეყნების ყველაზე საიმედო ბანკების რეიტინგში საქართველოს 5 ბანკის შესახებ Forbes.ru შემდეგ მონაცემებს აქვეყნებს:
ProCredit Bank – ბანკი 1999 წელს დაარსდა. აქტივები: 0,632 მლრდ დოლარი; აქციონერები: ProCredit Holding AG (100%). ბანკი გერმანიის კომერციული ბანკების მშობელი ჯგუფის, ProCredit Holding-ის ნაწილია. 2023 წლის მარტის დასაწყისში ბანკმა გამოაცხადა, რომ უკრაინაში შექმნილი ვითარების გამო, ის არ გახსნის ანგარიშებს იმ პირებისთვის, რომლებსაც აქვთ რუსეთის მოქალაქეობა, ასევე რუსული წარმოშობის მქონე კომპანიებს და ბენეფიციარებს რუსეთიდან.
Halyk Bank Georgia – ბანკი 2008 წელს თბილისში დაარსდა; აქტივები: 0,375 მლრდ დოლარი; აქციონერები: Halyk Bank of Kazakhstan (100%). ბანკი უმსხვილესი საკრედიტო ინსტიტუტის, ყაზახეთის სახალხო ბანკის ქართული შვილობილია. ქართული ჰალიკ ბანკი ცუდად არის წარმოდგენილი საცალო ვაჭრობის სეგმენტში და ძირითადად ორიენტირებულია ბიზნესის, მათ შორის მცირე და საშუალო ბიზნესის დაკრედიტებაზე.
TBC Bank – ბანკი 1992 წელს დაარსდა; აქტივები: 9,7 მლრდ დოლარი; აქციონერები: 75% თავისუფალ მიმოქცევაშია, ხოლო 16.1%-ს ბანკის დამფუძნებლები, მამუკა ხაზარაძე და ბადრი ჯაფარიძე ფლობენ. TBC Bank აქტივების კუთხით უმსხვილეს ორ ბანკს შორის ერთ-ერთია, რომლის წილიც სექტორის აქტივებში, დაახლოებით, 40%-ს შეადგენს.
Bank of Georgia („საქართველოს ბანკი“) — 1994 წელს დაარსდა. აქტივები: 9.63 მლრდ დოლარი; აქციონერები: Georgia Capital (19,9%), Harding Loevner LP (4,3%) და Fidelity Investments (3,7%). TBC Bank-თან ერთად ქვეყანაში აქტივების კუთხით ერთ-ერთი უმსხვილესი ბანკია. „საქართველოს ბანკი“ პოპულარული გახდა რუსებში, რომლებიც საქართველოში 2022 წელს გადმოვიდნენ. წლის ბოლოს კი BOG-მა დაიწყო რუსეთის მოქალაქეების ანგარიშების დახურვა, რაც ახსნა შიდა პოლიტიკით.
Liberty Bank — ბანკი 1994 წელს დაარსდა. აქტივები: 1,3 მლრდ დოლარი. აქციონერი: Georgian Financial Group-ია (91,99%). ის სიდიდით მესამე ბანკია ქვეყანაში. Liberty-ს აქვს ყველაზე ფართო ფილიალების ქსელი ქვეყანაში. 2021 წლის ბოლოდან ბანკი მოქმედებს როგორც პენსიებისა და სოციალური შეღავათების გადახდის ექსკლუზიური აგენტი.
რაც შეეხება რეგიონის სხვა ქვეყნების ბანკებს, ოცეულში ყაზახეთის 5, უზბეკეთის 7, სომხეთის 2 და აზერბაიჯანის 1 ბანკი მოხვდა.