„საქართველოს ადვოკატები დამოუკიდებელი პროფესიისათვის“ და ბიზნესისა და ტექნოლოგიების აკადემიის ინიციატივით 29 ოქტომბერს ბიზნესისა და ტექნოლოგიების აკადემიაში HR ფორუმი ჩატარდა, ფორუმი ადამიანურ რესურსებს და მათ სწორად მართვას ეხებოდა, აღსანიშნავია ისიც, რომ ამ ორ ორგანიზაციას ურთიერთთანამშრომლობის მემორანდუმი გაფორმდა, მემორანდუმის მიზანია საზოგადოებაში ცნობიერების ამაღლება, პროფესიული განათლების პოპულარიზაცია, სასწავლო შემეცნებითი აქტივობების დანერგვა და განხორციელება.
როგორც „კომერსანტთან“ ბიზნესის ადმინისტრირების დოქტორმა და ბიზნესისა და ტექნოლოგიების აკადემიის დამფუძნებელმა სოფიო მაჭარაშვილმა აღნიშნა, ფორუმი ბიზნესს, ადვოკატებსა და მოსამართლეებს შორის პანელურ რეჟიმში წარიმართა, სადაც ადვოკატებმა და მოსამართლეებს წარმოადგინეს ქეისები , ხოლო ბიზნესის წარმომადგენლებისგან ძალიან ბევრი კითხვა დაისვა, ფორუმზე ასევე წამოიჭრა ისეთი პრობლემური საკითხი, როგორიცაა დასაქმებულის შრომითი უფლებები.
„პრობლემური საკითხები, რომელიც დისკუსიაზე წამოიჭრა ეხებოდა საგანმანათლებლო დაწესებულებებში და ზოგადად ორგანიზაციებში ადამიანური რესურსების მნიშვნელობას, მათი სწორად შერჩევის ტექნოლოგიებს და დაცვის სტანდარტებს“, - აღნიშნა სოფიო მაჭარაშვილმა.
„კომერსანტის“ კითხვაზე, თუ რამდენად პრობლემატურია დღეს ორგანიზაციებში ადამიანის უფლებების დაცვა, სოფიო მაჭარაშვილი პასუხობს, რომ გამომდინარე იქიდან, რომ კანონი შრომის უფლებების შესახებ ჯერჯერობით მაინც ახალია, დასაქმებულიც და დამსაქმებელიც ამ მიმართულებით ბევრ გამოწვევას აწყდება.
„მსგავსი ღონისძიებები როგორც დასაქმებულისთვის, ასევე დამსაქმებლისთვის ძალიან მნიშვნელოვანია, ასევე მნიშვნელოვანია კონსულტაციების მიღება ისეთი ადამიანებისგან, როგორიც არის თბილისის სააპელაციო სასამართლოს ადმინისტრაციულ საქმეთა მოსამართლე, თბილისის საქალაქო სასამართლოს სამოქალაქო საქმეთა კოლეგიის მოსამართლე. სწორედ ამ ადამიანებისგან გაჟღერდა ბევრი საინტერესო ინფორმაცია, როგორია სასამართლო პრაქტიკა ამა თუ იმ მიმართულებით, ასევე ძალიან ბევრი კითხვა დაისვა ბიზნესისგანაც. საინტერესოდ ისაუბრეს ადვოკატებმაც, რადგან სწორედ მათ ხელში ხვდება მსგავსი ქეისები“, - აღნიშნა სოფიო მაჭარაშვილმა.
როგორც „კომერსანტთან“ პროფესორმა და განათლების ექსპერტმა მარიამ დარბაიძემ აღნიშნა, სხვადასხვა პანელზე განხილვის საგანი იყო პერსონალის მართვა, როგორც ინსტიტუციურ ასევე სამართლებრივ ჭრილში, განხილული იყო ყველა საფეხური, პროფესიული სასწავლებელი, სკოლა, უმაღლესი, როგორც ადმინისტრაციული, ასევე აკადემიური მიმართულებით, დისკუსია ასევე შეეხო იმას თუ რა პრობლემატიკა შეიძლება არსებობდეს ადამიანური რესურსების მართვის მიმართულებით.
„ფორუმზე მნიშვნელოვანი საკითხი იყო ორგანიზაციული კულტურა, პერსონალის შეფასების კრიტერიუმები, მათი შერჩევის ხრიკები და წესები, პერსონალის შენარჩუნება, სამსახურიდან გაშვება თუ მათი უკან დაბრუნება, მათი პროფესიული განვითარება და სხვა.
ძალიან ბევრი პრობლემატიკა იყო წამოჭრილი, რომ კანონმდებლობის დონეზე შევიდეს ცვლილებები ამ მიმართულებით , რადგან დღეს კანონმდებარე აქტები კანონმდებლობასთან ურთიერთწინააღმდეგობაში მოდის, ძალიან საინტერესო ფორუმი იყო, აქტიური, ინტერაქტიური, ბოლოს იყო რამდენიმე სამართლებრივი ქეისი მოქმედი მოსამართლეებისგან, რომელიც სამსახურიდან გაშვებას და თანამშრომლის უკან დაბრუნებას ეხებოდა. ამან კიდევ უფრო ნათელი მოჰფინა იმ პრობლემატიკას, რაც დღეს კომპანიებში , დაწესებულებებსა თუ ინსტიტუციებში დგას“, - აღნიშნა მარიამ დარბაიძემ.
ფორუმი ერთ დღიანი იყო და მასში მონაწილეობას იღებდნენ, ნანა ყუფუნია - პროფესიული საგანმანათლებლო დაწესებულებათა ავტორიზაციის საბჭოს თავმჯდომარე, მარიამ დარბაიძე - დოქტორი, შპს ალტერბრიჯის უნივერსიტეტის ვიცი რექტორი, ქეთევან ქოქრაშვილი - შავი ზღვის საერთაშორისო უნივერსიტეტის სამართლის სკოლის დეკანი, პროფესორი, ნინო ბაქრაძე - ტრენერი, პროფესიული განათლების, თამარ კუნჭულია - HR Solutions-სის დამფუძნებელი და ACCOR-ის ჯგუფის ტალანტებისა და კულტურის მენეჯერი, თამარ ხაჟომია, თბილისის საქალაქალო სასამართლოს სამოქალაქო საქმეთა კოლეგიის მოსამართლე, ხატია არდაზიშვილი - თბილისის სააპელაციო სასამართლოს ადმინისტრაციულ საქმეთა პალატის მოსამართლე.
თაკო კვაჭანტირაძე