პარლამენტი აგრძელებს ახალი კანონპროექტის განხილვას, რომელიც „საქართველოს საზღვაო კოდექსში“ ცვლილების შეტანას გულისხმობს. სანავსადგურე ერთეული პასუხისმგებელი იქნება საქართველოს ნავსადგურებში უსაფრთხო ნაოსნობის უზრუნველსაყოფად, ნავსადგურების შესასვლელი არხის შესაბამისი დაღრმავებითი სამუშაოების, მოვლა-პატრონობისა და ნავსადგურების ღიაობის უზრუნველყოფაზე, ასევე საქართველოში მოქმედი პორტების ოპერატორებს, პორტში შესასვლელი არხების დაღრმავებას და ამ არხების მოვლა-პატრონობას ავალდებულებს.

კანონპროექტის ავტორი პარლამენტის დარგობრივი ეკონომიკის კომიტეტის თავმჯდომარე დავით სონღულაღვილი და ამავე კომიტეტის სხვა წევრები ამ ინციიატივის დაჩქარებული ფორმატით მიღებას მოითხოვენ.

ფოთის პორტის ოპერატორ კომპანია APM Terminals-ში ახალ ინიციატივას ეწინააღმდეგებიან და მისი მიღების შემთხვევაში, შესაბამისი იურიდიული ნაბიჯების გადადგმასაც არ გამორიცხავენ. დღევანდელ საკომიტეტო სხდომაზე კანონპროექტი „საქართველოს საზღვაო კოდექსში ცვლილების შეტანის შესახებ“ მეორე მოსმენით გაიმართა, სადაც APM Terminals-ის იურისტმა კახა შარაბიძემ განაცხადა, რომ  APM-მა მოამზადა შენიშვნების 17-გვერდიანი დოკუმენტი, რომელიც პარლამენტს დღეს გადაეგზავნა და მის განხილვას მოითხოვენ.

„დღეს დილით წარმოვადგინეთ 17-გვერდიანი დოკუმენტი, რაც არის APM Terminals-ის შენიშვნები. კომიტეტის წევრებსაც მიეცემათ შესაძლებლობა, რომ გაეცნონ. 10 დღეზე მეტი გამოდის შემდეგ სესიამდე. დღევანდელ სესიაზე არ გავიტანთ ამ საკითხს და გავიტანთ შემდეგ სესიაზე. 

APM-ში მიაჩნიათ რომ ამ კანონპროექტით ილახება მათი კანონიერი უფლებები და ინტერესები, ამ ეტაპზე არ ვერთვებით მუხლობრივ განხილვაში. ერთს ვიტყვი, რომ ნამდვილად არსებობს განცდა ფოთის პორტში, რომ ეს კანონპროეტი და პროცედურა დაწყებულია დაჩქარებული წესით და დასაბუთების გარეშე. ფოთის პორტი მოკლებული იყო ამ პროცესში ჩართულობას“, — აღნიშნა კახა შარაბიძემ.

ამ განცხადების შემდეგ, კანონპროექტის ავტორებმა გადაწყვიტეს, რომ რადგან ინიციატივა დღევანდელ კენჭისყრაზე არ გადოდა და დეპუტატებს კომპანიის შენიშვნების გაცნობის შესაძლებლობა ჰქონოდათ, ამ კანონპროექტს დაჩქარებულის სტატუსი მოეხსნებოდა და მისი განხილვა 10 დღის შემდეგ გაგრძელდება.

ახალი კანონპროექტის მიხედვით, საერთო შესასვლელ არხში ან/და შესასვლელი არხის საერთო ნაწილში საპროექტო სიღრმეების შენარჩუნებისათვის პასუხისმგებლობა ეკისრებათ სანავსადგურე ერთეულებს. ასევე, საერთო შესასვლელი არხის ან/და შესასვლელი არხის საერთო ნაწილის ფსკერდაღრმავებითი სამუშაოების ხარჯი უნდა განაწილდეს სანავსადგურე ერთეულებს შორის, თითოეულ სანავსადგურე ერთეულში, ამ მუხლის მე-5 ნაწილში აღნიშნული ხელშეკრულებით განსაზღვრულ საანგარიშო პერიოდში შესული გემების წყალწყვის ჯამური მაჩვენებლის პროპორციულად.

გარდა ამისა, კანონში ჩნდება ახალი ტერმინი - „სანავსადგურე ერთეული”, რაც ნავსადურის ოპერატორს აღნიშნავს. კანონპროექტის მიხედვით, “სანავსადგურე ერთეულმა” კონკრეტული პორტის არეალში შესასვლელი არხის მოვლა-პატრონობის და მისი ფსკერის დაღრმავების სამუშაოები უნდა ჩაატაროს. ამასთანავე, კანონპროექტის მიხედვით, თუკი ერთ ნავსადგურში ერთზე მეტი ოპერატორი საქმიანობს, არ უნდა მოხდეს რომელიმე ოპერატორის მიერ სხვა ოპერატორისთვის პორტის შემოსასვლელ არხში გემების შესვლაზე რაიმე მოსაკრებელის დაწესება.

ნინო თამაზაშვილი