ფოთის ახალგაზრდული საინიციატივო ჯგუფი „შ-ფოთი“ ფოთის თეატრის შესახებ წერს, რომ თეატრის მშენებლობაში 11 775 000 ლარი დაიხარჯა და შენობა მაინც ავარიულ მდგომარეობაშია. 2014 წლის 31 მაისს „ქართული ოცნების“ ხელისუფლებამ ფოთის თეატრი საზეიმოდ გახსნა. ერთ თვეში შენობაში წვიმის წყალი ჩავიდა, შემდეგ ლიფტი ჩავარდა, რამაც თანამშრომლის ჯანმრთელობაც კი დააზიანა, შემდეგ ჭერი ჩამოინგრა. ამ შემთხვევების შემდეგ საზეიმოდ გახსნილი თეატრის შენობა დაიხურა. „შ-ფოთი“ იმასაც წერს, რომ თეატრის მაშენებელი კომპანიის ორი მოწილე 2014-2016-2021 წლებში „ქართული ოცნების“ და „პატრიოტთა ალიანსის“ შემომწირველები იყვნენ.

„ლამაზი ფოთის ლამაზ ცენტრში დგას ვალერიან გუნიას სახელობის დრამატული თეატრი, თუმცა ის ავარიულია და მის სცენაზე წარმოდგენები ვერ იდგმება.

2014 წლის 31 მაისს „ქართული ოცნების“ მთავრობამ, ირაკლი ღარიბაშვილმა და ეკა ბესელიამ ფოთის თეატრი საზეიმოდ გახსნეს. ერთ თვეში შენობაში წვიმის წყალი ჩავიდა, შემდეგ ლიფტი ჩავარდა, რამაც თანამშრომლის ჯანმრთელობაც კი დააზიანა, შემდეგ ჭერი ჩამოინგრა. ამ შემთხვევების შემდეგ საზეიმოდ გახსნილი თეატრის შენობა დაიხურა.

მას მერე თეატრის შეკეთება სცადეს. ბოლო ტენდერი 2019 წელს გამოაცხადეს, რომელშიც 774 800 ლარი დაიხარჯა.

წესით, უკვე რეაბილიტირებული თეატრი უნდა გვქონოდა ფოთელებს, მაგრამ რაც შეგვრჩა იმას ხუმრობით ზოგი არაშენდას ვეძახით, ზოგიც შავ ხვრელს, „შფოთელებმა“ კი გრენლანდია შევარქვით, ჩვენი საყვარელი ქართული ფილმიდან „ცისფერი მთები ანუ დაუჯერებელი ამბავი“.

ამბავი მართლაც დაუჯერებელია, თეატრს ვაშენებთ, ვაშენებთ, ვაშენებთ, ჯამში ამ წლების მანძილზე 11 775 000 ლარი დაგვიჯდა ფოთელებს და მაინც ვერ ავაშენეთ.

ასეთი დამთხვევაც აღმოვაჩინეთ - თეატრის მაშენებელი კომპანიის ორი მოწილე 2014-2016-2021 წლებში „ქართული ოცნების“ და „პატრიოტთა ალიანსის“ შემომწირველები იყვნენ,“ - წერს არასამთავრობო ორგანიზაცია.