რუსეთიდან ხორბლის ექსპორტზე მომგებიანი ფქვილის გატანა გახდა

რუსეთიდან მარცვლეულის ექსპორტთან დაკავშირებული სირთულეები ბიზნესს ალტერნატიული ბაზრების ძიებას აიძულებს. როგორც rg.ru რუსეთის მარცვლეულის ექსპორტიორთა კავშირზე დაყრდნობით წერს, ქვეყნიდან ფქვილის ექსპორტი გაორმაგდა.

სტატისტიკური მონაცემებით, მსოფლიო ბაზარზე რუსეთიდან ხორბლის ფქვილის მიწოდება წინა სეზონთან შედარებით 205,4 ათასი ტონიდან 488,3 ათასამდე გაიზარდა.

რუსული ფქვილის ტოპ მყიდველებმა რამდენჯერმე გაზარდეს შესყიდვები: საქართველო - თითქმის 12-ჯერ (136,3 ათას ტონამდე), ავღანეთი - 22-ჯერ მეტი (100,6 ათას ტონამდე), ერაყი - 12-ჯერ მეტი (63,9 ათასი ტონამდე).

თურქეთმა, რომელიც რუსეთიდან ყოველთვის მხოლოდ მარცვლეულს ყიდულობდა და ფქვილს ადგილზე აწარმოებდა, ამჯერად 42,3 ათასი ტონა (60-ჯერ მეტი გასულ სეზონზე) შეიძინა.

ფქვილის ექსპორტი ხორბლის ექსპორტთან შედარებით ეკონომიკურად მომგებიანი გახდა. ეს მარცვლეულის ექსპორტის შეზღუდვის პირდაპირი შედეგია, პირველ რიგში, მცურავი საექსპორტო გადასახადის, - განაცხადა მარცვლეულის ექსპორტიორთა კავშირის გამგეობის თავმჯდომარემ ედუარდ ზერნინმა.

მისი აზრით, სეზონის მეორე ნახევარში კვოტა გააძლიერებს ფქვილზე მოთხოვნას, როგორც ეს გასულ სეზონში მოხდა.