ამერიკელმა რეჟისორმა, ფრენსის ფორდ კოპოლამ ღვინის ბიზნესის გარკვეული ნაწილი გაყიდა და 120 მლნ დოლარი თავის მომავალ ფილმ „მეგაპოლისში“ ჩადო. ამის შესახებ რეჟსორმა ამერიკულ ჟურნალ GQ-თან ინტერვიუში განაცხადა.

გასული წლის აგვისტოში ცნობილი გახდა, რომ ფრენსის ფორდ კოპოლა თავისი ღვინის ბიზნესის ნაწილს გეიზერვილში, კერძოდ, Francis Ford Coppola Winery-ისა და Virginia Dare Winery-ის, ასევე, სონომაში მდებარე ვენახ Archimedes-ს კალიფორნიის კომპანია Delicato-ზე ყიდდა.

GQ-სთვის მიცემულ ინტერვიუში 82 წლის რეჟისორმა გაამხილა, რომ გაყიდვის გადაწყვეტილება ფილმ „მეგაპოლისის“ ინვესტირებისთვის მიიღო, რისი სცენარის წერაც მან ჯერ კიდევ 1980-იან წლებში დაიწყო. მისი თქმით, მთლიანობაში, საკუთარი სახსრებიდან ფილმში 120 მლნ დოლარი ჩადო და მომავალი პროექტი გაქირავებაში რომც ჩავარდეს, ფინანსური შედეგები სრულებითაც არ ანაღვლებს.

„ეს მხოლოდ 120 მლნ დოლარი კი არა, არამედ ყველაფერია, რაც მაქვს. შვილებს ბევრი რამ ვუანდერძე და მთავარი, რაც მათ გადავეცი, არის ცოდნა და ნიჭი. ამდენად, ყველა მათგანი მეტად უნარიანია და პრობლემა არაფერში შეექმნებათ. ასევე, მათ ჯერ კიდევ აქვთ ოჯახური ღვინის ქარხანა, Inglenook,“ - აცხადებს ფრენსის ფორდ კოპოლა.

BPN.GE