ნედლეულის და ფრინველის საკვების გაძვირების გამო, მეფრინველეები კვერცხისა და ქათმის ხორცის კიდევ უფრო გაძვირებას არ გამორიცხავენ.  მეფრინველეობის განვითარების ასოციაციის თავმჯდომარე ზურაბ უჩუმბეგაშვილი აცხადებს, რომ წლის ბოლომდე, შეიძლება ფასი რამდენჯერმე გაიზარდოს. მისი თქმით, ახლა შეუძლებელია პროგნოზირება, რამდენი პროცენტით მოხდება ფასების მატება კვერცხსა და ქათმის ხორცზე.

„ფასები კატასტროფულადაა გაზრდილი ნედლეულზე და ფრინველის საკვებზე, ბოლო პერიოდში დაახლოებით 30%-ით. გარდა ამისა, გაზრდილია ტრანსპორტირების ხარჯი და საწვავიც 20%-ით. ჩემთვის გაუგებარი მიზეზების გამო, მსოფლიოში ფასებს მუდმივი ზრდის ტენდენცია აქვს. თვითღირებულებას რაც ქმნის, ფასი კატასტროფულად არის გაზრდილი აბსოლუტურად ყველა კომპონენტზე. ამ მდგომარეობაში კი პერსპექტივაც არ ჩანს, რომ ფასები შემცირდეს, ან დასტაბილურდეს. რასაც ვაკვირდები, მუდმივად მზარდია. ამიტომ, რამდენიმე კვირაში არა, ძალიან მალე, მოხდება ფასის ზრდა კვერცხზე და ქათმის ხორცზე და ეს გარდაუვალია. ვერაფრით გეტყვით რამდენი პროცენტით, რადგან ეს მართლა ბევრ რამეზეა დამოკიდებული, მათ შორის იმაზეც, ჩაერევა თუ არა მთავრობა. თუ ისევ მოხდა გასული წლის პრაქტიკის გამოყენება, როცა ხორბალი დასუბსიდირდა, ცხადია ეს ჩვენზეც აისახება, რადგან პურის წარმოების გარდა, მარცვლეულს ჩვენს ვიყენებთ. ამიტომ, ახლა ზუსტად რამის თქმა არ შემიძლია, მაგრამ ამ მოცემულობის დარჩენის შემთხვევაში, შეიძლება წლის ბოლომდე ფასის რამდენჯერმე გაზრდაც კი მოგვიწიოს,“-  ამბობს უჩუმბეგაშილი.

შეგახსენებთ, კვერცხის ადგილობრივი მწარმოებლები უახლოეს პერიოდში პროდუქტის 10-15%-ით გაძვირებას პროგნოზირებენ.

წყარო: ბიზნესპრესნიუსი