უკრაინის ცენტრალურმა ბანკს ომის დაწყებიდან 3 თვეზე მეტი ხნის შემდეგ რეფინანსირების განაკვეთის 10%-ით 25%-მდე ზრდა მოუწია. მარეგულირებლის გადაწყვეტილებაზე მაისში დაფიქსირებულმა 17%-იანმა ინფლაციამ იმოქმედა. ამის შესახებ ინფორმაციას Financial Times ავრცელებს.
ცენტრალური ბანკის მიერ გავრცელებულ განცხადებაში ნათქვამია, რომ გრივნის კურსის შენარჩუნებისა და ინფლაციის შეჩერების მიზნით საპროცენტო განაკვეთის მკვეთრი ზრდა აუცილებელი გახდა, რომელიც სიტუაციის დასტაბილურებისთანავე შემცირდება.
სამთავრობო ხარჯების ზრდის გამო, მაისში ბიუჯეტის დეფიციტი 27%-ით $7.7 მლრდ-მდე გაიზარდა, რამაც ვალუტაზე ზეწოლა გაზარდა. კურსის შესანარჩუნებლად კი მარტში $2 მლრდ-იანი და აპრილში $3.4 მლრდ-იანი სავალუტო ინტერვენცია არასაკმარისი აღმოჩნდა.
რუბლისგან განსხვავებით, რომლის კურსიც დოლართან მიმართებაში ინტერვენციის დაწყებიდან 1 კვირაში 80.0-დან 140.0-მდე გაიზარდა, გრივნა თითქმის არ გაუფასურებულა და თუ ომის დაწყებამდე აშშ დოლარი 28.4 გრივნა ღირდა, მას შემდეგ 30.3-იან ნიშნულს არასდროს გასცილებია და დღესაც კურსი 29.6-ს შეადგენს.
რუსეთმა მონეტარული პოლიტიკა ომის პირველივე დღეებში გაამკაცრა, რეფინანსირების განაკვეთი 9.5%-დან 20%-მდე გაზარდა, ვალუტის შესყიდვაზე 30%-იანი საკომისიო დააწესა, ექსპორტიორებს შემოსავლის 80%-ის რუბლი გადახურდავება დაავალდებულა და მოქალაქეებს თვეში საზღვარგარეთ გადარიცხვისთვის $5000-იანი ლიმიტი დაუწესა. უკრაინა მონეტარული პოლიტიკის გამკაცრების გზას ინტერვენციის დაწყებიდან 99-ე დღეს დაადგა.
ვალუტის კურსის შენარჩუნების მიუხედავად მსოფლიო ბანკი უკრაინაში წელს ეკონომიკის 45%-იან ვარდნას ელის და მის ომამდელ მაჩვენებლამდე აღდგენას მასშტაბური საერთაშორისო დახმარების გარეშე 10 წელზე მეტი დასჭირდება. გადაწყვეტილება ჯერ მიღებული არაა, თუმცა ქვეყნის ეკონომიკის აღდგენის ერთ-ერთ ვარიანტად რუსეთის გაყინული $300 მლრდ-იანი რეზერვის უკრაინისთვის გადაცემა განიხილება.