კრიპტოვალუტების ბაზარზე კრიზისია, ერთ დღეში ციფრული ვალუტის ფასი მთლიანობაში 7,5%-ით დაეცა. ყველაზე პოპულარული ბიტკოინი კი ბოლო ერთ კვირაში თითქმის 18%-ით გაუფასურდა და 17 ათას დოლარზე ქვემოთ ჩამოვიდა.

რამდენად უკავშირდება კრიზისი ბაზრის ერთ-ერთი მსხვილი მოთამაშის FTX-ის გაკოტრებას, კიდევ რა ფაქტორები ახდენს გავლენას კრიპტოინდუსტრიაზე, ამ თემებზე გადაცემა „ბიზნესპარტნიორში“ „კრიპტო ბაზრის“ დამფუძნებელმა ავთანდილ კუჭავამ ისაუბრა.

„კრიპტო ვალუტებზე ფასების ვარდნას ჩვენ ველოდებოდით უკვე ივნისის თვიდან, რადგან ეს ისტორიულად ვარდნის თვე არის კრიპტოვალუტების ბაზრისთვის. ყველა ფაქტორების გათვალისწინებით მოულოდნელი ნამდვილად არ ყოფილა ეს ვარდნა. 18%-იანი ვარდნა გამოწვეული პირველი Fed-ის გადაწყვეტილებით და მეორე ომის გამო, ასევე ნავთობის ბაზარზეა პრობლემა და ეს ყველაფერი აისახება კრიპტოვალუტების ბაზარზე. 

უმსხვილესი Binance-ის გადაწყვეტილება იყო FTX-ს შესყიდვა, თუმცა ღამით გამოქვეყნდა ინფორმაცია, რომ შეუძლებელია ამ დავალიანების ამოვსება, ამიტომ მან შესყიდვაზე უარი თქვა. FTX-ის გაკოტრებას მოკლევადიან პერიოდში უარყოფითი გავლენა ექნება ფასებზე, განსაკუთრებით მათივე პროდუქტებზე და იმათზე ვინც მათთან პარტნიორობაში იყვნენ, ბევრი ასეთი პროექტი შეიძლება გაკოტრდეს კიდეც. ეს მომავალში დააფიქრებს ადამიანებს ცენტრალიზებულ ბანკებში ან თუნდაც ბირჟებზე რამდენად ღირს თანხების შენახვა, რადგან არაფრით არ განსხვავდება არც Binance და არც FTX, თიბისი და საქართველოს ბანკისგან“, — აღნიშნავს კუჭავა.