2020 წლის ოქტომბერში ქვეყანაში შემოსული ფულადი გზავნილების ნაკადების მოცულობამ 181.7 მლნ აშშ დოლარი (584.8 მლნ ლარი) შეადგინა, რაც 18.6%-ით (28.5 მლნ აშშ დოლარით) მეტია 2019 წლის ოქტომბრის ანალოგიურ მაჩვენებელზე. ინფორმაციას ამის შესახებ საქართველოს ეროვნული ბანკი ავრცელებს.

კავკასიის უნივერსიტეტის ეკონომიკის სკოლის დეკანმა, სოსო ბერიკაშვილმა „კომერსანტთან“ საუბრისას განაცხადა, რომ ფულადი გზავნილების ზრდის ერთ-ერთი მიზეზი ისაა, რომ საქართველოს მოსახლეობას პანდემიის პერიოდში განსაკუთრებულად გაუჭირდა და ემიგრანტები ცდილობენ ხელმომჭირნედ იცხოვრონ, დაგროვილი თანხა კი ოჯახის წევრებს გამოუგზავნონ.

„ფულადი გზავნილების ზრდა მხოლოდ ბოლო თვეებში არ ყოფილა, წინა თვეებშიც უკვე კარგი დინამიკა გვქონდა, ვარდნა იყო მარტში და აპრილში, ამის შემდეგ უკვე მალევე გამოსწორდა ეს მაჩვენებელი. ზრდა შესაძლოა რამდენიმე ფაქტორს დავუკავშიროთ: 1. მიმოსვლა შეწყვეტილია და ამ თანხების რაღაც ნაწილი შეიძლება ადრე ქეშის სახით მოძრაობდა, ახლა კი ყველა თანხის გადარიცხვა ხდება; 2. გარდა ამისა, საქართველოში იმდენად მძიმე მდგომარეობაა, რომ ჩვენი ემიგრანტები ევროპაში ხელმომჭირნედ ცხოვრობენ და აქ ოჯახის წევრებს მეტ თანხას უგზავნიან, მათი დახმარება უფრო ბევრ ადამიანს დასჭირდა. თუმცა, გზავნილები ქართული ეკონომიკის ძალიან მნიშვნელოვანი ნაწილია და რეალურად ერთადერთი სფეროა სადაც ზრდა გვაქვს, რაც თავისთავად ჩვენი ქვეყნისთვის მაინც სასიხარულოა“, - განმარტავს სოსო ბერიკაშვილი.

ეკონომიკის ექსპერტი ნიკა შენგელია „კომერსანტთან“ აცხადებს, რომ ფულადი გზავნილების ასეთი დიდი რაოდენობით ზრდა, ქვეყანაში არსებულ მძიმე სოციალურ-ეკონომიკურ პრობლემებთანაა დაკავშირებული. მისი თქმით, როდესაც პანდემიის ფონზე სხვა ქვეყნებთან შედარებით საქართველოს მთავრობა მოსახლეობას არ ეხმარება და უმუშევრობა იზრდება, ემიგრანტები ცდილობენ ოჯახის წევრებისთვის მაქსიმალურად დიდი რაოდენობის თანხების გადმორიცხვას.

„ცხოვრება გაძვირდა, ამას უმშევრობის ზრდაც დაემატა, მოსახლეობამ შემოსავალი დაკარგა და ახლა ემიგრაციაში წასული ოჯახის წევრი შიმშილით ხომ არ დახოცავს აქ მყოფ ახლობლებს, ამიტომ უფრო მეტ თანხას უგზავნის. შესაბამისად, აშკარაა, რომ ფულადი გზავნილების ზრდა იმის მანიშნებელია, რომ ქვეყანაში დიდი გაჭირვება და უმუშევრობაა.

ფულადი გზავნილების ასეთი რეკორდულად მაღალი მაჩვენებელი არამარტო ახლა, არამედ წინა თვეებსიც იყო, ეს უბრალოდ იმის მაჩვენებელია, რომ ქვეყანაში გაჭირვებაა, რომელსაც მთავრობა არ აღიარებს და ემიგრანტები, რომლებიც უცხოეთში არიან, ზრდიან ამ ფულის მასას, რადგან ოჯახის წევრები თუ კიდევ ვინმე, სადმე მუშაობდა ყველა უმუშევარი დარჩა, ამიტომ მაქსიმალურად ცდილობენ რომ მათ ხელი შეუწყონ. ასევე არის ერთი საკითხი, პანდემიის მეორე ტალღა მსოფლიოში ოფიციალურად დაიწყო, რამდენად შეძლებენ ემიგრანტები რომ მომავალშიც გააგრძელონ ასეთი მხარდაჭერა, პროგნოზირება რთულია, ფაქტობრივად ხდება ისე, რომ მხოლოდ ხალხი ზრუნავს ერთმანეთზე და მთავრობა არაფერს აკეთებს“, - აცხადებს ნიკა შენგელია.

აღსანიშნავია, რომ ოქტომბერში ცალკეული ქვეყნების მიხედვით, ყველაზე მეტი თანხა - $35 მილიონი რუსეთიდან გადმოირიცხა, მეორე ადგილზე კი იტალიაა, საიდანაც საქართველოში $27 მილიონი შემოვიდა. მესამე ადგილზე კი 21.25 მილიონი დოლარით აშშ-ია.