ეკონომიკის ექსპერტი და ეკონომიკის ტრანსფორმაციის ცენტრის ხელმძღვანელი პრივატიზაციის არსებულ პრინციპს აკრიტიკებს. როგორც რამაზ გერლიანმა რადიო „კომერსანტის“ გადაცემაში „კომერსანტის დილა“ განაცხადა, სახელმწიფოს საყოველთაო პრივატიზაციის მოდელზე უნდა გადავიდეს.
„მეთოდი ფუნდამენტურად შესაცვლელია და ის საყოველთაო პრივატიზაციის მოდელზე უნდა გადავიდეს, წინააღმდეგ შემთხვევაში პრობლემა, რასაც კერძო საკუთრების ფორმირება ჰქვია, პრობლემად დარჩება. მეთოდი რომლითაც მთავრობა წლების განმავლობაში ხელმძღვანელობს პრივატიზაციის პროცესს დროში აფერხებს, სანამ ფულზე პრივატიზაცია მიმდინარეობს, იმ პირობებში, როდესაც მოსახლეობას ძირითადად საქართველოს რეზიდენტ სუბიექტებს დიდი ფინანსური რესურსი არ გააჩნიათ, ყოველთვის ამ შედეგზე აღმოვჩნდებით.
მნიშვნელოვანია, რომ დიდ აქტივებს გაუჩნდეს მესაკუთრე, ეს მესაკუთრე ეკონომიკურ ბრუნვაში ჩაებას და შექმნას ეკონომიკური სიკეთე, გაუჩინოს მოქალაქეებს შემოსავალი და მთლიანობაში ჩვენი ეკონომიკა გაზარდოს. ეს არის ყველაზე მთავარი და ეს პოტენციალი ყოველდღიურად იკარგება. რაც შეეხება პროგრამას 100 საინვესტიციო შეთავაზება ბიზნესს, ეს არის ზღვაში წვეთი, ამით მთავრობა ცდილობს იყოს პროაქტიული, თუმცა შედეგი გვაქვს ერთი და იგივე.“, - აღნიშნა რამაზ გერლიანმა.
მისი თქმით, საყოველთაო პრივატიზაციით მოხდება აქტივების კაპიტალიზაცია, რაც ნიშნავს იმას, რომ კერძო საკუთრების ხელში გადასულ აქტივს ღირებულება ედება და მოქალაქე მდიდრდება, რაც ზრდის ტრანზაქციებს, ხოლო ტრანზაქციების ზრდიდან სახელმწიფო იგებს.
თაკო კვაჭანტირაძე