„დიდი შვიდეულის (G7) ქვეყნები, რომლებიც ორდღიან სამიტს მართავენ გერმანიაში, 2027 წლისთვის აპირებენ 600 მილიარდი ევროს გამოყოფას განვითარებად ქვეყნებში ინფრასტრუქტურის განვითარებისთვის. ეს არის ინიციატივის ნაწილი, რომელიც მიზნად ისახავს ჩინეთის მრავალ ტრილიონ დოლარიანი პროექტისთვის სახელწოდებით, „ერთი სარტყელი, ერთი გზა“ წინააღმდეგობის გაწევას.
ამ თანხიდან 200 მილიარდი დოლარი აშშ-ზე მოდის, რომელიც სხვადასხვა ფონდებიდან გამოყოფს თანხას.
„ბავარიაში, ელმაუს სასახლეში შეკრებილი ყველა ლიდერი შეშფოთებულია გლობალური კრიზისით მზარდი ინფლაციის და ეკონომიკური ზრდის შენელების ფონზე, - განაცხადა მასპინძელი ქვეყნის, გერმანიის, კანცლერმა, ოლაფ შოლცმა, G7-ის სამიტის ფარგლებში.
თეთრი სახლის ვებგვერდზე გამოქვეყნებულ მემორანდუმში აღნიშნულია, რომ აშშ-ს პრეზიდენტი ჯო ბაიდენი და G7-ის სხვა ლიდერები იწყებენ ოფიციალურ პარტნიორობას, რომელიც გამოასწორებს განვითარებად ქვეყნებში ინფრასტრუქტურულ ხარვეზებს, გააძლიერებს გლობალურ ეკონომიკასა და მიწოდების ქსელებს, ასევე ხელს შეუწყობს ვაშინგტონის ეროვნული უსაფრთხოების ინტერესებს. დაფინანსება მიმართული იქნება კლიმატისა და ენერგეტიკული უსაფრთხოების, ციფრული კომუნიკაციების, ჯანდაცვისა და გენდერული თანასწორობის მიმართულებით.
ამასთან, შოლცი და ბაიდენი შეხვედრის დროს შეთანხმდნენ უკრაინისთვის სამხედრო დახმარების გაგრძელების შესახებ. როგორც Bloomberg-ისთვის გახდა ცნობილი, G7-ის დეკლარაციის პროექტში ნათქვამია, რომ მისი ლიდერები სამხედრო, ჰუმანიტარული, დიპლომატიურ დახმარებას გაუწევენ უკრაინას - რამდენადაც საჭირო იქნება.
G7-ში შედის დიდი ბრიტანეთი, გერმანია, იტალია, კანადა, საფრანგეთი, იაპონია და აშშ. შეხვედრაზე წელს ასევე მიწვეული არიან ინდონეზიის და ინდოეთის წარმომადგენლები დაგეგმილია, რომ ინდონეზიის პრეზიდენტი ჯოკო ვიდოდო რუსეთსა და უკრაინას ეწვევა. Reuters-ის ცნობით, ვიდოდო თავის მოგზაურობას „სამშვიდობო მისიას“ უწოდებს და აპირებს მოუწოდოს ორი ქვეყნის პრეზიდენტებს, გახსნან სივრცე დიალოგისთვის. ინდონეზიის პრეზიდენტი აზიის ქვეყნებიდან პირველი ლიდერია, რომელიც ეწვია რუსეთსა და უკრაინას საომარი მოქმედებების დაწყების შემდეგ.
https://www.radiotavisupleba.ge