რუსეთის ფედერაციის პრეზიდენტის სპიკერის პესკოვის განცხადებით, ნაკლებად სავარაუდოა, რომ უკრაინაში დაკავებული სახალხო დეპუტატი და პუტინის ნათლიმამა ვიქტორ მედვედჩუკი ,,აზოვსტალის“ ქარხნის დატყვევებულ დამცველებზე გაცვალონ.

,,ამაზე ლაპარაკი ძნელად შეიძლება, ეს სხვადასხვა კატეგორიებია“, - ასე გამოეხმაურა პესკოვი მედვედჩუკის „აზოვში“ გაცვლის შესაძლებლობას.

აღნიშნულთან დაკავშირებით განაცხადა რუსეთის საგერეო საქმეთა მინისტრის მოადგილემ ანდრეი რუდენკომაც, რომლის თქმითაც, ეს საკითხი მის კომპეტენციაში არ შედის, მაგრამ  სავარაუდოდ სადღაც განიხილება. თუმცა მას მედვედჩუკის სახელი ამ კონტექსტში არ უხსენებია.

ჟურნალისტის კითხვაზე, იგეგმება თუ არა „აზოვსტალის ქარხნიდან აყვანილი ტყვეების გაცვლასთან დაკავშირებით მოლაპარაკებების გამართვა, მან განაცხადა, რომ  უშვებს ყველანაირ შესაძლებლობას, რომელიც არ ეწინააღმდეგება საღ აზრს.

ცნობისთვის, უკრაინის უმაღლესი რადის დეპუტატი და პრორუსული პარტიის ოპოზიციური პლატფორმა - სიცოცხლისთვის - ლიდერი ვიქტორ მედვედჩუკი ბრალდებულია სახელმწიფო ღალატსა და ეროვნული რესურსების ძარცვის მცდელობაში, ასევე, ტერორისტული ორგანიზაციის საქმიანობაში დახმარებაში. მას 2021 წლის მაისიდან შინაპატიმრობა ჰქონდა შეფარდებული. მიმდინარე წლის თებერვლის ბოლოს მედვედჩუკი შინაპატიმრობიდან მიიმალა.

უკრაინის უშიშროების ცნობით, მედვედჩუკი ქვეყნის დატოვებას აპირებდა, როცა აპრილის თვეში იგი დააკავეს. პატიმრობაში მყოფმა მედვედჩუკმა მოგვიანებით მიმართვა გაავრცელა და უკრაინის და რუსეთის პრეზიდენტებს მიმართა თხოვნით, რომ მარიუპოლის დამცველებსა და იმ მოსახლეობაში გაცვალონ, რომელთაც ჰუმანიტარული დერეფნებით სარგებლობის საშუალება არ აქვთ.

მედვედჩუკს უკრაინული და დასავლური მედია რუსეთის პრეზიდენტ ვლადიმერ პუტინის უახლოეს მოკავშირედ ასახელებს. ვლადიმირ პუტინს მონათლული ჰყავს მედვედჩუკის უმცროსი შვილი დარია.