მასალა მომზადებულია 16 აპრილს — მანამ, სანამ საქართველოში სრულად აიკრძალებოდა მსუბუქი ავტომობილების მოძრაობა

15 დღე გავიდა მას შემდეგ, რაც ქვეყანაში „კომენდანტის საათია“ გამოცხადებული. კორონავირუსის გავრცელების შემდეგ, საქართველოს განსხვავებულ რეალობაში უწევს ცხოვრება. შეზღუდულია ეკონომიკური საქმიანობები, ათასობით ადამიანი სამსახურის გარეშე დარჩა. სერიოზული პრობლემების წინაშე აღმოჩნდნენ თვითდასაქმებული ადამიანები, რომელთა რაოდენობა ქვეყანაში არც ისე ცოტაა. დღეს, საქართველოში,  თვითდასაქმებულთა კატეგორიას 840 ათასი ადამიანი მიეკუთვნება.  თვითდასაქმებულები არიან ადამიანებიც, რომლებიც ტაქსაობით ირჩენენ თავს. დღესდღეობით საქართველოში საკუთარი ავტომობილის გარდა ტაქსი ერთადერთი ტრანსპორტია, რომლით გადაადგილებაც მოსახლეობას შეუძლია. „კომერსანტი“ დააინტერესა როგორია კორონავისურის გავლენა ტაქსის კომპანიებზე, როგორ შემცირდა მათი შემოსავლები და რამდენმა მძღოლმა შეწყვიტა მუშაობა.

ტაქსის გამოძახების სერვისს „მაქსიმის“ რეგიონალური დირექტორი თორნიკე კირკიტაძე აცხადებს, რომ  გადააგდილების შეზღუდვამ შეკვეთების 60 პროცენტიანი შემცირება გამოიწვია. მისი თქმით, ტაქსის გამოძახების სერვისი საქართველოს 9 ქალაქში მუშაობას ახორციელებს, და დასაქმებულია ათასობით ადამიანი. თორნიკე კირკიტაძე ამბობს, რომ ტაქსი „მაქსიმის“ მძღოლებს მუშაობა არ შეუწყვეტიათ.

„კორონავირუსის გამო ბევრმა სამსახურმა შეწყვიტა მუშაობა, ხალხი ძირითადად სახლშია და ნაკლებად გადაადგილდება, პლუს საღამოს 9-დან დილის 6 საათამდე ქუჩაში მოძრაობა აკრძალულია. ამ ყველაფერმა, რა თქმა უნდა, გავლენა იქონია ჩვენს სერვისზე და გამოძახების საერთო რაოდენობა შეიცვალა. ჩვენი კომპანია შემოსავლის სახით მხოლოდ საკომისიოს იღებს შესრულებული შეკვეთებიდან. გადააგდილების შეზღუდვამ გამოიწვია შეკვეთების შემცირებაც(50-60%), რაც განაპირობებს როგორც მძღოლების, ასევე კომპანიის შემოსავლების კლებასაც. თუმცა, გვაქვს სიახლეები: ჩვენ დავამატეთ ახალი სერვისი „მიტანა“ - ანუ მომხმარებლებს შეუძლიათ ისარგებლონ კურიერის მომსახურებით ან მიუთითონ ის, თუ რისი ყიდვაც სურთ, მძღოლი იყიდის საჭირო ნივთებს და მიუტანს მათ. ახალი ტარიფი უკვე საკმაო პოპულარობით სარგებლობს. ვემორჩილებით სახელმწიფოს მიერ დადგენილ რეგულაციებს და მუშაობას განვაგრძობთ იმ პირობებში, რა მოცემულობაც იქნება. შესაძლებელია, რეგულაციები კიდევ გამკაცრდეს, ან პირიქით, შესაბამისად ჩვენ ვიმოქმედებთ არსებული ვითარების გათვალისწინებთ“, - აცხადებს თორნიკე კირკიტაძე.

ტაქსის გამოძახების სერვისს „მაქსიმისგან“ განსხვავებულ მდგომარეობაზე საუბრობს „200-200“-ის დამფუძნებელი ნიკა ხოფერია. იგი აცხადებს, რომ მძღოლების დიდი რაოდენობა სამსახურში არ გადის, რადგან მნიშვნელოვნადაა შემცირებული გამოძახებების რაოდენობაც:

„ძალიან ბევრი ადამიანი არ გამოდის სამსახურში, დაახლოებით 30 პროცენტით ვმუშაობთ. გვიწვევს  ოპერატორების სახლში გაშვება, თუმცა ხელფასს გადავუხდით იქამდე, სანამდეც გვეყოფა ფინანსები, რასაკვირველია, მთლიანად ვერ ვურიცხავთ ანაზღაურებას.ძალიან მძიმე და ცუდი მდგომარეობაა. ვერანაირ გეგმას ვერ ვიმუშავებთ, მომხმარებელი თუ  არ იყო. 3 ლარის ნაცვლად თუ გინდა 50 თეთრად ატარე, რა მნიშვნელობა აქვს. დაახლოებით 70 პროცენტითაა შემცირებული გამოძახებების  რაოდენობა“, - განმარტავს ნიკა ხოფერია.

განახევრებული მძღოლების რაოდენობაზე საუბრობს კომპანია „ფენიქსის“ მენეჯერი გიორგი გელაშვილიც. მისი თქმით,საგრძნობლადაა შემცირებული გამოძახებების რაოდენობაც. კომპანია რომელიც ძირითადად კორპორაციული მიმართულებით მუშაობს და სასტუმროებს ემსახურება, სეროზული ფინანსური პრობლემების წინაშე დგას.

ბაჩო ადამია