აზარტული თამაშების კომპანიების ნაწილი პარლამენტის მიერ მიღებულ კანონს საკონსტიტუციო სასამართლოში გაასაჩივრებს. როგორც აზარტული თამაშების ასოციაციის ადმინისტრაციის უფროსი გიორგი მამულაიშვილი „კომერსანტთან“ აცხადებს, ბიზნესს სურს, რამდენიმე თვის წინ შემუშავებულ კანონპროექტში გარკვეული ცვლილებები შევიდეს.

„სარჩელს უახლოეს დღეებში შევიტანთ. გადასახადების 70%-მდე ზრდა არაკონსტიტუციურია. ამ შემთხვევაში უკვე გვაქვს კონკრეტულად ინვესტიციების დაცვის ხელშეკრულების პირდაპირი დარღვევა, რადგან ხელშეკრულება ითვალისწინებს, რომ გადასახადები არ უნდა გაიზარდოს. ჩვენ საგადასახადო წნეხი 40-დან 70%-მდე გაგვეზარდა. ვგულისხმობ იმ კომპანიებს, რომლებიც საქართველოს ბაზარზე ოპერირებენ და დიდ ბრიტანეთსა და შვედეთში რეგისტირებული კომპანიები არიან.

ბევრი ევროპული ქვეყანა მივიდა იმ შედეგამდე, რომ დაიწყო ადგილობრივი ოპერატორების ხელშეწყობა, რაც კარგად მოქმედებს იმაზე, რომ არალეგალური საიტები ვეღარ შედიან აღნიშნულ ბაზრებზე. მსგავსი სიტუაცია იყო ჩვენთანაც, საკმაოდ კარგად იყო აზარტული თამაშები განვითარებული, თუმცა შეზღუდვებმა ეს რადიკალურად შეცვალა და დღესდღეობით უცხოური ოპერატორები ბევრად კარგად არიან წარმოჩენილები საქართველოს ბაზარზე, თუნდაც სარეკლამო სივრცეში, რადგან საქართველოს ხელისუფლება მათ ვერ აკონტროლებს, რადგან არ ხვდებიან იმ იურისდიქციის ქვეშ, რომელ ვებ-გვერდებზეც ისინი არეკლამებენ თავის თავს, შეიქმნა ბევრი ახალი აპლიკაცია თუ ვებ-გვერდი. 

შემოსავლების სამსახურს აქვს მათი დაბლოკვის სურვილი, მაგრამ იმდენად სწრაფად ვითარდებიან ეს არალეგალური საიტები, რომ უბრალოდ მათი დაწევა ტექნოლოგიურ განვითარებაში ძალიან რთულია, ამან გამოიწვია თანხების გადინება და 2022 წლის ბოლოს საქართველოდან უცხოურ აზარტული თამაშების საიტებზე გადარიცხული თანხა 2 მილიარდს მიაღწევს. ამას დაემატა ის 970 000 ადამიანი, რომლებსაც შეეზღუდათ წვდომა, აქ არიან სოციალური სტატუსის მქონე, საჯარო სექტორში მომუშავე და 25 ასაკზე ქვემოთ მყოფი ადამიანები“, — ამბობს გიორგი მამულაიშვილი.

აზარტული თამაშების ასოციაციის ადმინისტრაციის უფროსის შეფასებით, დღეს მოქმედი კანონი არ მუშაობს, რამაც აზარტული თამაშების ინდუსტრია მოწესრიგებული ბიზნესიდან უწესრიგო ჩარჩოებში გადაიყვანა.

„დღესდღეობით თამაშდამოკიდებულთა სიაში დარეგისტრირდა 0.05 პროცენტი და ეს ძალიან მცირეა, აღმოჩნდა არც ისე ცუდად ყოფილა საქმე როგორც აქამდე საუბრობდენენ რომ თამაშდამოკიდებული ქვეყანა ვართ. ჩვენ მივიღეთ ის ფაქტი, რომ მოწესრიგებული ბიზნესი გადადის უწესრიგო ჩარჩოებში.

ჩვენი გათვლებით და იმ ინტენსივობით რითაც უცხოური არალეგალური საიტები შემოდიან ქართულ ბაზარზე, ისინი არადამკვიდრებულ გზას მიმართავენ, მათი მარჟა საკმაოდ მაღალია, რადგან დროებით მოგებაზე არიან ორიენტირებულნი. ეს გრძელვადიან პერსპექტივაში აუცილებლად იმოქმედებს ლარის კურსზეც. დღეს რჩება ერთ-ერთი ლოგიკური გზა, რომ მისცენ ადგილობრივ ოპერატორებს განვითარების შესაძლებლობა, თუნდაც რაღაცა დოზით რომ ხელი შეუშალონ უცხოური საიტების აქ განვითარებას“,— აღნიშნავს გიორგი მამულაიშვილი.

„აზარტული თამაშების რეგულირების ახალი კანონით“, რომელიც პარლამენტმა დაჩქარებული წესით დაამტკიცა, 2022 წლის 1-ელი იანვრიდან, სათამაშო ბიზნესის დასაბეგრი ბაზის  65-70%-ით ზრდას ითვალისწინებდა.

გარდა ამისა, 2022 წლის პირველი მარტიდან თამაშების ორგანიზატორი ვალდებულია:

• არ დაუშვას მოთამაშის მიერ სხვა მოთამაშის სათამაშო ანგარიშებზე თანხის გადარიცხვა, ან გადატანა;
  
• აზარტული და მომგებიანი თამაშების (გარდა წამახალისებელი გათამაშებისა) მოწყობის ადგილზე, მათ შორის, სისტემურ-ელექტრონული ფორმით მოწყობის შემთხვევაში, სათამაშოდ არ დაუშვას 25 წლამდე ასაკის საქართველოს მოქალაქე, 18 წლამდე ასაკის უცხო ქვეყნის მოქალაქე/მოქალაქეობის არმქონე პირი, დამოკიდებულ პირთა სიასა და აკრძალულ პირთა სიაში შეყვანილი პირები;
• აზარტული და მომგებიანი თამაშების (გარდა წამახალისებელი გათამაშებისა) სისტემურ-ელექტრონული ფორმით მოწყობის შემთხვევაში, მოთამაშის ვერიფიკაციის დღიდან ყოველწლიურად მოახდინოს პირის ხელახალი ვერიფიკაცია;
• თამაშების მოწყობის ადგილზე შესულ პირთა შესახებ ინფორმაციის აღრიცხვა უზრუნველყოს საქართველოს ფინანსთა მინისტრის მიერ დადგენილი წესის შესაბამისად.