2024 წლიდან საქართველოში ევრო5 ზე დაბალი სტანდარტის ავტომობილების იმპორტი შეიზღუდება. მთავრობის ეკონომიკური საბჭოს სხდომაზე განხილული ინიციატივა ჰაერში მავნე ნივთიერებების გაფრქვევის შემცირებას ისახავს მიზნად.

შეზღუდვის ამოქმედების შემთხვევაში საქართველოს ავტოიმპორტიორთა ასოციაცია ავტომობილებზე ფასის მატებას პროგნოზირებს. როგორც ასოციაციის ხელმძღვანელმა ლაშა დარბაისელმა რადიო „კომერსანტის“ დილის ეთერში განაცხადა, მსგავსი მკვეთრი ცვლილებისთვის მოსახლეობა მზად არაა.

„სუფთა ჰაერი აუცილებელია ჩვენთვისაც და ჩვენი შვილებისთვისაც. მაგრამ ეკონომიკური მდგომარეობის მიხედვით მოსახლეობა არ არის მზად ასეთი მკვეთრი ცვლილებებისთვის, რადგანაც რამდენიმე წლის უკან ავტოპარკის განახლების მიზნით აიწია და გაძვირდა განბაჟების აქციზი, ანუ რაც უფრო ძველია ავტომობილი, მით უფრო ძვირი ჯდება მისი განბაჟება. ჰიბრიდული ტიპის ავტომობილის განბაჟება ნაკლები გვიჯდება საწვავზე მომუშავე ავტომობილთან შედარებით. ამან მოგვცა ის, რომ დიდი რაოდენობით შემოვიდა ის ავტომობილები, რომელთა განბაჟებაც უფრო იაფი ჯდება. შესაბამისად ის რომ ავკრძალოთ და ასეთი მკაფიო ნაბიჯი გადავდგათ, ვფიქრობ არ იქნება მართებული. ქვეყნის მოსახლეობის უმეტესი წილი ვერ შეძლებს 2013 წლის ზევით ავტომობილების შეძენას. რეალურად ვისაც შესაძლებლობა აქვს, რომ შეიძინოს ახალი ავტომობილი, ისედაც შეიძენს, - განაცხადა ლაშა დარბაისელმა.

მისი თქმით, გაძვირდება არა მხოლოდ ავტომობილები, არამედ მეორადი ავტონაწილებიც.

„არამხოლოდ ავტოიმპორტიორი ზარალდება, არამედ მოსახლეობაც და ბიუჯეტიც. ადგილობრივ ბაზარზე გაძვირდება უკვე შემოყვანილი და განბაჟებული ავტომობილები. ამავდროულად დეფიციტი გაჩნდება და გაძვირდება მეორადი ავტონაწილები. მნიშვნელოვანი გაძვირება იქნება თუ ასეთი მკაფიო ნაბიჯი გადავდგით,“- აღნიშნა დარბაისელმა.

ავტოიმპორტიორთა ასოციაციის ხელმძღვანელის თქმით, ეს უარყოფითად აისახება ასევე ავტომობილების რეექსპორტზეც:

ძირითად შემთხვევაში ჩვენ დამოკიდებულები ვართ რეექსპორტზე და გატანით უფრო დაინტერესებულები ვართ ვიდრე ადგილობრივი ბაზრით, რადგანაც დიდი რაოდენობით ავტომობილები გადის, გვყავს პარტნიორები აზერბაიჯანი, სომხეთი, ყაზახეთი, ყირგიზეთი,

მაქვს კითხვა ამ აკრძალვის პირობებში რა მოხდება იმ შემთხვევაში, თუ ავტომობილი ჩამოვიდა საქართველოში და ვერ მოხერხდა 3 თვის განმავლობაში რეექსპორტი და იმპორტიორს უწევს 3 თვის ვადაში განბაჟება? ძალიან რთულ მდგომარეობაში აღმოჩნდებიან როგორც ავტოიმპორტიორები, ასევე ადგილობრივებიც, - განაცხადა დარბაისელმა.

2022 წლის ბოლოსათვის საქართველოში 1 563 200 ავტომობილი იყო რეგისტრირებული. ამის შესახებ სტატისტიკის ეროვნული სამსახურის მიერ გამოქვეყნებული მონაცემები ცხადყოფს.  მათივე მონაცემებით, საქართველოში არსებული 1 563 200 ავტომობილიდან 1 296 400 ანუ 82,9% 10 წელზე მეტი ასაკის არის. ამასთან, საქსტატის ცნობით, 24 100 ავტომობილი 2 წლის ან ნაკლები ასაკისაა; 35 600 2-5 წლამდე ასაკის; 200 000 ავტომობილი 5-10 წლამდე; ხოლო 7 200 ავტომობილის ასაკი უცნობია.