თბილისსა და რეგიონებში პურის ფასი მწარმოებლებს ფაქტობრივად ხელოვნურად უჭირავთ. ამის მიზეზი ხორბლის გაძვირებასთან ერთად, ენერგომატარებლების გაზრდილი ტარიფებია, რასაც ბიზნესი უკვე რთულად უმკლავდება. პურის მცხობელთა ასოციაციის ხელმძღვანელის მალხაზ დოლიძის ინფორმაციით, ენერგომატარებლები, რომლის წილიც პურის წარმოებაში 22%-ია, 1 წელიწადში 50%-ით არის გაზრდილი, რაც მეწარმეებისთვის დიდი ტვირთია და ფასის შენარჩუნების შესაძლებლობას თითქმის არ ტოვებს.
მიუხედავად ამ ნეგატიური მოცემულობისა, მალხაზ დოლიძე გადაჭრით ვერ ამბობს, გაძვირდება თუ არა პური. იმის გამო, რომ საქმე სოციალური პროდუქტის ფასს ეხება, მეწარმეები მაქსიმალურად ცდილობენ, რომ მომხმარებელს პური არ გაუძვირონ, თუმცა ამის შესაძლებლობა უკვე ნაკლებადაა.
,,იმპორტი გაძვირდა და ამან სერიოზული პრობლემა შექმნა, მთავრობა აღებულ კურსზე უარს არ ამბობს და მაქსიმალურად ცდილობს წისქვილკომბინატების მხარდაჭერას, რის გამოც ხორბლის იმპორტზე მეტი ორიენტირია, ფქვილისგან განსხვავებით. ამან ხარჯის საგრძნობი ზრდა გამოიწვია. დიდი პრობლემაა ენერგომატარებლებიც, სრულიად დამაბნეველი სიტუაციაა. განსაკუთრებით რეგიონებში გართულდა სიტუაცია. მეწარმეები მირეკავენ და მეუბნებიან, რომ ზოგ საცხობს სხვა ფასად აწვდიან ბუნებრივ არის, ზოგს - სხვა ფასად, ანუ უფრო ძვირად. ის არგუმენტი, რომ ეს „სოკარია“, ის „თბილისი ენერჯი“ და გადასახადი ამიტომაა სხვადასხვა, გაუგებრად მეჩვენება. შესაძლოა, მხედველობაში აქვთ ის სია, რომლითაც პურპროდუქტების საწარმოები სუბსიდირებაში იყვნენ მოქცეულნი, სულ სხვა თემაა, რადგან ეს საკითხი იყო ფქვილთან დაკავშირებული და არა ენერგომატარებლებთან. ბიზნესი ამხელა გადასახადის გადახდას ვერ შეძლებს, 50%-ით მატებაზეა საუბარი. ამიტომ გააქტიურდა პურის გაძვირების საკითხი, შეიძლება ითქვას, რომ დღეს მაჭარივით დუღს ეს სიტუაცია“, - აცხადებს მალხაზ დოლიძე ,,კომერსანტთან“.
პურის ფასთან დაკავშირებით საუბრობენ მწარმოებლები, თუმცა ამბობენ იმასაც, რომ ითვალისწინებენ მოსახლეობის მძიმე სოციალურ მდგომარეობას და პროდუქტის გაძვირებისგან ჯერჯერობით თავს იკავებენ.
კომპანია ,,თემქის პურის“ დირექტორის დალი კუპატაძის თქმით, ჯერჯერობით ფასს შეინარჩუნებენ, თუმცა მასიურად თუ გაძვირდა პროდუქტი, სავარაუდოდ, გარკვეული ზომების მიღება მოუწევთ.
,,2021 წელს 2-ჯერ გაძვირდა პური 10-10 თეთრით, ჩვენ ეს ტენდენცია მხოლოდ ერთხელ ავსახეთ და შემოდგომისას 10 თეთრით გავზარდეთ ფასი. ახლა მთავარია, ფქვილის ღირებულება შენარჩუნდეს, ყველაზე მგრძნობიარე თემაა პური, სოციალური პროდუქტია და მაქსიმალურად ვცდილობთ, რომ არ გაძვირდეს. თუმცა ხარჯი საკმაოდ გაზრდილია, ამ ეტაპზე ხელოვნურად გვიჭირავს ფასი. სანამ შეგვეძლება, საფასო პოლიტიკის გადახედვას არ ვაპირებთ, მაგრამ თუ მასიურად გააძვირებენ პურს, ალბათ შესაბამის გადაწყვეტილებას ჩვენც მივიღებთ. ჯერჯერობით კი კბილებით, მაგრამ მაინც გვიჭირავს ფასი“, - ამბობს დალი კუპატაძე ,,კომერსანტთან“.
შეგახსენებთ, რომ რუსეთში ხორბლის საექსპორტო გადასახადმა ისევ მოიმატა. 11 იანვრიდან მთავარი საექსპორტო მარცვლეულის გადასახადი ერთ ტონაზე 94.9 დოლარიდან 98.2 დოლარამდე გაიზარდა.
საექსპორტო გადასახადი მარცვლეულის საინდიკაციო ფასებით არის განპირობებული, რომელიც 1 ტონა ხორბალზე 340.4 დოლარს (1 კვირით ადრე 335.6 დოლარს), ქერზე - 308.2 დოლარს (1 კვირით ადრე 304.4 დოლარი), სიმინდზე კი 281.8 დოლარს (1 კვირით ადრე 283.6 დოლარი) შეადგენს.
მოგეხსენებათ, რომ საქართველოსთვის რუსეთი ხორბლის მთავარი მიმწოდებელი ქვეყანაა. მიმდინარე წლის 11 თვეში იმპორტირებული 352 576 ტონა ხორბლიდან 324 322 ტონა რუსეთიდან შემოტანილ ხორბალზე მოდის, რომლის ღირებულება 82.9 მლნ დოლარია.
მარი ჩიტაია