დიდმა ბრიტანეთმა მილიარდერების სულეიმან კერიმოვის, ანდრეი სკოჩისა და ვლადიმერ ევტუშენკოვის ნათესავებს სანქციები დაუწესა. გარდა ამისა, სანქციების ქვეშ მოექცნენ პუტინის ნათლიმამის ვიქტორ მედვედჩუკის მეუღლე, ასევე მილიარდერის ალიშერ უსმანოვის USM ჰოლდინგი და მასთან დაკავშირებული რამდენიმე სხვა კომპანია.

დიდმა ბრიტანეთმა გააფართოვა პერსონალური სანქციები რუსებისა და რუსული კომპანიების წინააღმდეგ, ამის შესახებ ნათქვამია ქვეყნის ხაზინის (ფინანსთა სამინისტროს) ფინანსური სანქციების გამოყენების ოფისის შეტყობინებაში, რომელსაც Forbes აქვეყნებს.

სიას რამდენიმე რუსი მილიარდერის ნათესავი დაემატა. კერძოდ, ეს არის ვლადიმერ სკოჩი, სახელმწიფო სათათბიროს დეპუტატისა და მილიარდერის ანდრეი სკოჩის მამა, ასევე მისი ქალიშვილი ვარვარა. ისინი პარლამენტარის აქტივების მეწილეები არიან (USM-ში წილი 30%-ია, ვნუკოვოს აეროპორტში - 61,5%). Forbes-მა ანდრეი სკოჩისა და მისი ოჯახის ქონება 2023 წელს 7,9 მილიარდ დოლარად შეაფასა (უმდიდრესი რუსების სიაში მე-20 ადგილი).

გარდა ამისა, სანქცირებული იქნა AFK Sistema-ს დამფუძნებლის ვლადიმერ ევტუშენკოვის მეუღლე (2023 წელს $1,7 მილიარდი, რეიტინგში 67-ე) ნატალია და ბიზნესმენის შვილები, ტატიანა და ფელიქს ევტუშენკოვები.

შეგახსენეთ, რომ 2022 წლის აპრილში Youtube-ზე გავრცელდა ჩანაწერი, რომელიც შესაძლოა ბიძინა ივანიშვილისა და სანქცირებული რუსი ოლიგარქის, ვლადიმირ ევტუშენკოვის საუბარს ასახავდეს.

სიაში ასევე მოხვდა ფედერაციის საბჭოს წევრის, მილიარდერი სულეიმან კერიმოვის ქალიშვილი ($10,5 მილიარდი 2023 წელს, რეიტინგში მე-13), გულნარა კერიმოვა. სანქციების სიას ვლადიმერ პუტინის ნათლიმამის ვიქტორ მედვედჩუკის მეუღლე ოქსანა მარჩენკოც დაემატა.

გარდა ამისა, უსმანოვის მიერ დაარსებული USM ჰოლდინგიც ბრიტანეთის სანქციების ქვეშ მოექცა. სანქციების დასაბუთებაში ნათქვამია, რომ USM-ს ეკუთვნის ან აკონტროლებს პირდაპირ ან არაპირდაპირ რუსეთის მთავრობის მხარდამჭერი ალიშერ უსმანოვი და რომ USM „აწარმოებს ბიზნესს რუსეთის მთავრობისთვის სტრატეგიული მნიშვნელობის სექტორებში, მათ შორის რუსეთის სამთო სექტორი და კომუნიკაციებისა და ციფრული ტექნოლოგიების სექტორი“. გარდა ამისა, სანქციების ქვეშ მოექცა კიდევ ორი ​​კომპანია, რომლებსაც დიდი ბრიტანეთის მთავრობა უსმანოვთან ასოცირებულად მიიჩნევს: Curzon Square Limited და Hanley Limited. მეოთხე კომპანია, Meritservus HC Limited, ბრიტანეთის მთავრობამ დაუკავშირა აბრამოვიჩს.

მთლიანობაში, გაერთიანებული სამეფოს სანქციების სიაში ახლა 1559 ფიზიკური და 184 იურიდიული პირია. დიდ ბრიტანეთში სანქცირებული პირების ქონება და ფინანსური სახსრები გაყინვას ექვემდებარება.