როდემდე გაგრძელდება ქვეყანაში უძრავი ქონების ფასის ზრდა? „არსის დამფუძნებელი  ირაკლი როსტომაშვილი აცხადებს, რომ ქვეყანაში უძრავ ქონებაზე მოთხოვნა და შესაბამისად ფასების ზრდა დამოკიდებული იქნება იმაზე, კიდევ შემოვლენ  და გააგრძელებენ თუ არა, რუსეთის მოქალაქეები ქვეყანაში უძრავი ქონების შეძენას.

„ფასების ზრდა დაიწყო იმის გამო, რომ  რუსეთის მოქალაქეები დიდი რაოდენობით შემოვიდნენ და უძრავი ქონების ყიდვა დაიწყეს. ეს  არ მომხდარა, ასე ვთქვათ, ობიექტური ეკონომიკური ზრდის გამო. მექანიკურად შემოვიდა, ვთქვათ, 10 ათასი კაცი ფულით და იყიდეს ბინები.

თუ შემოსვლის ტენდენცია გაგრძელდება, გაძვირდება და თუ არაფერი არ მოხდა, მაშინ ფასები არა მგონია, რომ გაძვირდეს.

ფასები დამოკიდებულია მოთხოვნა/მიწოდებაზე და შესაბამისად თუ მოთხოვნა გაიზრდება და რაოდენობა იქნება ნაკლები, ვინც მეტს გადაიხდის, ის იყიდის. ისე როგორც ახალ წელს გოჭი ხომ ძვირდება?!“, - განმარტავს როსტომაშვილი.

მისი თქმით, საქართველოში თუ პირობითად წლის განმავლობაში იყიდებოდა 3000 ახალი ბინა, რუსეთის მოქალაქეების აქტიური შემოსვლის ქონზე  2022 წელს გაიყიდა ორჯერ მეტი.  რაც შეეხება საქართველოს მოქალაქეებს, მათი მხრიდან უძრავი ქონების შეძენის სტატისტიკას დინამიკური ხასიათი აქვს. 

საქსტატის ინფორმაციით, 2022 წლის მეოთხე კვარტალში, წინა კვარტალთან შედარებით საცხოვრებელი უძრავი ქონების ფასების ინდექსი (RPPI) 5.5%-ით გაიზარდა, ხოლო ინდექსის წლიურმა ზრდამ 14.3% შეადგინა. 2020 წლის საშუალოსთან შედარებით ინდექსი 24.0%-ით არის გაზრდილი. RPPI-ის დაფარვა შემოიფარგლება ქ. თბილისით და მოიცავს მხოლოდ ახალი საცხოვრებელი უძრავი ქონების ბაზარს, როგორც მრავალსართულიანი სახლების (ბინების), ისე კერძო სახლების სეგმენტებს.

საცხოვრებელი უძრავი ქონების ფასების ინდექსი (RPPI) ასახავს საცხოვრებელი უძრავი ქონების ფასების დინამიკას. ინდექსი მოიცავს უძრავი ქონების ბაზრის ახალი აშენებული და მშენებარე საცხოვრებლების სეგმენტს, ქ.თბილისში.