ჯანდაცვის სამინისტრო მედიკამენტებზე რეფერენტული ფასის დაწესებაზე მუშაობს. როგორც დაანონსებულია რეგულაცია ძალაში 2023 წლიდან შევა. რას შეცვლის მომხმარებლისა და ბიზნესისთვის მედიკამენტებზე რეფერენტული ფასის დაწესება, ამ და სხვა თემებზე BMG TV - ის ეთერში პსპ-ს ადმინისტრაციულმა დირექტორმა მამუკა ბრეგვაძემ ისაუბრა. მისი თქმით, კონსულტაციების და რისკების გათვლის გარეშე სიახლის დანერგვამ შესაძლოა მედიკამენტების ბაზარზე დეფიციტი შექმნას და შავი ბაზარი გააქტიუროს.
„დიდი ხანია უკვე რეფერენტულ ფასებთან დაკავშირებით საუბარი მიდის. ამ ეტაპზე სამინისტროსთან კონკრეტულ საკითხებზე მსჯელობა არ გვქონია. თუმცა გაჟღერდა, რომ ბოლო ეტაპზე ფარმაცევტულ კომპანიებთან შეხვედრა გაიმართება, რათა კონსულტაციების რეჟიმში გავიაროთ კონკრეტული საკითხები და დეტალები.
დაანონსებულია, რომ რეგულაცია 2023 წლიდან უნდა ამოქმედდეს და რომელ თვეში ამოქმედდება ეს კონკრეტულად არ ვიცით. თუ პირველი თვიდან შემოვა, ვფიქრობ, რომ ორთვიანი საკონსულტაციო რეჟიმი ძალიან ცოტაა და მაშინ დაძაბულ რეჟიმში მოგვიწევს მუშაობა, რომ რაღაც შედეგებზე გავიდეთ“, - აღნიშნა მამუკა ბრეგვაძემ.
მამუკა ბრეგვაძემ რეფერენტული ფასების მოდელის დადებითი და უარყოფითი მხარეებიც განიხილა და განმარტა, რეგულაციის დადებითი მხარე სოციალური პროექტებია, რომელსაც ჯანდაცვის სამინისტრო ახორციელებს და პროექტის ფარგლებში კონკრეტულ მედიკამენტებზე ფასები დადგენილია. სადაც საწყის ეტაპზე 16 მედიკამენტი იყო თუმცა მისი რაოდენობა დღეს გაზრდილია. მისივე თქმით, დადებითი მხარე არის ის, რომ კონკრეტულ მედიკამენტზე სახელმწიფოს განსაზღვრული აქვს კონკრეტული ფასი და მომხმარებელი, რომელიც ქრონიკულად მოიხმარს და წამლის მიმართ მოწყვლადია ის დარწმუნებულია იმაში, რომ მისი ბიუჯეტი მომდევნო გარკვეული პერიოდის განმავლობაში გათვალისწინებული იქნება.
რაც შეეხება უარყოფით მხარეს ბრეგვაძის თქმით, რეფერენტულმა ფასმა შესაძლოა გარკვეულ წამლებზე დეფიციტი შექმნას, რადგან კონკრეტულ კომპანიას შეთავაზებული ფასით ოპერირება აღარ მოუნდეს და ბაზრიდან გავიდეს, მათ შორის ინოვაციური წარმოებები, ახალი მედიკამენტები და ახალი ფორმულები.
ბრეგვაძემ ასევე აღნიშნა, რომ წამლების მომწოდებლებთან მოლაპარაკებები ყოველდღიურ რეჟიმში მიმდინარეობს, შესაბამისად თუ ფარმაცევტულ კომპანიებს არ ექნებათ საკმარისი დრო ხარვეზები შეიქმნება.
„ეს ცოცხალი რეჟიმია, რაც ყოველდღიურად მიმდინარეობს. ჩვენ მოლაპარაკებები, მომწოდებელთან ყოველდღიურ რეჟიმში გვაქვს საუბარი, შეკვეთების გაკეთება და ა.შ. ეს არის ბიზნესის ციკლი. იმ შემთხვევაში თუ ჩვენ არ გვექნება საკმარისი დრო ხარვეზები იქნება, მომწოდებლებთან სასაუბროდ დრო არ დაგვრჩება. მიმდინარე მარაგები რაც არის იმ მარაგებზე როგორ გავრცელდება ეს რეფერენტული ფასები საკითხავია და არის რაღაც მცირე ნიუანსები, რაც ბიზნესს შეაფერხებს“, - აღნიშნა მამუკა ბრეგვაძემ.
თაკო კვაჭანტირაძე