ქვეყანაში კოვიდპანდემიის მეშვიდე ტალღა სექტემბრიდან დაიწყება — ამაზე სპეციალისტები რამდენიმე დღეა ღიად საუბრობენ. დაავადებათა კონტროლის ცენტრი უკვე გასცემს რეკომენდაციებს დახურულ სივრცეებში პირბადეების ტარებასთან დაკავშირებით, მოქალაქეებს კი მოუწოდებენ, გაიკეთონ ვაქცინის ბუსტერ დოზა. კლინიკებში კი, სადაც კოვიდპაციენტების მიღებას აგრძელებენ, აცხადებენ, რომ ასეთი დატვირთული კი არა, გადატვირთულები არიან.
სახელმწიფო პანდემიის კიდევ ერთ ტალღას სავარაუდოდ, ისევ მოუმზადებელი ხვდება. ბევრი არათანმიმდევრული გადაწყვეტილებების პარალელურად, გავიხსენოთ რამდენიმე თვის წინანდელი, ჯანდაცვის (იმ დროს ახალი) მინისტრის ზურაბ აზარაშვილის განცხადება, რომ „კოვიდკლინიკების უმრავლესობას სახელმწიფომ 2 წლის განმავლობაში 1 მილიარდ ლარზე მეტი ცარიელ საწოლებში გადაუხადა, რისი საჭიროებაც არ იყო“. საინტერესოა არა, რა ხდება დღეს? ეს საკითხი დღემდე პრაქტიკულად გამოუკვლეველია. მიუხედავად იმისა, რომ მინისტრმა, ინფექციების კონტროლის, ასევე ფინანსური თუ მკურნალობის პროტოკოლების შესრულების კუთხით მიმდინარე მონიტორინგის შედეგების გასაჯაროვების, კონკრეტული კლინიკების დასახელების და ცალკეული პირების პასუხისმგებლობის საკითხის პირობა დადო, მორიგი ტალღის მართვა ისევ მათ ევალებათ.
ეკატერინე ტიკარაძეც გავიხსენოთ, რომელსაც პანდემიის მართვის პროცესში არსებული ხარვეზების, დაშვებული სისტემური შეცდომების, ვაქცინაციის კამპანიის ჩავარდნისა და კოვიდით გარდაცვალების იმ სტატისტიკის გამო, რომლითაც საქართველო მსოფლიოში მოწინავე ადგილებს იკავებდა, ხშირად აკრიტიკებდნენ. მაგალითად, ტიკარაძემ ბოლო სამუშაო დღეს, ჯანდაცვის სამინისტროში სამწლიანი საქმიანობის შეჯამებისას, Covid-19-ით „მაღალი სიკვდილიანობაში“, პასუხისმგებლობა ჰოსპიტალურ სექტორს გადაუნაწილა და თქვა, რომ „პაციენტები უფრო ხშირად კვდებიან არა კოვიდით, არამედ ჰოსპიტალური ინფექციით“.
რა ხდება დღეს, ისევ მილიარდების გაფლანგვისკენ მივდივართ? ახლა კლინიკები უფრო მზად არიან, მოწესრიგებულები და პრობლემები აღარ არის?
ჯანდაცვის სფეროს ექსპერტი ვატო სურგულაძე „კომერსანტთან“ ამბობს, რომ მაშინ როდესაც მინისტრი ერთი მილიარდის გაფლანგვაზე საუბრობს და მტკიცებულება არ აქვს, უფრო მეტიც მორიგ პიკთან საბრძოლველად იმავე ჯგუფს ტოვებს, ბევრ კითხვას ბადებს.
„პანდემია არ დამარცხებულა და პიკს სექტემბერში აუცილებლად მიაღწევს, ამ სიტუაციიდან გამომდინარე რაც საქართველოში ხდება, ვგულისხმობ აცრის გაკეთების უგულებელჰყოფას, მაშინ რდესაც მხოლოდ ეს არის ერთადერთი გამოსავალი თავი დავაღწიოთ ვირუსის აღმასვლას. რაც შეეხება პანდემიის მართვას, როდესაც მინისტრი ამბობს, რომ სახელმწიფომ მილიარდი დახარჯა და ეს თანხა არამიზნობრივად გამოიყენეს, კონკრეტულად უნდა დაასახელოს თუ ვინ დახარჯა და ამაზე სერიოზული მოკვლევა უნდა დაიწყოს. მილიარდი თითქმის მთელი საქართველოს ჯანდაცვის ბიუჯეტია და ამ რაოდენობაზეა საუბარი. გამოვიდა, რომ ვიღაცამ სახელმწიფოს თანხა დახარჯა, მინისტრმაც კი ეს იცის და მტკიცებულება არ არსებობს, ეს რბილად რომ ვთქვათ ძალიან არასერიოზულია და ბევრ კითხვას ბადებს.
რაც შეეხება კონკრეტულ თემას, რატომაც ტიკარაძეს ედავებიან გაფლანგვას ანუ ცარიელ საწოლებში თანხის გადახდას, ჩემი აზრით, ეს იყო ერთადერთი სწორი გადაწყვეტილება კოვიდის დროს, რომ კლინიკებს ეარსებათ და არ განეცადათ გაკოტრება.
ერთ-ერთი ყველაზე ჩამორჩენილი ქვეყანა ვართ ვაქცინაციაში, შესაბამისად ჩვენ აუცილებლად გვექნება პრობლემები, გარდა იმისა, რომ საუბარია თითქოს მარტივი შტამია. არავინ ცდილობს ვაქცინაციის რეალურ პოპულარიზაციას, უფრო მეტიც პრემიერი გამოდის და ამბობს, რომ ვაქცინაცია არ შველის, არადა თავის დროზე ამაში ხომ ფული გადაიხადა სახელმწიფომ და ბოლოს გაუფუჭდათ. ესეც გამოსაკვლევი თემაა, ესეც გაფლანგვაა. რეალურად რა მივიღეთ მე-7 ტალღის წინ? ჯანდაცვას მართავს იგივე ხალხი, თითქოს მინისტრი შეეცვალათ, მაგრამ ამით ფუნდამენტურად არაფერი შეცვლილა, უფრო მეტიც მგონი თვითონ აცრილი არც არის. მოსვლისთანავე მინისტრმაც დაადასტურა, რომ პანდემია ცუდად იმართებოდა და ბევრი ფული უმიზნოდ გაიფლანგა, თუმცა აქ დასრულდა ეს საკითხი“, — ამბობს ვატო სურგულაძე.
„კომერსანტი“ ცდილობს ჯანდაცვის სამინისტროში გაარკვიოს თუ რა ეტაპზეა „მილიარდის გაფლანგვის“ საქმის მოკვლევა და რა ბერკეტი შეიმუშავა ამ დროის განმავლობაში უწყებამ იმისთვის, რომ პანდემიის მოსალოდნელ პიკთან ბრძოლის დროს, მსგავსი კორუფციის ფაქტები აღარ დაფიქსირდეს.
ნინო თამაზაშვილი