2022 წლის ბიუჯეტი შესაძლოა დაკორექტირდეს. პროექტს მთავრობა სავარაუდოდ შემოდგომაზევწარმოადგენს. როგორც პარლამენტის საფინანსო-საბიუჯეტო კომიტეტის თავმჯდომარემ ირაკლი კოვზანაძემ BMG TV-ის ეთერში განაცხადა, ერთ-ერთი მთავარი საკითხი, რაც შეიძლება შეიცვალოს არის მიმდინარე წლის ეკონომიკური ზრდის პროგნოზი, რაც ამჟამად 6%-ით არის განსაზღვრული და ის ფინანსთა სამინისტრომ შეიძლება 7%-მდე გაზარდოს.
არ გამოვრიცხავ იმას, რომ შემოდგომაზე შემოვიდეს ბიუჯეტი გაზრდის კუთხით და არის ვარიანტები, რომ იყოს 7% და უფრო მაღალი მაჩვენებელი, თუმცა მე უფრო ფრთხილი ვიქნები ამ თვალსაზრისით, რადგან ეს მათი პრეროგატივაა, - განაცხადა ირაკლი კოვზანაძემ.
ფინანსთა სამინისტროს ინფორმაციით, 2022 წლის პირველ ნახევარში სახელმწიფო ბიუჯეტში გადასახადების სახით 9.1 მილიარდი ლარი შევიდა, რაც გეგმის 103% იყო. გაზრდილი შემოსავალი მომატებულ ეკონომიკურ აქტივობას უკავშირდებოდა.
ეკონომიკური ზრდის პროგნოზი რომ გადაიხედება ამას სებ-ის პრეზიდენტიც ადასტურებს.
„ჩვენ მაკროეკონომიკური მაჩვენებლების განახლებას გავაკეთებთ მონეტარული პოლიტიკის კომიტეტის სხდომაზე აგვისტოს დასაწყისში. იმ შედეგებიდან გამომდინარე, რაც აქამდე გვაქვს და ეკონომიკური ზრდის პროგნოზი, დიდი ალბათობით, გაზრდის მიმართულებით გადაიხედება. რაც შეეხება ინფლაციას, ვაანალიზებთ იმ ინფორმაციას, რასაც ვიღებთ. აქაც ბევრი ცვლილებები ხდება. ამ ეტაპზე, ის პროგნოზი, რომელიც გვაქვს, თუნდაც ინფლაციასთან დაკავშირებით, იგივეა, ეს არის საშუალოდ 8,5-9%, წლის ბოლოს 9,5%. თუმცა, იქიდან გამომდინარე, რომ დროის მოკლე მონაკვეთში ბევრი ცვლილება ხდება, რთული სათქმელია, განახლება როგორ მოხდება“, - განაცხადა ივლისის დასაწყისში კობა გვენეტაძემ.
ცნობისთვის, 2022 წლის მაისში საქართველოს ეკონომიკა 11.6%-ით გაიზარდა, მიმდინარე წლის 5 თვეში კი ზრდამ 11.2% შეადგინა. საქსტატის მონაცემებით, მაღალი ტემპით იზრდება კერძო სექტორის ბრუნვა, რამაც მაისში 10,2 მილიარდი ლარი შეადგინა, რაც წინა წელთან შედარებით 25%-ით მეტია.