შპს „საქართველოს სალიზინგო კომპანია“ სამეთვალყურეო საბჭოს გადაწყვეტილებით წყვეტს ახალი ლიზინგების გაცემას და შეეცდება მოიძიოს სახსრები ინვესტორების მიმართ ნაკისრი ვალდებულებების სრულად და დროულად დასაფარად.

„იმისთვის რომ მაქსიმალურად განეიტრალებული იქნას ინვესტორებზე რაიმე ტიპის უარყოფითი ზეგავლენა  ან მოლოდინები, კომპანია ადასტურებს, რომ მოიძიებს საჭირო სახსრებს ნაკისრი ვალდებულებების სრულად და დროულად დასაფარად. დამატებით, ობლიგაციების მფლობელების მხრიდან სურვილის გამოხატვის შემთხვევაში ემიტენტი მათ სთავაზობს ობლიგაციების ვადამდე განაღდებას შემდეგი პირობით:

• ემიტენტი ნაადრევად გამოსყიდვასთან დაკავირებით განაცხადებს მიიღებს 2023 წლის 15 აპრილიდან 15 მაისის ჩათვლით  და განაცხადის მიღებიდან 3 სამუშაო დღის მანძილზე უზრუნველყოფს ინვეტორებისგან მიღებული მოთხოვნის შესაბამისად დაკმაყოფილებას;
• გამოსყიდვა განხორციელდება განაცხადის მიღების თარიღისთვის ძირითადი თანხის (ნომინალის) 100%-სა და დარიცხული საპროცენტო სარგებლის გადახდით;
• განაცხადის წარდგენა უნდა განხორციელდეს „გალთ ენდ თაგარტთან“ ელ.ფოსტაზე“, — აღნიშნულია განცხადებაში, რომელსაც ხელს „საქართველოს სალიზინგო კომპანიის“ გენერალური დირექტორი მადონა ბაიდოშვილი აწერს.

საქართველოს სალიზინგო კომპანიას 2021 წლის 29 ივნისს გამოშვებული აქვს 12 მლნ დოლარის და 3 მლნ ევროს არაუზრუნველყოფილი და არასუბორდინებული ობლიგაციები.

კომპანია 2001 წელს დააარსა „თბილუნივერსალბანკმა“ და პირველი ქართული კომპანია იყო, რომელმაც ლიზინგის მომსახურების სახით მსურველებს დაფინანსების ალტერნატიული წყარო შესთავაზა სესხებისგან განსხვავებით. 2005 წელს ის საქართველოს ბანკის შვილობილი კომპანია გახდა ორი ბანკის შერწყმის შედეგად. 2015 წლის აგვისტოში, რეორგანიზაციის შედეგად, სს „ბიჯი ფაინენშელი“ გამოეყო სს საქართველოს ბანკს და შპს საქართველოს სალიზინგო კომპანიის 100% -იანი წილის მფლობელი გახდა. 2017 წლის ივნისში კომპანიის 100% წილი სს „საქართველოს ბანკმა“ გადაიფორმა.

„კომერსანტი“ აგრძელებს თემაზე მუშაობას და უფრო მეტ დეტალს მკითხველს კომპანიასთან დაკავშირების შემდეგ გააცნობს.