აფხაზეთში პენსიის სიდიდეს მოქალაქეობა განსაზღვრავს. სიმბოლურ პენსიას 24 ლარის ოდენობით გალის მოსახლეობა იღებს. ყველაზე მაღალი  სარგებელი აქვთ იმ მოქალაქეებს, რომლებიც რუსულ პასპორტებს ფლობენ. პენსიის მოცულობა ამ კატეგორიის აფხაზეთის მოქალაქეებისთვის 5334 რუბლს იღებენ, რაც ქართულ ვალუტაში 266 ლარს შეადგენს. ადგილობრივი პენსიის მოცულობა კი 1500 რუბლს ანუ 75 ლარს უდრის. სტაჟისა და დამსახურების მიხედვით, ხანდაზმულობის პენსიის დანამატი 200 რუბლია.

,,აფხაზეთის ექსპერტთა წრის ანალიტიკოსის ირაკლი ცქიტიშვილის თქმით, ასეთ სარგებელს გალის მოსახლეობა თითქმის მასიურად მოკლებულია. აფხაზეთის დე ფაქტო რესპუბლიკაში ეს რაიონი პენსიით ყველაზე ნაკლებად უზრუნველყოფილია. პენსიონრების უმრავლესობას იქ თვეში 8 დოლარზე მეტი არ ერიცხება. დღევანდელი კურსით ეს არის 24 ლარი და 10 თეთრი. ესეც მრავალწლიანი წყვეტის შემდეგ, რადგან აფხაზეთის მთავრობის მიერ სხვადასხვა წლებში მიღებული გადაწყვეტილებების გამო გალელებს რამდენიმე წლის საპენსიო დავალიანება საერთოდ დაეკარგათ. 

როგორც აფხაზეთის ექსპერტთა წრეში აცხადებენ, გალის მოსახლეობისთვის განკუთვნილი პენსია მხოლოდ ფორმალობის გამო გაიცემა და ამ ხალხის მატერიალურ მდგომარეობაზე ოდნავადაც არ აისახება.

,,მიზერული პენსიაა, პენსიონერისთვის იგი 2 დღის საკვები ხარჯისთვისაც არასაკმარისია. წარმოდგენა არ მაქვს, როგორ უნდა გაძლონ ადამიანებმა, უმძიმესი ვითარებაა. ნაკლებად მოსალოდნელია, რომ უახლოესი წლების განმავლობაში სიტუაცია შეიცვალოს, თუმცა რუსული პენსიის მიმღები მოქალაქეებისთვის თანხა მომავალშიც მნიშვნელოვნად მოიმატებს. ეს კი ბევრ ადგილობრივს წაახალისებს, რომ რუსეთის მოქალაქეობა მიიღონ, - აცხადებს ირაკლი ცქიტიშვილი და დასძენს, რომ აფხაზეთში მცხოვრებლების დიდი ნაწილი რუსულ პასპორტს ატარებს. რეგიონში სულ  50 ათასამდე ასაკით პენსიონერი ცხოვრობს, აქედან მხოლოდ გალში დაახლოებით  6 400, რომელთაგან 130 ადამიანი რუსული პენსიის მიმღებია.

გარდა გალისა, ყველა სხვა რაიონის პენსიონერები 2015 წლიდან დღემდე ყოველთვიურად იღებენ აფხაზურ პენსიაზე დარიცხვას 1000 რუბლის ოდენობით.

მარი ჩიტაია