გასული ორი წლის განმავლობაში მსოფლიოში არსებულმა კორონა ვირუსულმა ინფექციამ არაერთი ადამიანის დღის წესრიგი შეცვალა. ამ ცვლილების ასახვა კანონმდებლობაშიც გახდა აუცილებელი. 2020 და 2021 წელს საქართველოში ჩატარებული ერთიანი ეროვნული გამოცდების მარეგულირებელი აქტებშიც აისახა ამ ვირუსის მქონე აბიტურიენტების ძირითად გამოცდებსა და მათთვის დამატებით საგამოცდო სესიებზე დაშვების წესი. 2021 წელს აიკრძალა „გამოცდებზე მონაწილეობისთვის რეგისტრირებული პირი, რომელსაც დადასტურებული აქვს COVID-19-ის ინფექცია, უფლებამოსილი არ არის, გამოცდაზე გავიდეს დიაგნოზის დადასტურებიდან 14-დღიანი ვადის გასვლამდე.“
აღნიშნულ რეგულაციასთან დაკავშირებული მნიშვნელოვანი სასამართლო პრეცედენტი, რომელიც კომერსანტისთვის გახდა ცნობილი, განვითარდა შემდეგნაირად: აბიტურიენტი 2021 წლის 6 ივლისს დაგეგმილ ინგლისური ენის საგამოცდო სესიაზე ვერ გამოცხადდა კორონავირუსული ინფექციისთვის მახასიათებელი რიგი სიმპტომების გამო, როგორიცაა ტემპერატურის მატება, საერთო სისუსტე, მშრალი შეტევითი ხველა. აღნიშნული გამოწვეული იყო ერთის მხრივ აბიტურიენტის ფიზიკური მდგომარეობის, ხოლო მეორეს მხრივ, მაღალი საზოგადოებრივი პასუხისმგებლობის გამო, ვინაიდან აღნიშნული სიმპტომებით ფიზიკური თავშეყრის ადგილზე გამოცხადება, არაერთი სხვა აბიტურიენტის დაინფიცირების რისკებს მკვეთრად ზრდიდა.
ექიმის მითითებით, აბიტურიენტმა სიმპტომების გამოვლენიდან მეორე დღეს ჩაიტარა SARS COV AG ტესტი, რომლითაც დადასტურდა ინფექციის არსებობა. ამავე დღეს აბიტურიენტმა მოითხოვა დაშვება ეროვნული გამოცდების დამატებით სესიაზე. მას განუმარტეს, რომ წესის შესაბამისად, დამატებით გამოცდაზე დაიშვებიან ის აბიტურიენტები, რომელთაც უშუალოდ გამოცდის დღეს ჰქონდათ დადასტურებული ინფექცია. ვინაიდან, აბიტურიენტს დაუდასტურდა ვირუსი გამოცდის მეორე დღეს, მას უარი ეთქვა გამოცდაზე მონაწილეობის უფლებაზე.
აბიტურიენტმა მიმართა სასამართლოს და მოითხოვა დამატებით სესიაზე დაშვების უფლება. სასამართლოს მყისიერი ჩარევით, იგი დაშვებული იქნა დამატებით სესიაზე, რომელიც წარმატებით ჩააბარა და რამდენიმე კვირაში სტუდენტის სტატუსიც მოიპოვა. ამის მიუხედავად, გამოცდების ცენტრი აგრძელებდა დავას და საქმის არსებითი განხილვაც აუცილებელი გახდა.
სასამართლო სხდომაზე აბიტურიენტის ადვოკატი ნინო ლიპარტია, ადასტურებდა გამოცდების ცენტრის მიერ აბიტურიენტის მიმართ უკანონო მოქმედების არსებობას. მისი მითითებით, დადგენილი წესის ცენტრის მიერ განმარტებული იქნა ძალიან ვიწროდ, რითაც ირღვეოდა აბიტურიენტის განათლების უფლება.
სასამართლომ გაიზიარა აბიტურიენტის მოთხოვნა და გამოცდების ცენტრის ქმედება უკანონოდ მიიჩნია. მან ხაზი გაუსვა დადგენილი რეგულირების წესის განმარტების აუცილებლობაზე, მიუთითა განათლების უფლების მოქმედების კონსტიტუციურ ფარგლებზე და სახელმწიფოს ვალდებულებაზე უზრუნველყოს აღნიშნული სამართლებრივი სიკეთის ჯეროვანი რეალიზების საკითხი.
სასამართლომ ბათილად ცნო კორონავირუსით ინფიცირებული აბიტურიენტის მიმართ დამატებით გამოცდაზე დაშვების საკითხთან დაკავშირებული ცენტრის უარი. აბიტურიენტმა, რომელმაც სასამართლოს ჩართულობითა და დახმარებით მოიპოვა სტუდენტის სტატუსი, უკვე წარმატებით წარმატებით აგრძელებს საუნივერსიტეტო სწავლების მეორე სემესტრს.
გამოცდების ეროვნული ცენტრი
