ქართველი ეკონომისტები პოზიტიურად აფასებენ საქართველოს მიმდინარე ეკონომიკურ მდგომარეობას. როგორც PMC RC-ის მიერ ჩატარებული კვლევიდან ხდება ცნობილი, მიუხედავად მათი დადებითი შეფასებისა მათი მოლოდინი საქართველოში მომდევნო ექვსი თვის ეკონომიკური მდგომარეობის მიმართ უარყოფითია.

„გამოკითხულ ეკონომისტთა მხოლოდ 17% აფასებს დადებითად საქართველოს მთავრობის გადაწყვეტილებას, რომ ანაკლიის ღრმაწყლოვანი პორტის ნაწილი სახელმწიფო საკუთრებაში იქნება (ამჟამინდელი გეგმის მიხედვით, სახელმწიფო საკუთრებაში იქნება პორტის 51%-ს, დანარჩენი კი უცხოელ პარტნიორებს გადაეცემათ ტენდერის გზით). გამოკითხულთა 28% კი გადაწყვეტილებას უარყოფითად ან ძალიან უარყოფითად აფასებს“, - აღნიშნულია PMC RC-ის კვლევაში.

გამოკითხულთა მესამედი (33%) ფიქრობს, რომ „ხედვა 2030 - საქართველოს განვითარების სტრატეგია“ ნაწილობრივ პასუხობს საქართველოს წინაშე არსებულ გამოწვევებსა და პრობლემებს. არც ერთი რესპონდენტი არ ფიქრობს, რომ სტრატეგია პრობლემებს სრულად პასუხობს.

საქართველოს ევროკავშირის კანონმდებლობასთან შესაბამისობის შესახებ ევროკომისიის ანალიტიკური ანგარიშის გაცნობის შემდეგ, გამოკითხულ ეკონომისტთა უმეტესობა (75%) ფიქრობს, რომ გარემოს და კლიმატის პოლიტიკის გაუმჯობესება ევროკავშირის კანონმდებლობასთან შესაბამისობაში იქნება რთული ან ძალიან რთული.

ქართველი ეკონომისტების გამოკითხვის თანახმად, 2023 წლის პირველ კვარტალში ქართველი ეკონომისტები დადებითად აფასებენ საქართველოს მიმდინარე ეკონომიკურ მდგომარეობას. მათი შეფასება ოდნავ გაუარესდა 2022 წლის მეოთხე კვარტლის დადებით შეფასებასთან შედარებით, მაგრამ მნიშვნელოვნად გაუმჯობესდა 2022 წლის პირველი კვარტლის ნეგატიურ შეფასებასთან შედარებით.

გამოკითხული ეკონომისტების მოლოდინი საქართველოში მომდევნო ექვსი თვის ეკონომიკური მდგომარეობის მიმართ უარყოფითია. მოლოდინი ოდნავ გაუმჯობესდა იმ ნეგატიურ პროგნოზთან შედარებით, რომელიც ეკონომისტებს მომდევნო ექვსი თვის მიმართ ჰქონდათ 2022 წლის მეოთხე კვარტალში და საგრძნობლად გაუმჯობესდა 2022 წლის პირველ კვარტალთან შედარებით.