მე მძულს ჩარჩოები, იარლიყები და ვერ ვიტან, როცა იარლიყებს მაკრავენ და ჩარჩოებში მაქცევენ. საზოგადოებას, ინტერნეტს და მსოფლიოს ზოგადად უყვარს ამის კეთება იმიტომ, რომ თავს ასე უსაფრთხოდ გრძნობენ, - წერს BALENCIAGA-ს კრეატიული დირექტორი დემნა.
მისი თქმით, ადამიანს უნდა გააჩნდეს გამბედაობა და სიმტკიცე იმისთვის, რომ მიიღოს საკუთარი იდენტობა და იყოს ის, ვინც არის.
„ყოველი დღე იქცევა ბრძოლის ველად საკუთარი იდენტობის დასაცავად და რაც უფრო მეტად ცდილობ, იყო შენი თავი, უფრო მეტად "გხვდება სახეში". მაგრამ როგორი დიდებულია, ვიყოთ ერთმანეთისგან განსხვავებულები.
გამოწვევაა, დარტყმების შემდეგ გააგრძელო სვლა იმისკენ, ვინც რეალურად ხარ. მოდას ყველაფერზე მეტად ჩარჩოები და იარლიყები უყვარს. მდიდრული, არამდიდრული, ქუჩის მოდა, მაღალი მოდა, კარგი, ცუდი, პოპულარული, ხმაურიანი - ყველაფერი ერთი და იგივეა, ვის ადარდებს. მდიდრული მოდის ჩადება გაპრიალებულ, ექსკლუზიურ და ვიზუალურად ძვირადღირებულ ყუთში შეზღუდული და საკმაოდ ძველმოდურია.
მოდაში ინდივიდუალიზმი ჩამოქვეითებულია ფსევდოტენდენციებამდე, რომელიც ნაკარნახევია იმ მომენტისთვის ზოგიერთი ცნობილი ადამიანის მიერ "სთორიში" გაზიარებული პოსტებით.
გადავწყვიტე, აღარ ავხსნა ჩემი კოლექციები და დიზაინები სიტყვიერად, არამედ გამოვხატო გონების მდგომარეობა. მოდა არის ვიზუალური ხელოვნება და მისი სხვისი თვალით დანახვაა საჭირო. საუკეთესო შემთხვევაში მოდას არ უნდა სჭირდებოდეს "სთორი" იმისთვის, რომ ვინმეზე გაიყიდოს. შენ ის ან მოგწონს, ან არა. ამ შოუს სცენა სიმართლის ძიების მეტაფორაა. მოდით, ყველას მივცეთ საშუალება, იყვნენ ისინი, ვინც არიან და დავკავდეთ სიყვარულით და არა ომით“, — წერს დირექტორი დემნა.
შეგახსენებთ, რომ პარიზში BALENCIAGA-მ მოდის კვირეულის ფარგლებში 2023 წლის ზაფხულის კოლექციის ჩვენება გამართა.
აღსანიშნავია ისიც, რომ თბილისის მერმა კახა კალაძემ დიზაინერ დემნა გვასალიას გუშინ საპატიო თბილისელის წოდება მიანიჭა. კალაძის თქმით, დემნამ საქართველოს სახელი გაუთქვა და მოხსნა ყველანაირი ჩარჩო და სტანდარტი მოდის ინდუსტრიაში.
"თბილისის საპატიო მოქალაქის წოდება ენიჭება ადამიანს, რომელმაც ძალიან დიდი სახელი გაუთქვა ჩვენს ქვეყანას. ადამიანს, რომელმაც მთელ მსოფლიოს დაუმტკიცა, რომ ქართველები ვართ უნიჭიერესი ხალხი, ქართველები ვართ ადამიანები, ვისაც ბევრი რამ შეგვიძლია.
ადამიანი, რომელმაც მოხსნა ყველანაირი ჩარჩო და სტანდარტი მოდის ინდუსტრიაში. შეიძლება პირდაპირ ითქვას, რომ ნამდვილი რევოლუცია მოახდინა. დემნა მოდის სახლის, ბალენსიაგას კრეატიული დირექტორია, სხვადასხვა წლებში მუშაობდა სხვადასხვა მოდის სახლებში და უნდა აღინიშნოს, რომ არის ამერიკის მოდის დიზაინერთა საბჭოს ჯილდოს მფლობელი.
დემნა დღეს თბილისში არ იმყოფება, ვერ მოახერხა ჩამოსვლა, იმიტომ, რომ პარიზის მოდის კვირეული იმართება, მინდა მას წარმატებები ვუსურვო. მე მექნება შესაძლებლობა, მომდევნო დღეების განმავლობაში საპატიო თბილისელის წოდება, ჯილდო ოფიციალურად გადავცე პირადად მას", - თქვა კალაძემ.
გამოყენებულია "ფორმულა ნიუსის" მასალები
დემნა გვასალია
