„გამოწვევების მიუხედავად, 2022 წელს 30%-იანი წლიური ზრდა გვქონდა“, — ამის შესახებ „კომერსანტთან“ ანდრო ხუხუნაშვილმა,  სადაზღვევო კომპანია „ირაოს“ გაყიდვებისა და მარკეტინგის დირექტორმა, გასული წლის შეჯამებისას აღნიშნა.

მისი თქმით, გამოწვევების მიუხედავად კომპანია მომხმარებლებისთვის სერვისების მიწოდებას შეუფერხებლად ახორციელებდა.

„2022 წელი საკმაოდ რთული და ამავდროულად პროდუქტიული იყო. პირველი და მნიშვნელოვანი, რაც მინდა აღვნიშნო, არის ის, რომ კომპანიამ უკვე ნოემბერში შეძლო ყველა ფინანსური პარამეტრის მიღწევა, რაც ალბათ ყველაზე მნიშვნელოვანია ფინანსური ინსტიტუტისთვის. წლის განმავლობაში შევძელით, რომ უწყვეტად მიგვეწოდებინა სერვისები ჩვენი დაზღვეულებისთვის, ამას მინდა ხაზი გაუსვა, რადგან წლის დასაწყისში ომიკრონის დიდმა ტალღამ გადაუარა მთელ ქვეყანას, ეს ძალიან რთული პერიოდი იყო, თუმცა შეფერხების გარეშე ვმუშაობდით. მთელი წლის განმავლობაში რა რაოდენობის ზარებსაც ვღებულობთ ხოლმე მომხმარებლისგან, ერთი თვის განმავლობაში მივიღეთ, რაც კოლოსალური ოდენობაა. ამას მოჰყვა ორნიშნა ინფლაცია, ფასების და სერვისების გაძვირება, რამაც გაართულა სიტუაცია, თუმცა მიუხედავად გამოწვევებისა შევძელით, რომ 30%-იანი წლიური ზრდა დაგვეფიქსირებინა, რაც ბოლო პერიოდში ჩვენთვის ტრადიციად იქცა. ეს ნიშნული არსებული ბაზრის საშუალო ზრდას თითქმის ორჯერ აღემატება. 

სექტორი გამოირჩევა კონკურენციით, თუმცა ვთვლით, რომ ერთ-ერთი ძლიერი კომპანია ვართ ბაზარზე, უდიდესი გამოცდილებით. წელს სრულად დავასრულეთ სერვისების გაციფრულება, ჩვენ დაზღვეულებს შეუძლიათ ყველაფერი დისტანციურად მიიღონ“, — აღნიშნა ანდრო ხუხუნაშვილმა.

მისი თქმით, კომპანიას 2023 წელს ამბიციური გეგმები აქვს. „ირაო“ მომხმარებლისთვის სერვისების უფრო სწრაფ და შეუფერხებელ მიწოდებაზე იმუშავებს.