„2018 წლის შემდეგ დადგენილი ტარიფების გადახედვა აღარ მომხდარა და განმეორებითი ტექინსპექტირების საფასური არ დადგენილა. ვფიქრობ, ეს ამ მომენტისთვის სწორი გადაწყვეტილებაა“, - ამის შესახებ რადიო „კომერსანტის“ დილის ეთერში ტექინსპექტირების ცენტრების კავშირის თავმჯდომარემ გიორგი შიოლაშვილმა ისაუბრა. მისი თქმით, დღეისთვის ტექინსპექტირების ცენტრებისთვის გარკვეული მომსახურება გაძვირებულია და ადრე დადგენილი ტარიფებით ოპერირება აღარ შეეძლოთ.
„ჩვენ მოვიკვლიეთ ევროკავშირის ქვეყნები და ყველგან განმეორებითი ტექინსპექტირება არის ფასიანი, აქედან გამომდინარე, ჩვენ გვქონდა კონსულტაციები და საბოლოოდ გადაწყვეტილება იქნა მიღებული, რის მიხედვითაც მსუბუქ და მისაბმელიან ავტომობილებზე, რომლებზედაც პირველადი ტექინსპექტირების საფასური 60 ლარს შეადგენს, განმეორებით ტექინსპექტირების საფასური 20 ლარით, ხოლო სატვირთო ავტომობილებსა და ავტობუსებზე, რომელზედაც პირველადი ტექინსპექტირების საფასური 100 ლარს შეადგენს, მეორადი ტექინსპექტირების საფასური 30 ლარით განისაზღვრა.
ამ ეტაპზე შემოღებულია მხოლოდ განმეორებითი ინსპექტირების საფასური, მომავალში კონსულტაციები გაგრძელდება. იმ მოცემულობაში, სადაც ტესტირების ცენტრებში მიმართვიანობა 50%-ია, სერვისის ადეკვატურად განხორციელება საკმაოდ უჭირთ. მათ უნდა ჰყავდეთ შესაბამისად მომზადებული პერსონალი, უნდა შეინახონ გამზომი საშუალებები, რომელთა მოვლა და დაკალიბრება საკმაოდ დიდ ხარჯებთან არის დაკავშირებული, აქედან გამომდინარე, ვფიქრობ, რომ განმეორებით ინსპექტირების საფასური მდგომარეობას გამოასწორებს“, - აღნიშნა გიორგი შიოლაშვილმა.
შიოლაშვილი ამბობს, რომ მაშინ როდესაც განმეორებით ინსპექტირება იყო უფასო, ავტომფლობელები ინსპექტირების ცენტრებს გარკვეული დიაგნოსტიკისთვის მიმართავდნენ ისე, რომ წინასწარ არ ამოწმებდნენ ისეთ მარტივ პარამეტრებს, როგორიცაა მაშუქი ფარები, რადგან იცოდნენ, რომ ტექინსპექტირება იყო უფასო და შემდგომში სერვისს უფასოდ იღებდნენ.
„იმ შემთხვევაში თუ განმეორებითი ტექინსპექტირება იქნება ფასიანი, ვფიქრობ რომ ეს ავტომფლობელებს უფრო მობილიზებულებს გახდის. დღეს გვაქვს მოცემულობა, რომ ტექინსპექტირების პროცენტი კლებულობს, თავდაპირველად ეს იყო 60% და დღეის მდგომარეობით 40-35% ია, განმეორებით ტექინსპექტირების ტენდენციაც კლებადია. ვფიქრობ, რომ ქვეყანაში არსებული ავტოპარკი გაუმჯობესებისკენ მიდის.
წლევანდელი სტატისტიკა დაახლოებით იგივეა, რაც იყო შარშან, სადღაც 50% ის ფარგლებშია მიმართვიანობა, დაახლოებით ანალოგიური სურათი იყო 2021 წელსაც. მოსალოდნელი ცვლილებები, მათ შორის ის, რომ მკაცრდება ტექინსპექტირების გაუვლელობაზე ჯარიმები, ვფიქრობ ტექდათვალიერების ცენტრებში ავტომობილების მიმართვიანობას გაზრდის. პირველადი ჯარიმის შემთხვევაში ჯარიმა უცვლელია და 50 ლარი დარჩება, თუმცა ყოველი შემდგომი დაჯარიმება იქნება ზრდადი 150, 300, და 500 ლარი და ა. შ. ეს ჩაკეტავს იმ პრაქტიკას, როდესაც ავტომფლობელებს ერჩივნათ 50 ლარიანი ჯარიმა გადაეხადათ და მანქანა ტექინსპექტირების ცენტრებში არ მიეყვანათ“, - აღნიშნა გიორგი შიოლაშვილმა.