ოთხი წლის წინ ჩამონგრეული მეტროსადგურ „ვარკეთილის“ რეაბილიტაცია სავარაუდოდ უახლოეს მომავალში დაიწყება. მეორედ, გაორმაგებული ფასით გამოცხადებული ტენდერში მონაწილეობა მხოლოდ ერთმა კომპანია „მამისონმა“ მიიღო.

15 მარტს გამოცხადებული შესყიდვის სავარაუდო ღირებულება 13 666 967 ლარი იყო, სამშენებლო კომპანიის შეთავაზებულმა თანხამ კი 906 967 ლარით ნაკლები 12 760 000 ლარი შეადგინა. ტენდერს ახლა შერჩევა-შეფასების სტატუსი აქვს .

აღსანიშნავია, რომ ვარკეთილის მეტროს რეაბილიტაციაზე ტენდერი მიმდინარე წლის იანვარში გამოცხადდა, მაშინ სახელმწიფო შესყიდვის ღირებულება 7 057 389 ლარი იყო. თბილისის სატრანსპორტო კომპანიაში განაცხადეს, რომ ახალი ფასი ბაზრის კვლევის ჩატარების შემდეგ გამოიკვეთა. შესყიდვის ღირებულების გაზრდის მიზეზად კი ინფლაციის დონის რეკორდული ტემპით ზრდა დაასახელეს.

შეგახსენებთ, რომ სატენდერო დოკუმენტების მიხედვით, დაგეგმილია მეტროსადგურის საზოგადოებრივი სივრცეების ინტერიერის რეკონსტრუქცია. ბუნებრივი ქვით მოპირკეთებული იატაკი  კერამიკული ფილებით იცვლება. ასევე კერამიკული ფილებით შეიცვლება კედლებზე გაკრული ქვის საფარი. მოხდება ბაქნისა და ესკალატორების გვირაბის აზბესტის ჭერის დემონტაჟი. სამუშაოები ითვალისწინებს თანამედროვე მასალებით ჭერის, ე.წ. დამცავი ქოლგის მოწყობას. პროექტის ფარგლებში დაგეგმილია განათებისა და შიდა სავენტილაციო სისტემის მოწყობა. ასევე კედლებზე განთავსდება საათი, ხოლო ქვედა დარბაზში დაიდგმება ნახევარწრის ფორმის სკამები.

განმარტებით ბარათის მიხედვით ირკვევა, რომ ინტერიერის დიზაინ-კონცეფცია წარმოადგენს 1960-იანი წლებისთვის დამახასიათებელი იდეების თანამედროვე გადამუშავებას, რაც საშუალებას იძლევა შეიქმნას ინდივიდუალიზებული სივრცე მრავალფეროვანი გეომეტრიული წყობისა და მოულოდნელი არაკლასიკური ფერთა შეხამების გამოყენებით.

მეტროსადგურის რეაბილიტაცია დავით ნარმანიას მერობის დროს დაიწყო და 2017 წლის სექტემბერში დასრულდა.  ხუთ თვეში, 2018 წლის 30 იანვარს, ბაქანზე ჭერი ჩამოინგრა, რა დროსაც 4 ადამიანი დაშავდა. 4 წელზე მეტია რაც მეტროსადგურ „ვარკეთილის“ მოსაცდელი ბაქანი რკინის კონსტრუქციის ამარაა დარჩენილი. ჭერის ჩამონგრევის შემდეგ მეტროში დღემდე არაფერი შეცვლილა. აღსანიშნავია, რომ კითხვაზე — 2017 წელს განხორციელდა თუ არა „ვარკეთილის“ მეტრო სადგურის რეაბილიტაცია მოქმედი კანონმდებლობის შესაბამისად, ამ დრომდე პასუხისმგებელი უწყებებისგან მოსახლეობას პასუხი არ მიუღია.

ბაჩო ადამია