„გამოვრიცხავ, რომ ახალი აეროპორტის გახსნამ თბილისი, ბათუმის ან ქუთაისი მგზავრთა შემოდინება-გადინებაზე უარყოფით გავლენა იქონიოს“, - ასე აფასებს ავიაციის სფეროს ექსპერტი იასე ზაუტაშვილი, ბათუმიდან 80 კმ - ში, შავ ზღვაზე ახალი აეროპორტის გახსნას. იგი რიზე-ართვინის აეროპორტს საქართველოს აეროპორტების პირდაპირ კონკურენტად არ განიხილავს და ამბობს, რომ ახალი აეროპორტი მათ მუშაობას ხელს არ შეუშლის:

„ჩემი აზრით, არავითარი მგზავრნაკადის დაკარგვას ადგილი არ ექნება, რაც უფრო მეტი ტრაფიკი მოიყრის რეგიონულ მასშტაბში მით მეტი არჩევანი იქნება ე.წ. Point to Point რეისების მიმართულებით. ქუთაისიდან ძირითადად დაბალბიუჯეტიანი ავიაკომპანიები დაფრინავენ და მათ წარმოდგენილ მარშრუტებს ხელს არ შეუშლის. ჩვენ ხომ არ გვაქვს საუბარი, რომ ქუთაისიდან, თბილისიდან ან ბათუმიდან, რომელიმე ეროვნული კომპანია ახორციელებს თურქეთის ან სხვა ქვეყნის გავლით ევროპაში მგზავრების გაყვანას. მე არ მგონია ამან ხელი შეუშალოს იმ მგზავრთნაკადის გადინებას საქართველოდან. თუკი იქნება შიდა მიმართულებები იგივე რიზეს მხრიდან, მაგალითად ბოდრუმი ან ანკარას მიმართულებით, რომელიც ჩვენ არ გვაქვს, შეიძლება მგზავრს მიეცეს ალტერნატივის საშუალება გადავიდეს თურქეთში სახმელეთო გზით და იქიდან გააგრძელოს თავისი მარშრუტი“, - განმარტავს იასე ზაუტაშვილი.

ავიაციის სფეროს ექსპერტი „კომერსანტთან“ საუბარში აცხადებს, რომ რიზე-ართვინის აეროპორტი საქართველოში მგზავრნაკადის არ შეამცირებს. მისი განმარტებით, გაცილებით დიდი პრობლემა ინფრასტრუქტურა და მომსახურების სფეროა, რა დროსაც სექტორი ქვეყანაში შემოსულ ტურისტებს მაღალი სტანდარტით ვერ ემსახურება:

„ტურისტების შემოდინების კუთხით შეიძლება ითქვას ნაკადი სახეზეა. სეზონი არ დაწყებულა, მაგრამ ჩვენს ქვეყანაში ბევრი უცხოელია შემოსული და ივლისსა და აგვისტოში უფრო მეტი შემოვა, შედეგად ავიაკომპანიებსაც ძალიან მჭიდრო გრაფიკი ექნებათ. მე პრობლემას ვხედავ მოწესრიგებულ ინფრასტრუქტურაში - დაწყებული აეროპორტებით, დამთავრებული კვების ობიექტებითა და გიდებით. მომსახურების სერვისი დეფიციტს განიცდის და სტანდარტი არც თუ ისე მაღალია, რამაც შეიძლება გარკვეულწილად უარყოფითი ეფექტი იქონიოს ტურისტების კმაყოფილებაზე. სხვა მხრივ მათ არანაირი შეზღუდვა არ ექნებათ, მთავარია საქართველომ შეძლოს შესაბამისი ინფრასტრუქტურით უზრუნველყოს ტურისტების შემოდინების ნორმალური გრაფიკი - წარმოიდგინეთ, ერთდროულად ბათუმის 4-5 რეისი რომ მოფრინდეს შეიძლება სრული კოლაფსი მოხდეს, იგივე შეიძლება განმეორდეს ქუთაისის აეროპორტშიც კი. გახსოვთ ალბათ, რამდენიმე წლის წინ Maroon 5-ის კონცერტის შემდეგ ბათუმში სრული კოლაფსი იყო. ქალაქში მოსვენების საშუალება არავის მიეცა. ამიტომ ჩვენ ინფრასტრუქტურის უზრუნველყოფაზე უნდა ვიფიქროთ ვიდრე, მგზავრთნაკადის შემცირებაც. ტურისტები საკმარისად შემოდიოდა პანდემიამდე და  უკვე იანვარ-აპრილში 69 პროცენტით არის ტურიზმი აღდგენილი. მილიონობით ადამიანის შემოყვანას და გამასპინძლებას სჭირდება თავისი სტანდარტი და პირობები. გვყავს თუ არა საკმარისი ტექნიკური პერსონალი, გიდი, თარჯიმანი, მიმტანი თუ ა.შ. ისე არ უნდა მოხდეს რომ ტურისტს მეორედ ჩამოსვლის სურვილი გაუქრეს. სწორედ ესაა მთავარი ამოცანა“, - განმარტავს იასე ზაუტაშვილი.

business-partner.ge