„პირველ შეხვედრაზე რომ მივედი, შოკში ვიყავი, გარდაცვლილი ადამიანის საქმეს განხილავდნენ, ზოგიერთი საბჭოს წევრისგან ისეთი დამოკიდებულება იყო, თითქოს არაფერი ხდებოდა“ - ასე შესახებ საქართველოს ჯანდაცვის მინისტრმა ზურაბ აზარაშვილმა ექიმებისა და კლინიკების გადაცდომებზე საუბრის განაცხადა.  „აიპრესისთვის“ მიცემულ ინტერვიუში ის ამბობს, რომ პაციენტის გარდაცვალების შემთხვევებში, სადაც ექიმის ბრალეულობა იკვეთება, სათანადო რეაგირება არ ხდება. თუმცა, მინისტრმა თქვა ისიც, რომ ძალიან ხშირად არის შემთხვევები, როდესაც ექიმის ბრალეულობა არ იკვეთება. ვრცელ ინტერვიუში, ზურაბ აზარაშვილი ყურადღებას პროფესიული განვითარების საბჭოს მუშაობაზე ამახვილებს და აცხადებს, რომ უწყებას მუშაობის პრობლემა აქვს.

„პირველ შეხვედრაზე საბჭოში რომ მივედი, შოკში ვიყავი, ანუ განხილვა იყო გარდაცვლილი ადამიანის საქმის და დამოკიდებულება იქ ზოგიერთი საბჭოს წევრისგან იცით როგორი იყო? თითქოს არაფერი ხდებოდა.  რაღაც ალბათობები მოჰქონდათ… თითქოს ჩვეულებრივი მოვლენა იყო ის, რომ ოპერაცია არასწორად გაუკეთეს ადამიანს და მერე გარდაიცვალა და ეს ხდება ხოლმე. ეს დამოკიდებულებაა შესაცვლელი. ზუსტად ასეთი დამოკიდებულება გვაძლევს უხარისხო დამოკიდებულებას კლინიკებში და ხშირ შემთხვევებში, გარდაცვალებას.

სამწუხაროდ, ყველა პრობლემა იქიდან მოდის, რომ ბოლო წლების განმავლობაში მოსახლეობას, ექიმების მიმართ ცოტა ნდობა აქვს დაკარგული. ნებისმიერ პრობლემას, რაც შეიძლება დაკავშირებული იყოს პაციენტთან, აბრალებენ ექიმს. ზოგიერთ შემთხვევაში მართლაც არის ექიმის ბრალეულობა, მაგრამ არა ყოველთვის, როგორც სურთ რომ წარმოაჩინონ.

იმ შემთხვევების ობიექტურად შეფასება უნდა მოხდეს, სადაც ექიმის ბრალეულობა იკვეთება, რამაც პაციენტი გარდაცვალებამდე მიიყვანა.  გეტყვით, რომ არ ხდება სათანადო რეაგირება. აქ აღმოვაჩინეთ, რომ გვქონია პროფესიული საბჭო. „აღმოვაჩინეთ“-ს იმიტომ ვამბობ, რომ პრაქტიკულად მუშაობის პრობლემა აქვთ უწყებაში.

ამ საბჭოს საიდან მივაგენით… აღმოჩნდა, რომ სამედიცინოს როდესაც ამთავრებენ, მერე კვალიფიკაციის გამოცდაა, რომელსაც აქ აბარებენ. ასევე როდესაც უცხოეთში მოღვაწეობს ექიმი, თუნდაც ქართველი და იგივე პროფილით უნდა საქართველოში დაბრუნება, მუშაობა კონკრეტული პროფილის ასოციაციები უნდა შეიკრიბონ და ასე ვთქვათ, ამათ მისცენ იმ ექიმს „კურთხევა“, რომ აქ საქმიანობა დაიწყოს. თითქმის 99% შემთხვევაში, ეუბნებიან უარს. სინამდვილეში რა ხდება? იქიდან რომ ჩამოვა კვალიფიციური სპეციალისტი და აქ მისცემენ საქართველოში მუშაობის უფლებას, უჩნდებათ კონკურენტი. ამიტომ ეს პროცესი არასწორად არის მოწყობილი.

შეიძლება საკონსულტაციოდ ვესაუბრო ასოციაციებსაც, სხვა კომპეტენტურ ხალხსაც, მაგრამ, საბოლოო გადაწყვეტილება რეგულირების სააგენტოს რომ ვახსენებთ, უნდა იყოს ამათზე.

ძალიან მარტივად და ადამიანურ ენაზე რომ აგიხსნათ, ახლა „კოკა-კოლასთვის“ რომ გვეკითხა „პეპსი“ შემოგვეშვა თუ არა საქართველოში დაგვიდასტურებდა?! დიდი ალბათობით  – არა. ამ პროცესის მოწყობა გვინდა ისე, რომ სამართლიანი და ობიექტური გავხადოთ, ობიექტურად რომ მოხდეს ექიმის შეფასება, კვალიფიკაციით და არა იმით რომ ვიღაცის კონკურენტი გახდება“, - განაცხადა ზურაბ აზარაშვილმა.