ფინანსთა სამინისტროს მიერ წარმოდგენილი „საქართველოს 2021 წლის სახელმწიფო ბიუჯეტის შესრულების 9 თვის მიმოხილვა“ მოისმინეს დღეს გარემოს დაცვისა და ბუნებრივი რესურსებისა და აგრარულ საკითხთა კომიტეტების ერთობლივ სხდომაზე. ინფორმაციას პარლამენტის პრესსამსახური ავრცელებს.

საქართველოს ფინანსთა მინისტრის პირველმა მოადგილემ, გიორგი კაკაურიძემ აღნიშნა, რომ 2021 წლის ცხრა თვის მთლიანი შიდა პროდუქტის საშუალო რეალურმა ზრდამ 11.3 % შეადგინა.

მომხსენებლის თქმით, სწორედ ამიტომ 2022 წლის ბიუჯეტის გადამუშავებულ ვარიანტში წარმოდგენილი იქნება განახლებული პროგნოზი, რომელიც ითვალისწინებს 10%-იანი ეკონომიკური ზრდის მიღებას.

მომხსენებელმა რამდენიმე სამინისტროს ბიუჯეტის შესრულების პარამეტრები წარადგინა, მათ შორის ჯანდაცვის სამინისტრო, სადაც 4 მილიარდ 610 მლნ ლარია ათვისებული და 98%-ია შესრულების მაჩვენებელი. განათლების და კულტურის სამინისტრო, რომლებიც მიმდინარე წლის ბიუჯეტში ერთად არის გათვალისწინებული და ამ მიმართულებით 99% ანუ 1 მილიარდ 631 მლნ ლარამდეა ათვისებული; რეგიონული განვითარებისა და ინფრასტრუქტურის სამინისტრომ 1 მილიარდ 676 მილიონი ლარზე მეტი ხარჯი გაწია და ამან დაგეგმილი ბიუჯეტის 104% შეადგინა. მათ შორის გარემოს დაცვითი კუთხით მყარი ნარჩენების მართვის პროგრამაზე მიიმართა 24,2 მლნ ლარი და შესრულების მაჩვენებელი 102,7%- ია.

გიორგი კაკაურიძემ განსაკუთრებით გაამახვილა ყურადღება გარემოს დაცვისა და სოფლის მეურნეობის სამინისტროზე, რომლისთვისაც გაწეული ხარჯი 9 თვეში 447,8 მლნ ლარს შეადგენს და 96,5% -ია ჯამური შესრულების მაჩვენებელი.

მომხსენებელმა, დარგობრივი კომიტეტების ინტერესიდან გამომდინარე ამ მიმართულებით განხორციელებული პროგრამების შესრულებისა და მათზე გაწეული გეგმიური ხარჯების შესრულების თაობაზე უფრო დეტალური ინფორმაცია წარადგინა. როგორიცაა, სურსათის უვნებლობის კუთხით, მევენახეობა-მეღვინეობის განვითარების, სამეცნიერო კვლევების ხელშეწყობისთვის, ერთიანი აგროკრედიტის ფარგლებში გაწეული ხარჯები, სამელიორაციო სისტემებზე გაწეული ხარჯი. გარემოსდაცვითი ზედამხედველობის მიმართულებით, დაცული ტერიტორიების სისტემის ჩამოყალიბებაზე და მართვაზე გაწეული ხარჯი, სატყეო სისტემის ჩამოყალიბება და მართვა, ველური ბუნების ეროვნული სააგენტოს დაფინანსება, გარემოს დაცვისა და სოფლის მეურნეობის ინფორმაციაზე ხელმისაწვდომობა და ინფორმაციის მიწოდებაზე გაწეული ხარჯი, ბირთვული და რადიაციული უსაფრთხოების დაცვა, მიწის მდგრადი მართვის და მიწით სარგებლობის მონიტორინგის პროგრამა და სხვა პროგრამები.

კომიტეტებმა ანგარიშს მხარი დაუჭირა.