ბოლო პერიოდში ჩინეთის ფინანსური აქტივების გაიაფების ტენდენცია შეინიშნება, რისი მიზეზიც სხვადასხვა ჭორები გახდა. კერძოდ , შიშები იმაზე, რომ ჩინეთი საბაზრო რეფორმებზე უარს იტყვის და რეგულირებას გააძლიერებს.  თუმცა მიუხედავად ამისა, ჩინეთის ეროვნული ვალუტა იუანი სტაბილურობას ინარჩუნებს, რაც ფინანსურ ბაზარზე შექმნილ ვითარებასთან შედარებით აშკარა კონტრასტია. 2020 წლის მაისიდან ჩინური ვალუტა 9,7%-ით გამყარდა, რასაც აშშ- სა და ჩინეთს შორის სავაჭრო ომის შენელებამ შეუწყო ხელი.

 2014-2019 წლებში იუანის 20%-ით გაუფასურება ამერიკულ ბაზარზე ჩინელ მწარმოებლებს მნიშვნელოვან უპირატესობას ანიჭებდა. ამ ვითარებაში ადგილობრივი მრეწველობის დასაცავად ამერიკამ ჩინურ საქონელზე ტარიფები შემოიღო. 

არ არის გამორიცხული, რომ ვაშინგტონის ზეწოლამ ჩინეთის ხელისუფლებას იუანის კურსის ხელოვნური დევალვაციის პოლიტიკაზე უარის თქმა აიძულა, თუმცა, შესაძლოა ეს სხვა ფაქტორებმაც გამოიწვია. 

ჯერ კიდევ 2008 წელს ჩინეთმა პოლიტიკური გადაწყვეტილება მიიღო და აქცენტი შიდა მოხმარებაზე გადაიტანა, რაც  ქვეყნის მშპ - ზე დადებითად აისახა. თუ 2006 წელს ექსპორტის წილი ჩინეთის მშპ-ში 33% იყო, 2020 წელს ექსპორტის წილმა  18% შეადგინა. 

შესაბამისად,  ექსპორტის ზრდა უფრო ნელი იყო, ვიდრე შიდა მოხმარება. ეს ასევე ამცირებს იუანის დამოკიდებულებას საგარეო ვაჭრობაზე, რაც მის სანდოობას და სიმყარეს ხელს უწყობს. 

ამ ვითარებაში ინვესტორებს მიაჩნიათ, რომ პეკინი ექსპორტის სტიმულირებისთვის იუანის კურსის ხელოვნურ დევალვაციაში დაინტერესებული უკვე არაა. ეს ვალუტის მიმართ ინტერესს და სანდოობას ზრდის. 

კიდევ ერთი მნიშვნელოვანი ფაქტორი - საერთაშორისო სავალუტო ფონდის მონაცემებით. 2021 წლის პირველ კვარტალში საერთაშორისო სავალუტო რეზერვების სტრუქტურაში 2,4% მოდიოდა, მაშინ, როდესაც დოლარზე 59,5%, ევროზე - 20,5%. ცხადია, რომ ჩინური ვალუტის ადგილი ამ კუთხით ჩინეთის ეკონომიკის ზომას და მის ადგილს მსოფლიოში არ შეესაბამება, ამიტომაც, იუანის წილი რეზერვებში თანმიმდევრულად იზრდება - 2019 წლიდან ზრდამ 30% შეადგინა. 

თუ ჩინეთი, ფინანსურ სისტემაში  მეტი რეგულირების პროცესში უფრო ლიბერალური იქნება ეს იუანის მიმართ ინვესტორების ინტერესს გაზრდის. 

ჩინური ვალუტის მხარდაჭერის კიდევ ერთი ფაქტორია ციფრული ვალუტის შექმნა, რაც 2022 წლისთვის არის მოსალოდნელი,  ციფრული ვალუტა უფრო სწრაფ და გამჭვირვალე ტრანზაქციებს უზრუნველყოფს, რაც იუანის რეიტინგს გაზრდის. ჯერ ძალიან ადრეა იმაზე საუბარი, რომ იუანი დოლარს და ევროს შეასუსტებს, თუმცა, ის მსოფლიო ვალუტების ჩამონათვალში თავის ადგილს დაიკავებს.

მოამზადა თენგიზ აბლოთიამ 

წყარო: rbc