„გაყიდვების 2019 წლის მაჩვენებელს „დიო“ 2022 წელს გაუთანაბრდება“ - ამის შესახებ „კომერსანტს“ კომპანია ,,დიო’’-ს დამფუძნებელმა და გენერალურმა დირექტორმა ირმა დაუშვილმა განუცხადა. ბიზნესმენი გვიყვება, რომ ქვეყანაში შექმნილი რთული ეკონომიკური მდგომარეობის მიუხედავად, კომპანიას დაწყებული პროექტები არ გაურჩებია. დიომ პანდემიის პერიოდში 2 ახალი საწარმო გახსნა.
„გაყიდვებს წინა წლის ანალოგიურ პერიოდს თუ შევადარებთ, დიდ განსხვავებას ვერ ვხედავთ. 2020 წელს მხოლოდ აპრილის თვე იყო საგრძნობლად განსხვავებული და ეს სრული ლოქდაუნის ფონზე ლოგიკურიც იყო. ჯამურად 2 კვარტალს თუ შევადარებთ, საშუალოდ შეიძლება 3-5%-იანი ზრდა იყოს. ვვარაუდობთ, რომ გაყიდვების 2019 წლის მაჩვენებელს „დიო“ 2022 წელს გაუთანაბრდება, რადგან, ვფიქრობ, ამ დროისათვის პანდემიური მდგომარეობა მთელს მსოფლიოში დამთავრდება ან უფრო მეტად ადაპტირდება მსოფლიო ამ პრობლემასთან. ჩვენ ამ პერიოდში მაინც განვაგრძეთ დაწყებული პროექტები. გავხსენით 2 ახალი საწარმო. ერთი თბილისში, რომელიც ალუმინის კარ-ფანჯრების წარმოების გაფართოების საშულებას გვაძლევს, ხოლო ქუთაისში პერგოლას წარმოება დავიწყეთ. ასე რომ, ჩვენი კომპანია მზად არის განახორციელოს უფრო ფართო მასშტაბის პროექტები. ჩვენ 25 წლიანი გამოცდილების კომპანია ვართ ამ ხნის მანძილზე მივიღეთ კრიზისთან გამკლავების გამოცდილება“, - განაცხადა ირმა დაუშვილმა.
,,დიო’’-ს დამფუძნებელი და გენერალური დირექტორი გვიყვება, რომ კომპანიამ გასული, 2020 წელი 7%-იანი კლებით დაასრულა. იმის თქმა, რომ სიტუაცია გაუმჯობესებულია, ბიზნესმენს უჭირს, თუმცა ამბობს იმას, რომ ქვეყანაში ინფრასტრუქტურული პროექტების განხორციელებამ კომპანიას საშუალება მისცა საქმიანობა არ შეეჩერებინა.
„გლობალურმა პანდემიამ მსოფლიო ეკონომიკა შეარყია. ამ მხრივ გამონაკლისი არც საქართველოა და ვფიქრობ, ჩვენ უფრო მეტი გამოწვევის წინაშე დავდექით, რამდენადაც სახელმწიფო ასეთი ეკონომიური კრიზისისათვის მზად არ იყო. ამდენად, ჩვენი ქვეყნის ეკონომიკური მდგომარეობა გაცილებით მძიმეა, ვიდრე განვითარებული ქვეყნების. ამას თან ერთვის ლარის გაუფასურება, რაც ყველაზე მძიმეა ქართული ბიზნესისათვის, მათ შორის ჩვენი კომპანიისთვისაც. ჩვენი პროდუქცია ევროპული მასალებისგან იწარმოება, დამოკიდებულია იმპორტზე და ლარის კურსის რყევა ფასებზე მყისიერ ზეგავლენას ახდენს. ასევე ის ფაქტი, რომ პანდემის პერიოდში ტურისტული და სარესტორნო ბიზნესი საერთოდ გაჩერდა, რასაც დიდი წილი უჭირავს ქართულ ეკონომიკაში, ეს თავისთავად ჯაჭვური რეაქციით სხვა ბიზნესებზეც აისახება. ჩვენი კომპანიის გაყიდვების დაახლოებით 30% ჰორეკა სექტორზე მოდიოდა“, - განაცხადა ირმა დაუშვილმა.
ბიზნესმენის თქმით, შეზღუდვების მოხსნამ დადებითად გავლენა მოახდინა როგორც კომპანიის სამუშაო პროცესებზე, ასევე მომხმარებელზეც. ამბობს, რომ კომპანიაში ვიზიტები გააქტიურდა, თუმცა იმისაც დასძენს, რომ ამას გაყიდვების პირდაპირპროპორციული ზრდა არ მოჰყოლია.
„ეკონომიური კრიზისი საკმაოდ იგრძნობა, რადგან ზოგჯერ კრიზის მეორე წელი კიდევ უფრო რთულია, ვიდრე პირველი. თუ სამომავლოდ ტურისტული სექტორი გააქტიურდება და სარესტორნო ბიზნესიც სრულყოფილად ამუშავდება, მაშინ შეზღუდვების მოხსნა დადებითად აისახება ჩვენი კომპანიის მუშაობაზე. დღეისათვის კი პროგრესი არის მხოლოდ ის, რომ სამუშაო პროცესში ხელი არ გვეშლება და გადაადგილება არ არის შეზღუდული“, - თქვა ბიზნესმენმა.
ირმა დაუშვილის განცხადებით, დღეს ბიზნესის უმთავრეს გამოწვევად დამატებითი რეგულაციები, არასტაბილური ვალუტის კურსი და ინვესტიციების ნაკლებობა რჩება. ამბობს, რომ ამ რთულ პერიოდში საქართველო ინვესტორებისთვის ნაკლებად საინტერესო ქვეყანაა, ხოლო უცხოური კაპიტალის მოზიდვის გარეშე ქვეყნის ეკონომიკის განვითარება ძნელია. კომერსანტის კითხვაზე, თუ რამდენად ეფექტური იყო საქართველოს მთავრობის მიერ გადადგმული ნაბიჯები კოვიდ-19-თან მიმართებით ბიზნესმენი გვპასუხობს, რომ მმართველმა გუნდა არაეფექტური გადაწყვეტილებები მიიღო, რამაც ბიზნესის საქმიანობა მნიშვნელოვნად შეაფერხა.
„ვფიქრობ, პანდემიის დროს მთავრობის მიერ გადადგმული ნაბიჯები ბიზნესის მიმართულებით საკმაოდ არაეფექტური იყო, განსაკუთრებით რთული იყო ბუნდოვანი რეგულაციები, რომლებიც ცხადდებოდა და შემდგომ კი მისი განხორციელება ბევრ კითხვებს იწვევდა და ამ კითხვებზე არ იყო დროული პასუხები. გაურკვევლობა კი ყველაზე რთული აღსაქმელია ბიზნეს სექტორისათვის. თავდაპირველმა ჩაკეტვებმა სამუშაო პროცესების სრული პარალიზება გამოიწვია. თუმცა უნდა აღინიშნოს, რომ ის საგადასახადო შეღავათი, რაც საშემოსავლო გადასახადის კომპონენტში გააკეთა მთავრობამ, ბიზნესისთვის ერთგვარი დახმარება იყო, მაგრამ კომპანიას ბევრი სხვა ვალდებულებებიც აქვს – მათი შესრულება კი საკმაოდ რთული იყო. ასევე მუნიციპალური ტრანსპორტის გაჩერება საკმაოდ რთული იყო, რადგან ჩვენ ვართ წარმოება და ამ ნაწილში დისტანციურად მუშაობა შეუძლებელია, თანამშრომელთა ტრანსპორტირება კი ჩვენს ხარჯებს იმ პერიოდში აორმაგებდა. ვფიქრობ, რომ იყო საშუალება, რომ უკეთესი და უფრო ეფექტური ქმედებები ყოფილი ბიზნესის მხარდაჭერის. თუნდაც საბანკო სექტორთან მოლაპარაკებისა და ქონების გადასახდის კუთხით გარკვეული შეღავათი არა მხოლოდ ჰორეკა სექტორისათვის ყოფილიყო გათვალისწინებული, რადგან ბევრი სხვა ბიზნესი პირადპირპროპოციულად იყო მიბმული ამ სექტორზე. განსაკუთრებით კი მცირე და საშუალო ბიზნესი“, - აცხადებს ირმა დაუშვილი.
,,დიო’’-ს ისტორია 25 წლის წინ, 1996 წელს ნულოვანი კაპიტალით დაიწყო. ჟალუზების წარმოებით დაწყებული ბიზნესი თანამედროვე ტექნოლოგიებით აღჭურვილ საწარმომდე გაიზარდა და შესაბამისად გაიზარდა ასორტიმენტი. კომპანია დღესდღეობით 70-მდე დასახელების პროდუქტს აწარმოებს.
ბაჩო ადამია