„გაყიდვების კუთხით 40, 50 და ზოგან 30 %- იანი კლება გვაქვს, უბნის მაღაზიებში მატებაა თუმცა, დიდ ობიექტებზე გაყიდვები საგრძნობლადაა შემცირებული“, ამის შესახებ „კომერსანტს“ სავაჭრო ცენტრ „უნივერსამის“ კომერციულმა დირექტორმა დავით ფარესაშვილმა განუცხადა. მისი თქმით, გაყიდვების კლება ხალხის ნაკადის შემცირებამ გამოიწვია, როგორც ფარესაშვილი განმარტავს ადამიანებს დიდ რიგში დგომა უჭირთ.
„მუშაობის პროცესი ჩვენთან ნორმალურად მიმდინარეობს, უბრალოდ, დიდი რიგებია, რამაც გაყიდვები საშუალოდ 40 პროცენტით შეგვიმცირა. პარალელურად, ცუდი ამინდებია და რადგან შეზღუდულად ხდება ადამიანების მაღაზიაში შეშვება მათ რიგში დგომა უჭირთ, მეცოდება მოსახლეობა, წვიმაში უწევთ დიდხანს დგომა. სხვა მხრივ, მთავრობა შეზღუდვებს არ გვიწესებს, თუმცა, ხანდახან არის ხოლმე ისეთი შემთხვევები, როდესაც სხვადასხვა სამსახურები სხვანაირად წარმოიდგენენ ამ დადგენილებებს და შემდეგ დამატებითი შეზღუდვების შესრულებას გვთხოვენ, რომელიც არ არის და უბრალოდ სხვანაირად აქვთ აღქმული, ამის შემდეგ მთავრობასთან ხდება კომუნიკაცია და სხვათაშორის საკითხს მაშინვე აგვარებენ, ამ მხრივ პრობლემა არ გვაქვს“, - განმარტავს დავით ფარესაშვილი.
როგორც დავით ფარესაშვილი აღნიშნავს, „უნივერსამის“ ქსელს მარაგების კუთხით პრობლება არ შექმნია. სავაჭრო ცენტრის კომერციული დირექტორის განმარტებით,, ბურღულეულის მცირე დეფიციტი შეიქმნა, თუმცა,რუსეთზე დამოკიდებული იმპორტი სრულად ჩაანაცვლეს სხვა ქვეყნებით. ბრინჯს და წიწიბურას ახლა ჩინეთიდან და პაკისტანიდან ელოდებიან.
„ბურღულეული როგორც ვიცი ამ კვირაში შემოვა, რადგან პროდუქცია ადრე შეუკვეთეს. წიწიბურა მხოლოდ პაკეტების არის დარჩენილი. წონის, რომლის იმპორტიც რუსეთიდან ხორციელდებოდა აღარ გვაქვს, თუმცა ახლა დღე-დღეზე ჩინური შემოვა. წიწიბურის იმპორტი ჩინეთიდან ყოველთვის ხორციელდებოდა ბრინჯის მარაგის კუთხით იყო პრობლემა, მაგრამ გავარკვიეთ, რომ იმპორტი ჩვეულებრივად განხორციელდება. აქედან გამომდინარე,წესით და რიგით არანაირი პრობლემა აღარ იქნება“,- განაცხადა დავით ფარესაშვილმა.
სავაჭრო ცენტრ „უნივერსამის“ კომერციული დირექტორი გვიყვება, რომ კომპანიას მიკროავტობუსები ჰყავს დაქირავებული, რომლითაც თანამშრომლები დაჰყავთ. და არსებულ რეალობას მორგებულნი არიან. მისი განმარტებით, ყოველდღიური კომუნიკაცია აქვთ სამთავრობო უწყებებთან, სადაც ეხმარებიან და ბიზნეს ხელოვნურ ბარიერებს არ უქმნიან. კომპანიაში ამბობენ, რომ თითქმის ყველა თანამშრომლის შენარჩუნება მოხდა. დავით ფარესაშვილის თქმით, იმისათვის, რომ ადამიანებს სამსახური შეენარჩუნებიათ, თანამშრომელი შვებულებაში გაუშვეს და მონაცვლეობით ამუშავებენ.
„რა თქმა უნდა იმდენი თანამშრომელი არ გვჭირდება, რამდენიც კორონავირუსის გავრცელებამდე გვჭირდებოდა. იმისათვის, რომ მათ სამსახური შეენარჩუნებიათ ორ-ორ კვირიან შვებულებაში გავუშვით და მონაცვლეობით ვამუშავებთ. პირობითად შვებულება თუ უნდა აეღოთ ზაფხულში, ახლა ვაძლევთ, გადავუთამაშეთ, რათა სამსახური ყველას ჰქონოდა, ზაფხულში უბრალოდ აღარ მივცემთ შვებულებას“,- ამბობს დავით ფარესაშვილი.
ბაჩო ადამია