საქართველოში კომერციული გაზის ტარიფის ზრდა  ადგილობრივ წარმოებას დიდ პრობლემას უქმნის.  სამეწარმეო ბიზნესში ფასის კორექტირების შესაძლებლობებს განიხილავენ და აცხადებენ, რომ გაზრდილი ხარჯის გამო პროდუქტის გაძვირება მოუწევთ. სავარაუდოდ, მოიმატებს ყველა პროდუქტის აფსი, რომლის თვითღირებულებაშიც გაზი სოლიდურ წილს იკავებს.

როგორც კომპანია ,,კუმისის“  გენერალური დირექტორი  ზურაბ უჩუმბეგაშვილი ,,კომერსანტთან“  ამბობს, ახალი ტარიფი ბიზნესზე ნეგატიურ გავლენას იქონიებს.

,,გადასახადის ზრდა ყველა წარმოებას შეეხება, რომლის თვითღირებულებაში გაზის კომპონენტია. გარდა იმისა, რომ ტარიფი მატულობს, არ ვიცით, როგორ შეიცვლება ლარის კურსი, ესეც დიდი არასტაბილურობის გამომწვევია. სანამ გლობალურ ბაზრებზე პრობლემაა, ფასების ზრდის პროცესს ვერაფერი შეაჩერებს. ამის გავლენა იგრძნობა საქართველოშიც. ვერანაირ გათვლას ვერ გააკეთებ, იმდენად უმართავია სიტუაცია ბიზნესისთვის. ჯერ კიდევ გუშინ შედარებით მშვიდად ვიყავით და ჩვეულებრივ ვაგრძელებდით მუშა პროცესს, დღეს ვიგებთ, რომ გაზი ძვირდება. შესაბამისად, ფასების კორექტირება მოგვიწევს, გაზის ტარიფთან ერთად საფასო პოლიტიკა შეიცვლება, რაც საბოლოოდ მომხმარებელს დააწვება და წარმოების მასშტაბზეც უარყოფითად იმოქმედებს“, - აცხადებს ,,კომერსანტთან“ ზურაბ უჩუმბეგაშვილი.

2022 წლის 1-ლი ივლისიდან დედაქალაქსა და რეგიონებში გაზის ტარიფი არასაყოფაცხოვრებო მომხმარებლებისთვის იზრდება. რეგიონებში,  შპს “თელავგაზის“, “სოკარ ჯორჯია გაზის“, „საქორგგაზის“ და „ინტერ გაზის“ საცალო არასაყოფაცხოვრებო მომხმარებლებისთვის, 1მ3 ბუნებრივი გაზის ფასი განისაზღვრება 1,38 ლარით დღგ-ს ჩათვლით. აღნიშნულის შესახებ განცხადებები თავად კომპანიებმა გაავრცელეს.

თბილისის შემთხვევაში, როგორც ,,თბილისი ენერჯის“ მიერ გავრცელებული ინფორმაციიდან ირკვევა, ტარიფი  ერთ კუბურ მეტრ გაზზე 1.10 ლარს შეადგენდა, რაც 1.35 ლარამდე იზრდება. ცვლილება 20 000 არასაყოფაცხოვრებო აბონენტს შეეხება.

მარი ჩიტაია