პოლონეთისა და ბულგარეთისთვის გაზის მიწოდების შეწყვეტის შემდეგ, ოთხშაბათს, 27 აპრილს, რუსული გაზპრომი ამ გადაწყვეტილების მიზეზებს ასახელებს და ამბობს, რომ ამ ქვეყნების ენერგოკომპანიებმა გაზის საფასური დადგენილ ვადებში არ გადაიხადეს.

„გაზპრომ ექსპორტმა“ აცნობა „ბულგარგაზს“ და პოლონურ PGNiG–ს 27 აპრილიდან გაზის მიწოდების შეწყვეტასთან დაკავშირებით, ვიდრე განკარგულებით დადგენილი წესებით არ დაფარავენ დავალიანებას. გაზპრომ ექსპორტს ამ კომპანიებისგან გაზის საფასური 26 აპრილის საღამომდე უნდა მიეღო“, – აცხადებს გაზპრომი.

მეტიც, გაზპრომი აცხადებს, რომ ბულგარეთი და პოლონეთი ტრანზიტული ქვეყნებია დანარჩენი ევროპისთვის და გაზის მიღებას სატრანზიტო სიმძლავრეებიდან თუ შეეცდებიან, ტრანზიტის მოცულობა მათ მიერ უკანონოდ მოპოვებული გაზის ოდენობით შემცირდება.

ბულგარეთი აპროტესტებს

ბულგარეთი კი აცხადებს, რომ აპრილში მიღებული გაზის საფასური გადახდილი აქვთ და მიწოდების შეწყვეტა კონტრაქტის დარღვევა იქნება. ამის შესახებ ბულგარეთის ენერგეტიკის მინისტრმა ალეკსანდრ ნიკოლოვმა განაცხადა.

მისი თქმით, ბულგარეთი ევროკომისიის პოზიციებს იზიარებს, რომელმაც ევროპულ ქვეყნებს რუსული გაზის საფასურის ვალუტაში გადახდისკენ მოუწოდა.

„ვინაიდან ყველა სავაჭრო და იურიდიული ვალდებულება დაცულია, გასაგებია, რომ ამ მომენტში ბუნებრივი გაზი უფრო პოლიტიკურ და ეკონომიკურ იარაღად გამოიყენება“, ციტირებს მინისტრს სააგენტო როიტერი.

მორჩილი ავსტრია

ავსტრია კი დათანხმდა კრემლს გაზის საფასურის რუბლში დაფარვაზე.

„ავსტრია და ქვეყნის უმსხვილესი ნავთობ კომპანია OMV თანხმდებიან რუსულ გაზში რუბლის გადახდას“, – განაცხადა ავსტრიის კანცლერმა კარლ ნეჰამერმა.

თავის მხრივ, ავსტრიის ენერგეტიკის მინისტრმა ლეონორა ჰევესლერმა განაცხადა, რომ რუსული გაზი ქვეყანას სრული მოცულობით მიეწოდება მისი შეწყვეტის შესაძლებლობები არ არსებობს. 

პოლონეთი კატეგორიულია

პოლონეთის ხელისუფლება კი საერთოდ აღარ აპირებს რუსული გაზის შესყიდვას, განაცხადა პოლონური რადიოს ეთერში ქვეყნის მთავრობის წარმომადგენელემა სტრატეგიული ენერგეტიკული ინფრასტრუქტურის საკითხებში პეტრ ნაიმსკიმ.

„არა. ჩვენ არ შევიძენთ რუსეთისგან გაზს. დამთავრდა“, – განაცხადა მან და აღნიშნა, რომ პოლონეთი რუსულ გაზზე უარის სათქმელად 6 წელი ემზადებოდა.

ამ ყველაფრის ფონზე ევროპაში ბუნებრივი გაზის ფასი 16%–ით ავარდა და 1000 კუბურ მეტრზე $1300–ს მიაღწია.