გაზის გაძვირება ინფლაციურ წნეხს გაზრდის, რადგან მწარმოებლური პროდუქცია გაიზრდება და ინფლაციაზე აისახება. მცირე და საშუალო საწარმოთა ასოციაციის ხელმძღვანელის მიხეილ ჭელიძის თქმით,  გაძვირდება მომსახურების სფერო, განსაკუთრებით სასტუმროები, ასევე აგროწარმოება, სათბურები და სხვა, ყველა ის სერვისი და საწარმო, რომელიც ბუნებრივ აირს მოიხმარენ.

,,ყველა ვარიანტში გაძვირდება ის წარმოება, რომელიც გაზს მოიხმარს. ძირითადად ეს იქნება მომსახურების სფერო და აგრარული პროდუქციის წარმოება, მათ შორის, სათბურები.  მთელი საქართველო პრაქტიკულად ბუნებრივი აირის საშუალებით თბება, შესაბამისად, მომსახურების ამ სეგმენტს - სასტუმრო ბიზნესს, ფასების გადახედვა მოუწევს. ცხადია, საბოლოოდ მომხმარებელზე აისახება“, - აცხადებს ,,კომერსანტთან“ მიხეილ ჭელიძე და სატარიფო პოლიტიკასთან დაკავშირებით საკუთარ მოსაზრებასაც გვიზიარებს.

,,ელექტროენერგიის წარმოება და იმპორტიც ქვეყანაში მომგებიანი უნდა იყოს. ეს მნიშვნელოვანია, რომ ბიზნესი განვითარდეს და წარმოებული პროდუქციის ხარისხი გაუმჯობესდეს.  ტარიფი თუ გასაზრდელია, ერთხელ დაკორექტირდეს და ვიცოდეთ, რომ გრძელვადიან პერსპექტივაში ცვლილება არ იქნება მოსალოდნელი. ეკონომიკა ახალი სატარიფო პოლიტიკის  შესაბამისად უნდა გადაეწყოს. გასაგებია, რომ გადასახადის ზრდა რიგ შემთხვევაში  ჩვენი მიზეზით არ არის განპირობებული, გლობალურ ბაზრებზეც ყველაფერი ძვირდება. თუმცა  მუდმივად ტარიფების ცვლა ბიზნესში არასტაბილურობას და  დიდ პრობლემას გამოიწვევს“, - აცხადებს მიხეილ ჭელიძე.

გაზრდილი გადასახადი განსაკუთრებით სასათბურე მეურნეობებს შეუქმნის პრობლემას. სოფლის მეურნეობის განვითარების საერთაშორისო ასოციაციის ხელმძღვანელი კობა კობალაძე ამბობს, რომ შეიძლება ხარჯი მნიშვნელოვნად გაიზრდება, რადგან გათბობაზე სათბურების ბიუჯეტის ნახევარზე მეტი მოდის. მეცნიერი გათბობის ალტერნატიული საშუალებების საჭიროებაზეც საუბრობს.

,,ჩვენ მაღალი მოსავლიანობის მიღწევა თუ გვსურს, სწორედ სასათბურე მეურნეობები უნდა განვავითაროთ. ამისთვის ფერმერებს მაქსიმალურად ხელსაყრელი პირობები უნდა ჰქონდეთ. სათბურებით ისედაც არ ვართ განებივრებული. ძირითადი მიზეზი მაღალი ხარჯია, მარტო გათბობა მთელ ბიუჯეტში დაახლოებით 70%-ს იკავებს. ვხედავთ, რომ გაზის გადასახადი ძვირდება, ამიტომ  იმისთვის, რომ ეს ხარჯი შემცირდეს, მაქსიმალურად უნდა იქნას გამოყენებული ალტერნატიული საშუალებები. ერთ-ერთი ასეთია ცხელი წყლის ფაქტორი გეიზერების სახით, რის შესაძლებლობაც არის საქართველოში, მაგრამ პრობლემა კადრების დეფიციტია. ამიტომაა, რომ ამდენი მცდელობის მიუხედავად სასათბურე მეურნეობები ვერ განვავითარეთ საქართველოში“, - ამბობს კობალაძე.

სასათბურე  მეურნეობაში ხარჯის ზრდაზე საუბრობს ახალქალაქის ბიზნეს ცენტრის ხელმძღვანელი, მეწარმე მახარე მაცუკატოვი, რომელმაც სულ ახლახან  სასათბურე მეურნეობა გამართა და საქმიანობას იანვრიდან შეუდგება. ,,კარტოფილის ჩითილებს გამოვიყვანთ.  მონტაჟი თითქმის დასრულებულია, საქმიანობას თებერვლიდან  შევუდგებით. გათბობა თვითღირებულებაში მთლიანი ხარჯის 20%-ს დაიკავებს.  შესაბამისად, წარმოებული პროდუქცია გაძვირდება, რადგან ბიზნესი სხვაობას სხვა საშუალებით ვერ დაფარავს“, - ამბობს მეწარმე  ,,კომერსანტთან“.

შეგახსენებთ, რეგიონებში გაზის ტარიფი 6-დან 20 თეთრამდე იზრდება. 2021 წლის 1-ლი დეკემბრიდან არასაყოფაცხოვრებო მომხმარებლებისთვის 1მ3 ბუნებრივი აირი 1.15 ლარი ხდება. ბიზნესისთვის გაზის ტარიფის გაზრდასთან დაკავშირებით განცხადება უკვე გაავრცელეს კომპანიებმა.

როგორც განცხადებაშია აღნიშნული, გაზის გაძვირების ერთ-ერთი მიზეზი ეროვნული ვალუტის გაუფასურებაა.

მარი ჩიტაია