ზალცბურგში მდებარე ავსტრიის უმსხვილესი გაზსაცავი, „ჰაიდახი“ კომპანია RAG Austria-ს მართვის ქვეშ საბოლოოდ გადავიდა. ინფორმაციას Kroner Zeitung ავრცელებს.
მანამდე „ჰაიდახის“ გაზსაცავს რუსული „გაზპრომი“ მართავდა, რომელსაც საცავი ავსტრიის მთავრობის გადაწყვეტილების საფუძველზე ჩამოერთვა, რადგან რუსული სახელმწიფო კომპანია მას საჭირო რაოდენობის გაზით არ ავსებდა. ავსტრიის კანონმდებლობა გაზის დეფიციტის შემთხვევაში ქვეყანაში არსებული ყველა საცავის გახსნის უფლებას იძლევა, რუსულმა კომპანია კი „ჰაიდახს“ ცარიელი ინახავდა.
ავსტრიის კლიმატის დაცვის მინისტრი, ლეონორე გევესლერი აცხადებს, რომ RAG Austria-მ გაზის საცავის სიმძლავრეებს უკვე ჯავშნის და მის შევსებას 1-ლი აგვისტოდან დაიწყებს.
„სავსე გაზსაცავი ჩვენი დაზღვევაა მომავალი ზამთრისთვის, ამიტომ მნიშვნელოვანია, ავსტრიაში ყველა საცავი შევსებული იყოს,“ - აცხადებს მინისტრი.
RAG Austria-ს ხელმძღვანელი, მარკუს მიტერეგერი მინისტრს ეთანხმება. მისი თქმით, „სულ უფრო ცხადი ხდება, თუ რამდენად ფუნდამენტურია ენერგიის შენახვა ავსტრიასა და ცენტრალურ ევროპაში უსაფრთხო მიწოდებისთვის მთელი წლის განმავლობაში.“
„დიდი მოცულობები და სეზონური შენახვა ჩვენს მიწისქვეშა საცავებში არის მნიშვნელოვანი ელემენტი დღეს და ხვალ მიწოდების უზრუნველსაყოფად,“ - ამბობს მიტერეგერი.
ავსტრიის კანცლერმა „გაზპრომი“ ჯერ კიდევ მაისში გააფრთხილა, რომ ზალცბურგის საცავი სხვა მიმწოდებელს გადაეცემა, თუკი რუსული კომპანია მას გაზით არ შეავსებდა. ივლისის დასაწყისში „გაზპრომმა“ ავსტრიულ კომპანია OMV-ს გაზის მიწოდება 70%-ით მას შემდეგ შეუწყვიტა, რაც Nord Stream 1-ის რემონტი დაიწყო.