ლარის კურსის მკვეთრი გამყარების მიუხედავად, სამომხმარებლო ბაზარზე გაზრდილი ფასების შემცირება ვერ ხერხდება. გლობალური ფასები, გაძვირებული ლოგისტიკა და ნეგატიური მოლოდინები ფაქტობრივად ყველა დასახელების სურსათის ფასებზე მოქმედებს. როგორც დისტრიბუტორთა ასოციაციის ხელმძღვანელი ივა ჭყონია ,,კომერსანტთან“ ამბობს, ლარის კურსის დამსახურებაა, რომ ფასების შენარჩუნება შესაძლებელი გახდა.
ჭყონიას თქმით, არსებული კურსის პირობებში მორიგი გაძვირების საფრთხე ფაქტობრივად არ არის, თუმცა პროდუქტი ჯერჯერობით ვერ გაიაფდება და ამაზე საუბარიც ძალიან ნაადრევია.
,,ლარის გამყარების დინამიკა ჯერჯერობით შეიძლება გაგრძელდეს, მაგრამ ფასებთან დაკავშირებით პროგნოზის გაკეთება წარმოუდგენელია. საუკეთესო შემთხვევაა, თუკი ფასების არსებული ნიშნულის შენარჩუნება მოხერხდება. გაიაფების საკითხი დღის წესრიგიდან მოხსნილია და ასე გაგრძელდება საკმაოდ დიდი ხნის განმავლობაში. ამაზე დიდ გავლენას ახდენს საერთაშორისო გადაზიდვები, რომელიც მასშტაბურად გაძვირებულია, ადგილზეც, ყველა ქვეყანაში, სადაც პროდუქტს ვყიდულობთ, ფასები გაზრდილია. ფასების დაწევა მხოლოდ ლარის ფაქტორის მონაწილეობით წარმოუდგენელია. როგორც არ უნდა გამყარდეს ეროვნული ვალუტა, მის მიმართ ნდობა არ არსებობს. მით უმეტეს, ადრეც გვინახავს გამყარებული ლარი, მაგრამ მერე ისევ გაუფასურებულა. ჩვენ ვართ იმ მოცემულობაში, როცა ლარის გამყარების ფუნდამენტური საფუძველი არ არსებობს, ამიტომ არანაირი პირობა არ არის ბაზრებზე, რომ ფასების შემცირებაზე დავიწყოთ საუბარი“, - აცხადებს ივა ჭყონია.
მისივე თქმით, ერთადერთი, რაც შეიძლება მცირე შეღავათი აღმოჩნდეს მომხმარებლებისთვის, წამახალისებელი აქციებია. როგორც დისტრიბუტორთა ასოციაციის ხელმძღვანელი აღნიშნავს, დროდადრო სუპერმარკეტებში მოქმედებს სააქციო ფასები, რის ტენდენცია მუდმივად არის ბაზარზე - ვის რა შესაძლებლობაც აქვს, ფასის შემცირების მიზნით გარკვეულ ფასდაკლებებს აკეთებენ.
რაც შეეხება ლარის კურსს, ეროვნული ბანკის მიერ გამოქვეყნებული მონაცემების თანახმად, 24 მაისის ვაჭრობის შედეგად 1 აშშ დოლარის ღირებულება 2.8668 ლარია.
რაც შეეხება ევროს, მისი კურსი 3.0706 ლარს შეადგენს.
მარი ჩიტაია