საშუალო ხელფასი საქართველოში 1464 ლარამდე გაიზარდა. ამ ციფრების მიღმა შემაშფოთებელი მოცემულობაა - თითქმის ყოველი მეორე დასაქმებული 500 ლარზე ნაკლებ ხელფასს იღებს. გარდა ამისა, დიდია ინფლაციის გავლენაც, როგორც სტატისტიკოსი სოსო არჩვაძე ,,კომერსანტთან“ განმარტავს, გაზრდილი საშუალო ხელფასი ინფლაციამ 2,3%-ით შეამცირა.

,,საშუალო ხელფასი 11,3%-ით გაიზარდა, მაგრამ ინფლაცია გვქონდა 13,9%-ის დონეზე. ეს ნიშნავს, რომ ზრდის მიუხედავად რეალურ განზომილებაში ხელფასი დაახლოებით 2,3%-ით შემცირდა ანუ საშუალო ხელფასის ზრდა   ინფლაციის მაჩვენებელს ჩამორჩა. ზოგადად ხელფასებისთვის დამახასიათებელია ზრდის ტენდენცია, მაგრამ ამ შემთხვევაში ინფლაციამ თითქმის ,,შეჭამა“ საშუალო ხელფასის სიდიდე. ინფლაცია უფრო მაღალი იყო, ვიდრე საშუალო ხელფასის ზრდა.  სამწუხაროდ, დასაქმებული მოსახლეობის დიდი რაოდენობა, არანაკლებ 45%-სა, 500 ლარზე ნაკლებ ხელფასს იღებს“, - აცხადებს არჩვაძე.

მისივე თქმით, სახელმწიფომ ეს მომენტი გაითვალისწინა  და კომუნალურ ხარჯებზე სუბსიდირება  სწორედ დაბალშემოსავლიანებზე მოახდინა.

,,ერთია, ხელფასების პირველადი განაწილება და მეორე, მათი  საბოლოო გამოყენება და საბოლოო მოხმარებისთვის განკუთვნილი ხელფასის მსყიდვითი უნარიანობა. ის, რაც ინფლაციამ ,,შეჭამა“,  მისი ნაწილობრივი კონფისკაცია დაბალშემოსავლიანების მიმართ იქნა გათვალისწინებული. მაღალშემოსავლიანები  ინფლაციის გამოწვევის წინაშე პირისპირ დარჩნენ“, - დასძენს არჩვაძე ,,კომერსანტთან“.

სტატისტიკოსის შეფასებით, საინტერესოა ერთი გარემოებაც, რომ სამეწარმეო სექტორში დასაქმებულთა ანაზღაურება უფრო სწრაფად გაიზარდა - დაახლოებით 1,5-ჯერ უფრო მეტად, ვიდრე არასამეწარმეო სექტორში. ეს ნიშნავს, რომ ბიზნესი  მაინც ცდილობს უფრო იოლად გაართვას თავი გამოწვევებს და მეტ მზაობას გამოხატავს.

გარდა ამისა, ქალების ხელფასი უფრო გაიზარდა, ვიდრე მამაკაცების - 65%-ის დონეზეა, რაც იძლევა იმედს, რომ გენდერული სხვაობა ანაზღაურებაში თანდათან დაიძლევა.

შეგახსენებთ, რომ დაქირავებით დასაქმებულთა საშუალო ყოველთვიური ნომინალური ხელფასი 2021 წლის მეოთხე კვარტალში წინა წლის ანალოგიურ პერიოდთან შედარებით 11.3%-ით 1464 ლარამდე გაიზარდა. ინფორმაციას ამის შესახებ ,,საქსტატი“ ავრცელებს.

 ამასთან, 2021 წლის დეკემბერში ოფიციალურმა ინფლაციამ 13.9%-ს მიაღწია, რაც თავის მხრივ იმას ნიშნავს, რომ 1150 ლარი თავისი მსყიდველუნარიანობით იმდენივე იყო რაც 2020 წლის 1010 ლარი, 2020 წლის მეოთხე კვარტალში კი საშუალო ხელზე ასაღები ხელფასი 1030 ლარს შეადგენდა. ის ადამიანები, რომელთა ნომინალური ხელფასიც 2021 წელს 13.9%-ზე ნაკლებით გაიზარდა, რეალურად გაღარიბდნენ.

მარი ჩიტაია